VOV4.M’nông- Dŭt khay 8 mhe nơh, hội liên hiệp mom ndăm Việt Nam n’gor Dak Lăk ƀư rơh tâm mâp nău ŭch rŏng mom ndăm. Ta rơh tâm mâp, ăp mpôl đoàn viên mom ndăm lĕ mbơh na nê̆ âk nău geh tât njêng nău kan, ƀư nău kan n’hanh ăp nkô̆ nău geh tât gay ma hun hao ntŭk leo kan đoàn, hội, tâm rnglăp, rgum geh âk mom ndăm tât râng/.

          Ta rơh tâm mâp, ăp đoàn viên mom ndăm lĕ tâm mbơh âk nkô̆ nău kan: kơt lah tâm mbơh ăp nău kan ueh, trong kan di, săk rnglăy, mĭn kan mhe bâh mom ndăm ta ăp ntŭk, ăp n’gâng kan tâm rgop vơt rhơn geh nău dơi Đại hội Đoàn ăp gâl. mbơh nău mĭn n’hanh nău ŭch rŏng nơm, rơh kan bâh mom ndăm ba năp, tâm n’banh lôch Đại hội Đoàn ăp gâl n’hanh ta năp Đại hội Đoàn lam n’gor n’hanh lam dak tal 12, năm kan 2022-2027. Nkoch mbơh nău mĭn nơm, nău dơn kan bâh mom ndăm ta rơh mhe.

       Ăp đại biểu lĕ rjăp jăp tâm mbơh: tâm rnôk ba năp, nău hun hao leo kan đoàn, hội ta ăp ntŭk lĕ geh mât uănh, ntŭk kan đoàn lĕ mpơl nău kan tâm ăp nău pah kan jan sa, nău kan ta ntŭk, mpơl nău hăn lor bôk năp, nău kơl kan bâh mom ndăm. Yơn lah, ta du đê̆ ntŭk ƀon lan gŭ, nău tâm rnglăp, rgum kan mom ndăm hôm nha mô nă geh, nău kan đoàn hôm nha mbrơi, ê hŏ geh n’hao săk rnglăy n’hao rgum mom ndăm tât râng. Nô Nguyễn Văn Thành, ta thôn 7, xã Ea Kiết, nkuăl Cư Mgar lah na nê̆ nău ngăn.

          Ăp nuĭh đoàn viên mom ndăm tâm thôn di năm ma têh rĭ kơt lah mô hôm tât râng rgum pâl, hôm nuĭh di năm ma dôl lah kon hoc rĭ geh du đê̆ oh tât râng yơn lah he jă jêr đŏng. Aƀaơ kuăl jă ăp oh rĭ jă bâh loa đài mô lah ta facebook. lôch nĕ he geh tâm mâp đah ăp oh rĭ ăp oh rhơn yơn ma mô nă geh âk nuĭh tât râng”.

       Ta năp nău ngăn aơ, âk nuĭh đoàn viên lĕ nkoch trong kan geh săk rnglăy ta ntŭk kan nơm. Tĭng nĕ, gay ma an đoàn viên tâm rnglăp, rgum mom ndăm geh săk rnglăy rĭ an geh gĭt na nê̆ nău rŏng, nău ŭch bâh đoàn viên mom ndăm, gĭt vât mơh nău khân păng ŭch n’hanh mơh nău gay ma dơi geh rnôk tât râng ta ntŭk kan đoàn, hội. Nău ngăn, aƀaơ yor nău wăng sa, mpôl kan đoàn viên mom ndăm hăn pah kan ngai dŭt âk ƀư khuch tât nău tâm rnglăp rgum mom ndăm mô lah hun hao nău kan đoàn hội ta ăp ntŭk ƀon lan gŭ. Yor nĕ, âk đại biểu an lah, gay ma tâm rnglăp rgum mom ndăm, an geh tâm rgop ndrel đah nău kan đoàn đah ăp nău njêng pah kan, njêng nău kan n’hanh hun hao wămng sa ta ntŭk. Nô Lê Công Nhận, ta thôn Tân Tiến, xã Ea Na, nkuăl Krông Ana mbơh na nê̆:

Ŭch nău kan mom ndăm ta ntŭk hun hao têh dăng rĭ he an geh hun hao ntơm nău pah kan, mhâm ƀư an mom ndăm gŭ tay gay ma rdâk njêng ƀon lan, hun hao wăng sa ta ntŭk an hun hao mơ dơi geh du nău kan têh dăng. Gay ma hun hao mpeh wăng sa, he an geh ăp ntrong kan, ăp ntŭk he an geh ntuh kơl ta du hê nuĭh kan, kơl an khân păng, lôch nĕ geh nău dơi rĭ khân păng mbra trĕ lam nău kan nĕ an ăp đoàn viên mom ndăm êng, bâh nĕ mơ njêng nău kan mpeh wăng sa an geh ƀư âk.

Nuĭh rblang: Thị Đoắt