Đah nău ntop kơl tơm prăk bah ngân hàng chính sách, nuĭh ƀon lan ta xã nkual jru ngai Cư Drăm, nkuâl Krông Bông, n’gor Dak Lak hŏ nsrôih rgâl si tăm gay n’hao nău geh wăng sa, ntop nău geh an rnăk wâl.  

    Ngăch klêh ăp play prit nkŏ têh, dŭm chăt gay rdeng tăch an nuĭh rvăt, yuh Trần Thị Lan, ta thôn 2, xã Cư Drăm, nkuâl Krông Bông, n’gor Dak Lak an gĭt, bơi 4 năm aơ, tơm prit nkŏ jêng tơm tăm tơm nsĭt geh wăng sa đăp mpăn an rnăk yuh. Bah 12 ha neh tuch tăm ntơm nơh dơn tăm êng du ntil tơm cà phê, đah aƀaơ 5 năm, yuh Lan hŏ nănh manh 50 rkeh prăk bah ngân hàng chính sách xã hội nkuâl Krông Bông gay rgâl tăm 7ha prit nkŏ njŭng ntil Cayenne. Bôk năp yuh hŏ nsĭt geh bơi 300 rkeh prăk. Saơ tăm prit nkŏ nsĭt geh wăng sa, yuh mbrơi trok lĕ rnon n’hanh manh tay gay rgâl 5ha neh hôm ƀa ƀă jêng tăm prit nkŏ đŏng.

        Ntơm nơh gâp tăm tơm cà phê, lôch nê ri tơm cà phê mât chăm roh dŭt âk mông nar jêng gâp rgâl jêng tăm tơm prit nkŏ. Rđĭl đah tơm  êng ƀa ƀă ri gâp saơ  prit nkŏ đêt nar kan, tơm prăk ntuh kơl đêt lơn, phân poh đêt lơn, nsĭt geh wăng sa ri âk rlău tơm cà phê. Gâp manh Ngân hàng chính sách ri gâp saơ deh prăk kon đêt, rnôk gâp manh nsĭt gâp ntuh kơl tăm prit nkŏ ri trok deh prăk kon đêt lơn rđĭl đah manh bah dih.

         Ta xã Cư Drăm, âk neh sop lŭ dôl nkrum nđĭr ma ăp tơm mir prit nkŏ bah nuĭh ƀon lan. Yuh Nguyễn Thị Kim Yến, ta thôn 2, xã Cư Drăm an gĭt: rnoh hvi neh tăm prit nkŏ dôl dơi pơk hvi tâm bar pe năm rlơ̆ aơ. Rvê mpeh trong tăch luh play rnôk neh tăm hvi ngăch, nuĭh ƀon lan ta ntŭk hŏ mĭn tât mât chăm gay prit nkŏ an geh play klêh tâm wơt đăp mpăn săk geh n’hanh rnoh khlay đăp mpăn lơn.

        Ta aơ lơn âk lah tăm prit nkŏ yor saơ tâm di lơn rđĭl đah ăp ntil tơm tăm êng ƀa ƀă. Tăm prit nkŏ dja dơh lơn, tơm prit nkŏ dơh hao jêng đŏng. Ta Cư Drăm dŭt âk tơm prit nkŏ, jêng ân ƀư an păng luh play rlơ̆ khay. He ân tâm pă, ăp tơ̆ he ân ƀư đêt đêt tăch săk geh âk lơn, rnoh khlay mbơm oi đŏng, bah ir geh bu mpet rnoh khlay.

         Ndrel đah tơm prit nkŏ, nuĭh ƀon  lan ta xã Cư Drăm ân tăm rơ̆ jêng âk ntil tơm tăm êng ƀa ƀă tâm di đŏng kơt tơm keo lai, điều, tơm sa play; hun hao mât  rong ta nâm n’hâm bri. Tĭng nchih rgum, xã Cư Drăm aƀaơ geh rlău 700 ha tơm keo lai, 800 ha prit nkŏ, 120 ha tơm sa play kơt sầu riêng, vải thiều, nhãn lồng, cam, quýt,… Lah nkual jru ngai đah rlău 2.000 rnăk, rlău 10.000 nuĭh, tâm nê nuĭh rnoi mpôl đê̆ âk rlău 80%, xã Cư Drăm dơi mât uănh ntuh kơl, rgum âk tơm ndơ gay hun hao tuch tăm. Tâm nê, tơm prăk manh thuk lah tơm prăk dơi  âk nuĭh ƀon lan sơch dŏng yor deh prăk kon đêt, siƀŭt manh dơh glêh. Wa Trần Đức Ánh, kruanh rmôt manh tơm prăk thôn 2, xã Cư Drăm an gĭt:

        Rmôt thôn 2 ri geh 52 rnăk manh n’hanh aƀaơ geh n’gluh an manh 2 rmen prăk. Đah ntŭk dja ri way lah khân păng manh sĭt gay mât rong n’hanh tuch tăm. Ăp nuĭh tâm rmôt ri hŏ dŏng tơm prăk bah he di nău kan kơt nău hŏ ton manh.

        Tĭng wa Nguyễn Thị Thanh Huyền, Groi giám đốc Ngân hàng Chính sách xã hội nkuâl Krông Bông, tât aƀaơ, geh an manh ta xã Cư Drăm lah rlău 30 rmen prăk, lơn âk lah manh ntuh kơl mât ndrôk deh kon n’hanh tuch tăm. Nuĭh ƀon lan nsrôih wăng sa, dŏng tơm prăk di nău kan jêng ăp tơm prăk manh nsĭt tay nău dơi tam, tŏng đah nău ŭch geh manh bah kônh wa. Mô dơn ta xã Cư Drăm, tơm prăk manh thuk bah ăp bôk nău kan hŏ dơi tâm pă ma âk trong an manh ta nkuâl Krông Bông đŏng gay nuĭh ƀon lan dơh tât n’hanh dŏng. Ntơm bah nê n’hao nău geh tam tâm rnôk ntuh kơl tuch tăm, tăch rgâl. Wa Nguyễn Thị Thanh Huyền lah:

        Mpôl  hên dôl an manh tât 12 bôk nău kan tơm prăk, rgum lơn âk lah 3 bôk nău kan: rnăk ach o, rnăk dăch kêng ach o n’hanh rnăk mhe klaih rlău ach o n’hanh rnăk ƀư njêng tăch rgâl nkual jêr jŏt. An rong lor bôk năp mpeh 3 bôk nău kan n’hŭch ach o. Nău ntuh kơl tơm prăk ma kruanh rmôt manh tơm prăk n’hanh ăp nsum mpôl. Khân păng mbra ƀư tơm  ăp rơh hop rmôt, ra uănh tay ăp nuĭh ŭch geh  dŏng tơm prăk lhăt. Nuĭh ƀon lan dŭt jăp gơih jêng khân păng dŏng tơm prăk di nău kan, nsĭt tay nău tam wăng sa an rnăk ƀon lan, bah ir jêr jŏt bah rnăk khân păng. N’hanh tâl bar đŏng lah hun hao wăng sa ta ntŭk.

        Đah nău jăp gơih, ôp joi, âk nuĭh ƀon lan ta xã nkual jru ngai Cư Drăm hŏ nsrôih rgâl si tăm, ndơ mât gay nsĭt geh wăng sa, hun hao wăng sa an rnăk wâl. Tơm prăk ăp bôk nău kan an manh dơh kơl khân păng geh tay tơm ndơ gay pơk hvi tuch tăm, geh tay trong rƀŏng hăn mhe rgop ntrŭt ntrôl wăng sa ta ntŭk hun hao lơn.