VOV4.M’nông- Ndơ tuch tăm lah ntil ndơ tăch an dak bah dih tơm bâh n’gor Gia Lai, đah rnoh khlăy geh prăk tăch an dak bah dih 500 rkeh đôlar ăp năm n’hanh dôl mô rlu hun hao. Nău aơ dơi geh lah yor âk năm ba năp, n’gor lĕ geh uănh khlăy nau rdâk njêng, pơk trong ta ăp nkual mât tăm tĭng ăp nău mpŏng kan geh kơp dơn.

Tĭng nău mbơh tơih bâh ntŭk kan tuch tăm mât rong n’hanh hun hao ƀon lan n’gor Gia Lai, aƀaơ lĕ rnoh neh srĭh tăm lam n’gor geh klâp ma 557.700ha. Tâm nĕ, geh 230 rbăn ha, tâm ban dah 41% rnoh neh, geh ƀư tĭng ăp nău mpŏng kan kơt lah VietGAP, GlobalGAP, 4C, organic, Rainffores Allinace. Wa Lưu Trung Nghĩa- Giám đốc ntŭk kan tuch tăm mât rong n’hanh hun hao ƀon lan n’gor Gia Lai an gĭt, du đê̆ ntil ndơ kơt lah cà phê, chanh rse bâh n’gor lĕ geh ăp ntŭk kan tăch rgâl khăch khoch dơn rvăt kơt Nhật Bản, EU.Tĭng nău nchrăp, lvang năm 2022-2025, n’gor mbra n’hao rnoh neh tăm tĭng nău mpŏng geh kơp dơn klâp ma 5 rbăn ha/năm, n’hao nău ueh di ndơ tăm kơl an tăch dak bah dih gay ma n’hao nău geh an ƀon lan.

VOV Tây Nguyên/Nuĭh rblang: Thị Đoắt