Ntơm bah ăp nuĭh geh nđơr gân djăng đah khoa học công nghệ n’hanh deh luh bah miền tây dâng sre, gĭt ăp nău jêr jŏt bah nuĭh ƀon lan, rmôt druh ndăm nhih nti Đại học Công nghiệp nkual ƀon têh Hồ Chí Minh hŏ njêng luh trong nchrăp kan “trong nkra jâng tuch tăm kloh uĕh”(ECO-HOUSE) gay kơl nuĭh ƀon lan mbra dŏng công nghệ ta lĕ rngôch ăp ntŭk gŭ gay mât uănh dơi ăp nău tât khay tuch tăm. Aơ lah trong nchrăp kan geh ndơ nkhôm rnê dâk bôk năp sinh viên tâm rơh tâm rlong “Kon se nti, sinh viên đah nău mĭn ntơm njêng nău kan” tâl V tă bah Bộ Giáo dục n’hanh Đào tạo ƀư.         

 Trong nchrăp kan ECO-HOUSE dơi 3 sinh viên mpeh 3 rnâng kan êng êng lah Hồ Thanh Huy, kruanh rmôt, sinh viên năm 4 khoa Công nghệ điện tử, Lê Hoàng Minh Châu - năm 4 khoa Quản trị kinh doanh n’hanh Trần Thị Trâm (năm 3 khoa Thương mại - Du lịch) ta nâm nău ntĭm nti bah Thạc sĩ Thái Duy Tùng (giảng viên khoa Tài chính ngân hàng) ƀư. Ntôn tâm ban kơt 3 n’gâng kan ntĭm nti mô geh nău tât nsum, yơn 3 sinh viên hŏ tâm ntop tay gay njêng luh du trong nchrăp ntơm njêng nău kan tâm trong tuch tăm, tui ka, si gle.

        Ndơ geh njêng luh bah rmôt lah ndơ pet jê̆ n’gân ta mir nkre đah  dŏng ndơ pet bah ngai ta điện thoại, tâm nê rgum mât kân  ăp rnoh weh năl khlay kơt duh nđik, l’ĭt mbĕ, rnoh âk dak, ndơ uĕh jêng tâm neh, rnoh âk N-P-K, độ pH,... Ntơm bah nê gay gĭt năl nkô̆ nău tât ndal n’hanh lor nchrăp mbơh njrăng lor nkra năn ngăch, hŭch bah nău tât rmoh rman an nuĭh kan tuch tăm, rdâng lơh đah rgâl trôk nar, n’hao săk geh n’hanh mpêt nkrem điện, dak,…

        Sinh viên Hồ Thanh Huy an gĭt, lôch hăn ôp uănh, ăp nuĭh tơm mir, nuĭh ƀon lan aƀaơ dôl nkoch n’hơ ăp ndơ geh ƀư tơm luh bah Trung Quốc, mô geh ton nâp uĕh n’hanh dêh bên đah nuĭh kan lŏ mir. Yor kơt nê̆ rmôt mpôl hên hŏ njêng luh ndơ pet dŏng dơh lơn, dăch dêh ma lĕ dĭng nuĭh blău dŏng da dê. Ăp băl gĭt êng lah he ân ndăn dŏng ăp nău gĭt blău hŏ dơi kơt nti gay dŏng công nghệ cao tâm nău kan tuch tăm, kơl an kônh wa n’hao rnoh khlay ndơ tuch tăm  der bah jŭr geh play, rnoh khlay hŭch thuk, bu mpet rvăt. Thanh Huy nkoch:

        “Mpôl hên deh luh bah rnăk wâl me bơ̆ kan lŏ mir, deh luh n’hanh têh jêng ta miền Tây, mpôl hên mô ƀư nău kan tuch tăm yơn mpôl hên wât dơi, n’hanh gĭt dơi trong ƀư tuch tăm mhâm ƀư. Bah meng nê gâp hôm geh băl nti n’gâng kan tuch tăm, ăp băl mbra ntop kơl mpôl hên gay ndơ̆ luh ndơ geh ƀư kơl an kônh wa ƀon lan. Jêng mpôl hăn lăp tâm trong der gay joi trong ta ntŭk he nơm”.

        Nsing tâm nău nchih nkah tuch tăm, ECO-HOUSE mbra ndơ̆ luh ăp trong nkra “tuch tăm kloh uĕh mô klach mbơh kloh rvah” nsing ta công nghệ mhe IoAT (Internet vạn vật) đah âk ntil trong sơch. Na nê̆ trong nchrăp nkre đah rnoh tât “Ngoăy dak, bar phân, pe jăp gơih nău kan" tâm ban lah ăp trong nkra mpeh mpêt nkrem dak tŏ, groi nđôi uĕh jêng neh mô lah lam lĕ rngôch nđăp ma mpêt nkrem, ndơ sa jêng an tơm tăm, trong nkra lam lĕ rngôch an tơm tăm geh tĭng rnoh khlay tâm di nkre đah prăk kaih n’hanh nău ŭch geh bah nuĭh tơm mir.

