VOV4.M’nông: Lơ 17/9 mhe rlau aơ, tâm nkuăl Krông Păk, n’gor Dak Lak ƀư nau mbơh tăch luh rơh bôk năp sầu riêng tĭng trong ƀư nau tâm boh kan nsum đah N’gâng kan tuch tăm ndrel Hun hao Việt Nam n’hanh N’gâng kan Hải quan Trung Quốc. Nau kan pơk luh nau ueh têh ân ntŭk kan tăm sầu riêng bah Việt Nam geh tăch luh ngăn tâm ntŭk kan tăch rgâl ndơ têh ngăn lam ntur neh.

            Rơh bôk năp sầu riêng bah Việt Nam geh tăch tĭng trong nchrăp kan tĭng nau ntrŭnh ký ton đah N’gâng kan tuch tăm ndrel Hun hao ƀon lan Việt Nam ndrel N’gâng kan Hải quan Trung Quốc lah rlau 300 tấn geh tăm tâm n’gor Dak Lak. Aơ lah n’gor geh rnoh tăm sầu riêng âk tal bar lam dak (ba kơi Tiền Giang) đah nklăp 15 rbăn ha, rnoh geh năm 2022 geh nklăp 170 rbăn tấn.

            Wa Y’Giang Gry Niê Knơng, Groi kruanh UBND n’gor Dak Lak rhơn mbơh, rnôk aơ n’gor geh N’gâng kan Hải quan Trung Quốc ân ƀư dŏng 4 mrô gay ma tâl tâm dŭng sầu riêng ndrel 23 mrô nkuăl geh tăm (geh n’gul rnoh mrô nkuăl tăm tâm lam dak geh dơi dŏng ân). Ndrel đah nau nsôih bah N’gâng kan tuch tăm ndrel hun hao ƀon lan tâm nau tâm nchră, nau tă geh dơi aơ nkah ăp nau nsôih têh ngăn bah rmôt nŭih pah kan lŏ mir, ntŭk kan bah n’gor:

            ‘Gay geh ăp bôk ndeh sầu riêng bôk năp tăch tĭng trong sŏng geh mbơh tâm nar rgum nar aơ ri ăp nkuăl, ăp ntŭk ƀư nau tâk nklâm sầu riêng hŏ nchrăp ndrel rlet âk trong ƀư nau kan mêt uănh bah ntŭk ƀư nau kan aơ bah lĕ 2 dak, tŏng dơi nau đă mpeh nau nkân uănh ndơ bu tuh chuh sa, đăp mpăn kloh ndơ sa, ƀư tâm di nau ntrŭnh đă mpeh nau tâl dŭng ndrel đăp mpăn geh kloh tu tơm”.

            Ntoh nau tâm nar rgum, Kruanh n’gâng kan tuch tăm ndrel Hun hao ƀon lan Lê Minh Hoan lah rjăp, Nau ntrŭnh mpeh nau đă geh mêt uănh ân kloh geh kí ton tâm lơ 11/7/2022 đah N’gâng kan tuch tăm ndrel hun hao ƀon lan Việt Nam ndrel N’gâng kan Hải quan Trung Quốc lah nau tă geh dơi bah nau nsôih tâm nchră bah âk khay bah ăp ntŭk ƀư nau kan đah 2 ding. Ndrel ma nê lah nau hăn nsum ƀư kan bah nsum mpôl ăp nŭih tuch tăm ndrel tăch luh sầu riêng Việt Nam.

            Kruanh n’gâng kan lah rjăp, nau ƀư kan tăch luh sầu riêng bôk năp geh ƀư ngăn lah nau rhơn nsum bah nŭih ƀon lan nkuăl Tây Nam Bộ, Đông nam Bộ ndrel Tây Nguyên. Aơ lah nau kan khlay ngăn yor lah Trung Quốc lah dak sa âk play sầu riêng ngăn bah lam ntur neh. Ndrel đah nau geh tăch tâm ntŭk aka nŭih rvăt sa, kơl an nau kan tuch tăm ndrel ƀon lan geh săk rnglay văng sa lơn tă bah ntil play aơ, tăch luh du trong sŏng kŏ ndŏ luh nau ntul rlong têh yor ăp nkô̆ bah nau ntrŭnh aơ ngăn lah ăp nau đă mpeh nau ƀư nau kan nchâp đă bah ding tăm, tâl dŭng ndrel tăch luh ân geh kơt tĭng. Kruanh n’gâng kan Lê Minh Hoan lah rjăp:

            ‘Tâm rnôk lam ntur neh ƀư nau kan ndrel tuch tăm ndrih, văng sa tâm nthoi rnôk aơ, nau mĭn “hăn nsum” nê lah nau nchâp đă. Play sầu riêng mô lah du ntil play êng êng lah ŭch hăn tăch ngai, njêng ntŭk tăch ân nâp, ri ăp nŭih tâm ntrong ƀư nau kan tuch tăm ân geh nsum n’hâm, tâm boh ndrel ma hăn nsum”.

            Tĭng N’gâng kan tuch tăm, rnoh geh neh tăm sầu riêng bah dak nơm rnôk aơ geh bơi tât 90 rbăn ha đah rnoh ndơ ăp năm nklăp 1,3 rkeh tấn play, geh tăm ngăn lah tâm Đông Nam Bộ ndrel Tây Nguyên ndrel Đồng Bằng sông Cửu Long. Ntil play sầu riêng bah Việt Nam geh nkoch lah geh rnoh văng sa prêh. Nau kan geh tăch luh n’ho ro lah nau ueh nkhâp đah play sầu riêng rih ndrel mpŏng mra geh tŏng dơi nau tâm nchră ngăn gay ma pơk trong ân ăp ntŭk kan tăch luh play êng êng bah Việt Nam tâm rơh tât./.

Nŭih rblang: H’Thi