VOV4.M’nông: Việt Nam lĕ geh âk ndơ Fine Robusta (cà phê kah) dơi lam ntŭr neh kơp dơn, ri an geh ăp nuĭh wâr blău gay ndơ̆ ăp ndơ aơ tât đah âk nuĭh dŏng. Aơ lah trong uănh ma Hiệp hội cà phê Buôn Ma Thuột rƀŏng tât tă bah rơh tâm rlong wâr cà phê Việt Nam năm 2022 dơi ƀư mhe aơ ta Dak Lak.

Rơh tâm rlong wâr cà phê Việt Nam 2022 (Vietnam Amazing Roast Master 2022) yor Hiệp hội Cà phê Buôn Ma Thuột ƀư lah nău khlay dơi nsum mpôl cà phê tâm lam dak uănh tât. Yor aơ lah rơh tâm rlong bôk năp dơi ƀư ta Việt Nam đah têh gưl lam dak gay jêng “ntŭk pâl” an nsum mpôl cà phê n’hanh ntơm jêng du rmôt wâr cà phê blău gưl lam ntŭr neh, lơn lah đah cà phê Robusta. Nuĭh tâm rlong Đoàn Tuấn Nhật tât bah n’gor Lâm Đồng an gĭt:

“Râng rơh tâm rlong aơ saơ geh âk nău gĭt têh, dŭt lăp jru. Lah du hê nuĭh wâr ri rơh tâm rlong aơ an uănh lăp nău uĕh nglăy pŭt bah ndơ ƀư ăp ndơ geh tâm rnglăy gay he wâr ŭch sŏk pơng luh. Jêh nĕ tay rnôk wâr geh ndơ he an mpli gay uănh tay he lĕ wâr dơi geh pơng di tâm play cà phê nglăy đŏng lah mô. Du hê wâr blău, jêng lah dơi an lah ndơ bah năp n’hanh bah kơi rnôk wâr ăp nău aơ geh tâm nău tâm rlong da dê”.

Nuĭh tâm rlong uănh lah ntil rlăy cà phê pŭt lor rnôk wâr

Tâm 4 nar (bah nar 6 tât 9/10), 35 nuĭh tâm rlong tât bah 13 n’gor nkual ƀon têh lam dak lĕ rlet rlău ăp nkô̆ nău tâm rlong, geh: Uănh lah ntil ndơ rnglăy pŭt; ƀư bên đah măy wâr, ndoh ndơ, play cà phê; ƀư wâr; mpli, nkoch mpeh ndơ. Nuĭh tâm rlong Nguyễn Thị Thu Hương, tât bah n’gor Dak Nông nkoch, bah năp đaơ ăp rơh tâm rlong uănh mpeh nău blău âk yơn rơh tâm rlong aơ hôm geh nkô̆ nău nuĭh dŏng n’hanh n’hao ndơ cà phê kah Việt Nam, ndơ way dŏng bah nuĭh Việt Nam. Yor rĭ, râng rơh tâm rlong aơ, nuĭh wâr mô knŭng ƀư tơm ƀư ƀô kah ma nkoch pơng tât đah nuĭh dŏng kơt gĭt uănh lah săk rnglăy ndơ wâr bah he.

“Aƀaơ hin, cà phê bah Việt Nam dôl rgâl dŭt uĕh mpeh đah uĕh kah, yor rĭ tĭng nău ŭch bah nuĭh dŏng dơi hun hao du trong na nê̆. Khân pơng ŭch ngêt đah ƀô kah kơt ŭch mĭn joi gĭt ăp nău uĕh di mpeh cà phê kloh, ăp nău mbơh geh tât tu tơm ndơ dŏng... Nău ngăn aơ lah dơi geh dŭt têh gay gâp dơi rgâl ƀô kah tâm rnôk ƀư cà phê bah gâp n’hao uĕh kah rhŏ an năch bah gâp hao”.

Nuĭh tâm rlong ƀĭt joet di duh tâm rnôk wâr cà phê.

Tĭng wa Lê Đức Huy, Tổng Giám đốc Công ty Simexco Dak Lak, Groi Kruanh Hiệp hội Cà phê Buôn Ma Thuột, dŏng cà phê Việt Nam lĕ geh jŏ bah kăl e hang rhiăng năm ndrel đah rnôk hunhao bah tơm cà phê. Tât aƀaơ hin Việt Nam lĕ dơi tĭng ăp nău ŭch, nău blău công nghệ wâr bah lam ntŭr neh, ăp ndơ mhe ngăn đah công nghệ lĕ geh ta Việt Nam đŏng. Yơn lah ndoh ndơ măy mŏk mô dơi rgâl kon nuĭh, yor ntŭk luh ndơ cà phê lah dŭt âk jêng an geh ăp kon nuĭh dơi ntĭm nti uĕh, blău, dŏng măy wâr blău mư dơi luh ndơ cà phê uĕh kah ngăn. Wa Lê Đức Huy mĭn lah:

“Tâm trong bah he ndơ geh bah nuĭh ƀon lan geh ndơ ri ăp nuĭh dŏng an gĭt n’hao prêh ndơ nĕ. Nuĭh wâr lah nuĭh ƀư dơn ndơ cà phê rlăy aơ, jêng gay hun hao tay ntŭk tăch đŏng lah mô he hun hao nuĭh pă ndơ ma an hun hao nău ŭch dŏng tay. He djăt nkra njêng ndơ kah âk n’glêh dŭt mô gĭt dŏng ri plơ̆ tay nău ndơ âk rlău nău ŭch dŏng rnoh khlay jŭr thuk”.

Rơh tâm rlong wâr cà phê Việt Nam mô knŭng rnê rhơn ăp nuĭh wâr blău ma hôm rnê rhơn ăp grăp cà phê Rousta Việt Nam hao prêh. Aơ lah trong hăn tay ma ăp nuĭh nuih n’hâm đah nău kan cà phê ŭch rƀŏng tât gay mĭn lah Việt Nam mô knŭng dơi nkra njêng cà phê kah ma hôm gĭt dŏng, ngêt cà phê kah nkra njêng jru./.

Hương Lý VOV Tây Nguyên

Nuĭh rblang: Y Sưng Phê Ja