       Sinh viên Lê Hoàng Minh Châu nuĭh râng tâm rmôt nkoch, mpôl hên rƀŏng tât nuĭh ƀon lan kan lŏ mir n’hanh ăp hợp tác xã, ta năp măt rlong đah du đêt ntil tơm kơt sầu riêng, táo, play bŭng ta Tiền Giang, Bến Tre n’hanh mir lan ta Vũng Tàu. Tâm rnôk tĭng ƀư, ăp băl mâp âk jêr jŏt đŏng kơt mô hŏ tă ơm gĭt kan mpeh ntŭk tăch rgâl, mô hŏ geh âk nău gĭt wât jru mpeh ntil tơm, jêng ăp băl joi gĭt lĕ ma rêng kan tuch tăm gay ndơ̆ luh ăp trong nkra dŭt uĕh:

        “Aƀaơ kônh wa dôl rnam mpeh nău dŏng, nău mĭn dŏng hŏ geh yơn nău rgâl lĕ rngôch bah ơm jêng mhe ri kônh wa dŭt klach. Ntơm bah nê mpôl hên ndơ̆ luh trong nkra lah nsing ta ăp nău ơm gay hun hao tay mô dơi jăng lĕ ăp nău ơm.”)

        Tĭng Thạc sĩ Thái Duy Tùng, giảng viên ntĭm nti đề tài, ntŭk êng bah trong nchrăp kan dja rđĭl đah âk đề tài êng lah nău ăp băl sinh viên hŏ tât dơi đah ngăn ngăn gay rlong trong ntĭt leo dŏng tĭng ntil neh, joi gĭt nău ŭch geh, nău way tuch tăm bah nuĭh ƀon lan. Bol ăp nuĭh râng mô geh chuyên môn mpeh tuch tăm yơn đah nău dơh tơm luh bah miền Tây, nkre đah nău tâm ôp rgâl nău gĭt mpeh tuch tăm n’hanh lĕ ma nău ntop kơl bah ăp sinh viên dôl nti n’gâng kan tuch tăm ta nhih nti Đại học Tiền Giang, ăp băl hŏ dơi geh kơt nar aơ:

        “Nkô̆ nău aƀaơ lah rnôk joi năch rvăt ri mâp du đêt jêr jŏt tă bah mô hŏ geh săk ntơ lư, yơn lah ăp băl geh âk trong tâm boh đah ăp ntŭk mât rong têh, mpŏng let năp tay ăp băl mbra mbrơi tât dơi đah ntŭk tăch rgâl dăch lơn.”)

        Đah trong nchrăp kan dja, rmôt ŭch rŏng hun hao n’hanh joi geh wăng sa bah âk tơm ndơ mô dơn bah ndơ geh ƀư njêng luh ma ngai lơn đŏng hôm mbơh nti weh ƀư n’hanh pă an trong nkra, bah ndơ tuch tăm nsĭt geh n’hanh ăp chế phẩm sinh học. ŭch rŏng bah lĕ ma rmôt lah n’hao rnoh khlay ndơ tuch tăm Việt, mbơh kloh ăp rnoh tât bah rêng tuch tăm gay nuĭh rvăt gĭt dơi ndơ geh tăm ta ah ntŭk, rnoh uĕh jêng neh mhâm jêng, geh rmeh dak si khêh tâm neh đŏng lah mô. Sinh viên Hồ Thanh Huy rhơn nđơr nkoch:

        “Mpôl hên way tâm nkoch rlưn lah ăp nuĭh hăn tăch biăp, mpôl hên tăch ndơ tuch tăm n’hanh geh công nghệ gay ntop kơl nău tăch ndơ tuch tăm dja, mpŏng mbra geh nău dơi n’hanh ntŭk tăch rgâl wơt dơn.”)

        TS Nguyễn Quốc Cường, Groi kruanh khoa Thương mại - Du lịch nhih nti Đại học Công nghiệp nkual ƀon têh Hồ Chí Minh uănh năl, aơ lah đề tài uĕh kơl  nuĭh ƀon lan kan lŏ mir mât chăm uĕh lơn tâm nkual bah he n’hanh mât njrăng ntŭk gŭ rêh, bah ir nde tâm phân poh, dak si ndrŭng:

        “Mpeh khoa, khoa mbra mbơh nti mpeh chuyên môn mbra ƀư lĕ n’hâm suan gay ăp băl ƀư tay trong nchrăp kan dja jêng doanh nghiệp spin-off nsĭt tay rnoh khlay ngăn ngăn ƀon lan, lơn lah mpôl hun hao tuch tăm tĭng trong rƀŏng kỹ thuật mhe.”)

        Ăp trong nchrăp ntơm njêng nău kan bah kon se  nti, sinh viên ŭch dơi “rêh” n’hanh hun hao lơn đŏng, ăp băl dŭt ŭch geh nău wơt dơn, ŭch tĭng n’hanh ntop kơl bah mô dơn nhih nti ma hôm bah lam rêh jêng kon nuĭh đŏng. Ntơm bah nê mbra chăt nar mpăr an âk lơn ăp đề tài ntơm njêng nău kan rgop an nău hun hao bah neh dak./.