Ta năm 35, Đặng Dương Hoàng Minh lĕ nuĭh tơm bah lŏ mir Thiên Nông hvi rlău 50 ha ta nkuăl Bù Gia Mập, n’gor Bình Phước, tâm nĕ geh 12ha tăm bơ Mã Dưỡng (du ntil kah bah Bình Phước), hôm ƀa ƀă lah cao su n’hanh tiêu. Đah săk geh rĭng 100 tấn/năm, rnoh khlay tăch 70.000-90.000 prăk/kg, du năm mir bơ nsĭt tay an Hoàng geh prăk rlău 6 rmen prăk jêh nkŭp prăk dŏng. Play bơ Mã Dưỡng ta Mir Thiên Nông mô knŭng tăch ta ntŭk tăch tâm dak ma hôm dơi tăch n’gluh an Lào, Campuchia, Đài Loan, Trung Quốc, Nhật Bản. Aƀaơ, Hoàng dôl boăt nthoi, pơk hvi ntŭk tăch an châu Âu. Gay dơi geh lôch uĕh kơt aƀaơ n’hanh an play bơ Việt hăn ngai, “nuĭh njêng” moh êng “bơ Ông Hoàng” lĕ rlet rlău âk jêr jŏt rnôk “ntlơi nkual ƀon têh sĭt ƀon”.

Hoàng nkoch tay, nar bah năp rnăk wâl nô knŭng tăm cao su n’hanh tiêu. Gĭt saơ bơ Mã Dưỡng lah ntil tơm geh âk wăng sa n’hanh nsĭt tay lah uĕh kah bah Bình Phước jêng bơ̆ bah Hoàng rgâl an tăm bơ. Rnôk nkra neh ri nuĭh bŏ roh ndal. Năm 2016, jêh rnôk hăn nti ta Pháp plơ̆ sĭt, Hoàng an mĭn njêng tăm bơ Mã Dưỡng, nthoi tay lôch jêh nău ŭch bah bơ̆.  

Nkoch mpeh trong hăn ndơ̆ play bơ Việt hăn ăp dak, bônh ăp nuĭh jêr nuih, Hoàng an gĭt, mir bơ bah rnăk wâl dơi kơt dŏng công nghệ Blockchain gay joi tu tơm. Ta ăp ntŭk tăch rgâl điện tử, năch rwăt knŭng quét mã QR mbra dơi gĭt nău mbơh mir, tâm rnôk tăm, ntil phân dŏng, nar pĕ n’hanh nchăm ndơ. Aơ lah njoat hăn kơl ndơ moh êng “Bơ Ông Hoàng” tât na nê̆ ty nuĭh dŏng, pơk hvi ntŭk tăch mô tă nuĭh rwăt. Hoàng nkoch:

 “Na nê̆ trong hăn lŏ mir kloh uĕh, sa gay mô geh kop ji lah trong hăn dŭt khlay bah nuĭh dŏng, dôl dơi âk nuĭh joi wơt. Yơn lah, ƀư lŏ mir hữu cơ ma mô gĭt trong ƀư lŏ mir mrô, mô lah mô gĭt trong ƀư lŏ mir mrô ri he roh dơi boăt nthoi đah nuĭh dŏng. Nău tâm rgop lŏ mir mrô n’hanh lŏ mir hữu cơ kơl nuĭh dŏng dơi groi nđôi bah ngai, kloh rah wah trong nkra njêng, tâm rnôk tăm bah tơm, mât njrăng nău moh êng, ndâk njêng ndơ moh êng”.

Rnôk ƀư lŏ mir, Hoàng mô tĭng trong way ơm, ma kơt dŏng lĕ rngôch công nghệ, ndơn soan nuĭh. Lĕ rngôch ntŭk lŏ mir dơi nglăp ndơ cảm biến, tâm rgop trong tŏ ntruh n’hanh cheh phân luh êng nglăp tât tĭng tơm bơ. Tă bah dŏng Internet nthoi ăp ntil (ioT), lĕ rngôch ăp dữ liệu mpeh rnoh nđik bah neh, rnoh dak tŏ n’hanh tâm rnôk hao têh bah tơm tăm dơi joi uănh tă bah cảm biến n’hanh njuăl tât điện thoại gay ăp nuĭh mĭn rblang n’hanh ndơ̆ nău mbơh lor, ntrŭt đă gay nuĭh dŏng an mât chăm, pĕ tơm tăm m’hâm an tâm di. Nuĭh tăm mbra ntêm nkrem geh 80% dak tŏ, 40% phân poh, dak si.

Ntrong kan mrô tâm lŏ mir bah Hoàng nsĭt geh lôch uĕh âk n’hanh dơi âk nuĭh uănh tât. Aƀaơ lĕ geh dŭt âk nuĭh ƀon lan ta Bình Phước ndrel râng pơk hvi rnoh neh tăm bơ Mã Dưỡng hao 200ha. Hoàng an lah, tâm lŏ mir “ŭch hăn ngai ri an hăn ndrel” jêng nô ŭch tâm pă trong ƀư an ăp nuĭh. Nău mĭn nĕ bah Hoàng dơi bu urr doanh nhân Nguyễn Thị Thành Thực kơl n’hanh rgop ndâk njêng hợp tác xã lŏ mir mrô, rgum 12 nuĭh ndrel nău mĭn, bah nĕ, Hợp tác xã Lŏ mir mrô Bình Phước lĕ luh tâm khay 6/2022. Aơ lah ngoăy tâm âk ntŭk kan bôk năp bah n’gor Bình Phước ƀư rgâl mrô tâm lŏ mir. Hoàng dơi săch ƀư Giám đốc.

