Kpă Meo ơm deh tâm du rnăk ach o ta ƀon Tung (xă O, nkuăl Chư Prông). Yor nău jêr jŏt jêng nô knŭng hăn nti tât jrô 9. Năm 2003, nô gŭ ur n’hanh rdâk njêng nău kan đah 2ha neh me bơ̆ an, gay tăm ăp ntil tuh mbo n’hanh tăm cà phê. Tât năm 2007, gĭt saơ cao su nsĭt tay săk rnglăy âk, nô ntuh kơl bah 150 rkeh prăk gay tăm tay 4 ha cao su. Năm 2009, nô pơk hvi tay  3ha cao su. Yơn lah, âk năm plơ̆  ma aơ yor cao su thuk jêng âk rnăk mâp âk jêr jŏt đah prăk kaih. Nô Meo lŏ âk măng ngăgay joi trong hăn mhe an rnăk wâl. Gĭt saơ âk ntŭk lĕ kơt dŏng ntrong kan tăm tơm sa play n’hanh nsĭt tay săk rnglăy âk, năm 2015 nô tâm nchră đah ur rwăt tay 4 ha neh gay tăm ăp ntil tơm kơt play đŭr thái, nhãn, prit, bơ, sầu riêng... tăm srah ndrel.

“Bôk năp rgâl trong tă bah tăm tơm sa play mâp âk jêr jŏt. Yor mô hŏ geh nău blău jêng mô dêr nău tơm sa play geh tu ndrŭng phah. Nău gĭt wât tơm geh tu ndrŭng lah du nău dŭt jêr jŏt. Mĭn joi nău mhe tă bah ndrôm sam ƀŭt, djăt Đài, nti ăp rnăk lĕ tăm uĕh jêng mir tơm sa play mbrơi mbrơi đăp mpăn n’hanh an rnăk wâl geh prăk âk. Lôch jêng bah rnăk wâl bôk năp bah kơi aơ gâp ntop kơl an kônh wa tâm ƀon, đoàn viên druh ndăm tâm ƀon mpeh kỹ thuật tăm gay hun hao wăng sa rnăk wâl”.

 Gay tĭng đah lŏ mir, Kpă Meo lĕ nsrôih nti, râng âk jrô tiăr nti kơt dŏng khoa học kỹ thuật ta ntŭk. Nô hăn âk nkual gay mĭn joi, nti nău blău ơm jêh nĕ sĭt săch kơt dŏng tâm di đah trôk nar, neh ntu ta ntŭk. Nkre nti, nkre ƀư, nô lĕ tĭng nti ăp jrô bổ túc, Trung cấp luật, Trung cấp Lý luận chính trị, jêng đảng viên. Tât aƀaơ, nô lĕ dơi săch ƀư âk nău kan kơt: Groi Bí thư Đoàn xă, Bí thư Đoàn xă Ia O n’hanh aƀaơ lah Kruanh UBMTTQ Việt Nam xă.

Âk năm lah Bí thư đoàn xă, nô Kpă Meo wât nkô̆ nău kônh wa ta ntŭk hôm e ach o lah yor mô kơt dŏng khoa học kỹ thuật an nkra njêng, hôm e mât rong tĭng nău way ơm kăl e. Yor nê, Kpă Meo ƀa ƀơ nkoch an ăp đoàn viên, druh ndăm tâm xă mpeh nău blău ơm nkra njêng tuch tăm gay kơt dŏng an ngăn, ndrel hun hao ƀư ndrŏng. Yuh Siu Nhi, Groi Bí thư Đoàn xă Ia O an gĭt:

“Tâm ăp nar rgum rƀŭn tâm thôn ƀon nô Kpă Meo way nkoch đah druh ndăm, kônh wa tâm ƀon ăp ntrong kan hun hao wăng sa, gay druh ndăm geh trong ndâk njêng m’hâm ƀư an săk rnglăy ngăn”.

Rnăk wâl nô Kpă Luyn, nuĭh ndrel ƀon, knơm nti tĭng nô Kpă Meo ma lĕ tăm geh 3 sào mít, play khoar tâm srah ndrel gay hun hao wăng sa rnăk wâl. Nô Kpă Luyn an gĭt:

“Bah ăp nău wât bâh nơm tâm hun hao wăng sa nô Kpă Meo way nkoch đah kônh wa, lah mô gĭt ri nô mbra dŭt n’hâm ntĭm an kônh wa gĭt trong tăm ăp ntil tơm sa play, m’hâm ƀư geh săk rnglăy ngăn bah ăp ntil tơm tăm gay hun hao wăng sa rnăk wâl”.

Nsing nơm dơi ndâk njêng bah rnôk ƀư pah kan đoàn, aƀaơ Kruanh UBMTTQ Việt Nam xă Ia O, nô Kpă Meo dôl ƀư dŭt âk nău kan bah nơm. Nô Ngô Văn Trường, Kruanh UBND xă Ia O uănh lah: Đah nău kan dơi jao, Kpă Meo ƀa ƀơ ƀư ăp nar nkoch trêng, rgŏ jă ƀon lan xă Ia O ƀư tĭng di nău ntrŭnh, trong hăn bah Đảng n’hanh Ngih dak, nô hôm tât ăp rnăk rgŏ jă kônh wa mĭn ƀư sa, hun hao wăng sa, mô djăt tĭng nău nsŭk  nsôr ƀư roh tâm rnglăp tâm ntŭk gŭ rêh. Nô Ngô Văn Trường, an gĭt:

“Mpeh đah ƀon lan geh uănh lah đŏng, nô Kpă Meo geh nău wât dŭt n’hâm, dơi gĭt ntŭk tăch rgâl, rgâl ăp ntrong kan tâm hun hao wăng sa na nê̆ kơt tuch tăm n’hanh mât rong, nsĭt geh an rnăk wâk dŭt âk. Aơ lah ntrong kan bôk năp mô knŭng kônh wa rnoi mpôl đêt ta ntŭk, ma du đêt rnăk nuĭh yuăn an nti gay geh trong nchrŏng tâm nău hun hao wăng sa.