VOV4.M’nông: Tâm nar rƀŭn mbơh geh tâm kêng măng 3/10, ta Hà Nội, Kruanh N’gâng kan tuch tăm ndrel hun hao ƀon lan Phùng Đức Tiến lah rjăp, mra rgum ăp nau kan mpeh ntŭk ntu tăch rgâl nsôih nkô̆ nau 50 rmen đôla rnoh prăk tăch luh ndơ tuch tăm si gle tâm năm aơ. Bah 9 khay, nau kan tuch tăm lŏ mât tâm nau hun hao ueh ndrel geh nau dơi hun hao bah ăp ntil ndơ tuch tăm tăch luh tơm. Rđil đah rơh aơ tâm năm e rnoh geh prăk tăch luh ndơ tuch tăm, tui ka bah rlau 9 khay ha0 15,2%, nchrăp geh nklăp 40,8 rmen đôla Mỹ, rmôt ndoh ndơ tuch tăm ndrel si gle tơm, tui ka kŏ hao. Tât rnôk aơ hŏ geh 7 ntil ndơ mra geh rnoh tăch luh âk lơn 2 rmen đôla Mỹ. Rƀŏng tât nkô̆ nau rnoh geh tăch luh ndơ tuch tăm si gle geh 50 rmen đôla Mỹ tâm năm aơ, tâm ăp khay dŭt năm, N’gâng kan tuch tăm ndrel hun hao ƀon lan mra ntrŭt dăng nau ndâk tay nau kan, n’hao nau geh jêng, nau nâp, nau săk tam tuch tăm, tăch rgâl, ntĭm nti, rƀŏng ăp nkuăl ngăn lah ăp nkuăl tơm mpeh nau srih tăm ba, mât rong mpa, tui ka geh rnoh dơi nau kan tuch tăm ân tâm di đah ntŭk ŭch tăch rgâl./.

VOV/Nŭih rblang: H’Thi