Đah nău ƀư tơm lah Giám đốc Hợp tác xã, Hoàng lĕ ntuh kơl n’hanh jao an công nghệ an âk doanh nghiệp. Bah nĕ ndâk njêng trong sinh thái đah uĕh n’hanh trong mât chăm uĕh, kơl an kônh wa ndrel geh prăk gay rgâl nău rêh, lơn lah dơi djôt ndơ lŏ mir bah Việt Nam hăn ngai. Nô Nguyễn Minh Hiếu, nuĭh tơm bah Gia Bảo Ecofarm ta nkual têh Phước Long, Groi giám đốc Hợp tác xã lŏ mir mrô Bình Phước uănh lah:

 “Hoàng geh âk nău kan công nghệ thông tin. Hoàng dŭt ngăch đah ăp nău rgâl mhe jêng lĕ ntĭm oh nô, kơt boăt nthoi tơm nău mhe gay m’hâm ƀư an nău mrô têh dăng, ngăch lơn”.

Aƀaơ, ăp nuĭh Hợp tác xã dơi ntĭm dŏng app AutoAgri, ndơ lŏ mir an dơi mât chăm tĭng trong nsum. Uĕh kah ndơ lŏ mir mô geh mô tâm ban jêng nău tăch luh ntŭk tăch tâm dak n’hanh dak bah dih dơh lơn. Tâm nău ƀư Giám đốc Hợp tác xã lŏ mir mrô Bình Phước, Hoàng mĭn râng ăp rbŭn nchră, rgum nchră boăt nthoi nuĭh rwăt đah ăp doanh nghiệp tâm n’hanh dak bah dih, rgop mpla nsơp rup ndah lŏ mir Bình Phước n’hanh joi ntŭk tăch gay kơl du đêt nuĭh ƀon lan, doanh nghiệp joi trong luh an ndơ lŏ mir ta ntŭk. Mhe aơ ngăn, Hoàng lĕ dâk boăt nthoi gay ăp nuĭh tâm hợp tác xã dơi geh mrô nkual tăm sầu riêng tăch n’gluh an Trung Quốc. Rlău 12 nuĭh hợp tác xã, nô Hoàng hôm tâm pă dơm app AutoAgri tât 1.500 rnăk ƀon lan tâm n’gor Bình Phước. Tât aƀaơ, âk jay mir lĕ dơi gĭt trong kan bah Hoàng n’hanh ntơm geh âk nău ƀư lôch uĕh.

Wa Trần Quốc Duy, Giám đốc Ntŭk ntrŭt ngăch ntuh kơl tăch rgâl n’hanh pâl nđaih n’gor Bình Phước an gĭt, ntŭk lŏ mir bơ bah Hoàng lah ngoăy tâm âk ntrong kan lŏ mir gĭt blău mhe ta Bình Phước. Hoàng lĕ nchrăp lor boăt nthoi, ntop kơl, tâm rgâl nău blău ơm an druh ndăm ta ntŭk rdâk njêng nău kan tĭng app kơt dŏng công nghệ. Gay geh du trong sinh thái rdâk njêng nău kan tâm di, kơl mpôl druh ndăm janh rgâl mhe, mĭn mhe, aƀaơ Ntŭk kan dôl n’hanh Hoàng ƀư tĭng âk trong. wa Duy an gĭt:

 “Tât aƀaơ, mpôl hên dôl hăn ndrel ta trong rêng hvi ăp nău mbơh ŭch rŏng tât druh ndăm, kơl ƀon lan nkual jru, ndrel rgop soan an hệ sinh thái rgâl mhe ê nkra đah ăp trong ƀư na nê̆. Ntĭt nsa kơt boăt nthoi đah ăp nuĭh way kan nkoch tay ăp nău mĭn, naư mbơh, mô lah jao an khoa học công nghệ. Bah nĕ m’hâm ƀư an lŏ mir Bình Phước hun hao n’hanh hăn ndrel djôt rup ndah ndơ lŏ mir Việt tât ăp dak ta lam ntŭr neh n’hanh tâm nkual”.

Bah âk trong ƀư mhe, rgâl mhe, ntrong kan tăm bơ bah Hoàng dơi tâm di VietGap, dơi dơn âk ndơ nkhôm bah ăp n’gâng kan, nău kan. Hoàng dơi an ndơ nkhôm Lương Định Của năm 2021 yor Trung ương Đoàn an.

Aƀaơ, Hoàng hôm lah Chủ nhiệm mạng lưới Lương Định Của lam dak. Đah nău ƀư aơ, Hoàng ƀa ƀơ ndrel ăp “nuĭh Lương Định Của” boăt nthoi, ntop kơl druh ndăm thôn ƀon rdâk njêng nău kan tĭng trong công nghệ 4.0. Đah nău ŭch, nuih n’hâm janh, mô rlu joi, mĭn ƀư mhe n’hanh rgâl mhe, bu klô kỹ sư nti nău kan ta Pháp ƀư âk nuĭh ryơk đah nău ntrŭnh kăl e bah nơm, rnôk nô săch sĭt ƀon tơm ndâk njêng, rgop ndơ̆ ndơ lŏ mir Việt hăn ngai./.