VOV4.M’nông: Bah năm 2017 tât năm 2021, đah nău nsrôih bah lĕ trong chính trị n’hanh nuĭh ƀon lan, n’gor Gia Lai ta ƀư tăm 31. 000 ha bri, tĭng jêh uănh nđôi bah HĐND n’gor Gia Lai du đêt nkuăl, săk rnglăy bah nău tăm bri lvang aơ dŭt đêt, yor rnoh tăm bri khĭt âk, geh âk ntŭk rnoh tơm khĭt tât 90%.

Năm 2020, rnăk nô Jiao Klong n’hanh 300 rnăk ta Ia Srai, nkuăl Krông Pa dơi rgŏ jă tăm 417ha bri keo ta neh mir ơm lah neh bri. Tâm rnôk kâp keo têh, ăp rnăk hôm dŏng tăm tuich tay ba n’hanh bum gay geh ndơ sa. Jêh 2 năm, rlău 150ha keo lĕ khĭt ƀhiău, âk ha knŭng rêh bah dâng 50%. Kơt bri ma rnăk Jiao Klong tăm, rnoh rêh mô tŏng 10%, jêng mô dơi sŏk dŏng n’hanh trok prăk tăm bri:

“Mpôl hên geh nău nchrăp tăm tơm si yơn ma neh ta aơ dŭt jêr tăm bri, ta aơ lĕ sât blak moh ndơ tăm jêr aơ, đah ntp trôk nar ta nkual aơ duh mih ndal, yan wai way jŏ, neh mô geh dak ƀư an tơm jêr hun hao”.

Rnoh neh bri bah rnăk nô Jiao Klong ta xă Ia Rsai, nkuăl Krông Pa geh khĭt 9/10, jêng mô dơi sŏk dŏng.

Tâm ban nĕ đŏng, jêh tăm bri ta ăp ntŭk mât uănh tâm lvang aơ ta Krông pa geh dŭt đêt. Wa Vũ Đức Dân-Kruanh Ban mât uănh Bri njrăng n’gang phŭt sial Ia Rsai, nkuăl Krông Pa an gĭt, Tâm 2 năm 2019 n’hanh 2020, Ban Mât uănh bri njrăng n’gang phŭt sial Ia Rsai, nkuăl Krông pa tăm 60ha keo lai, yơn tât aƀaơ, knŭng bơi 7ha tŏng rnoh tơm rêh. Tĭng wa Dân, geh âk nkô̆ nău jêng tât nău tăm bri ta neh bri geh rŭn in geh săk rnglăy đêt. Tâm nĕ, đah nău ngăn lĕ rngôch nkual tăm bri njônh ngai, neh ntu jêr; rnôk tăm mâp duh jŏ jông. ndrel đah nĕ lah nkô̆ nău bah prăk tăm bri aƀaơ đêt, mô tâm di đah nău tăm bah nĭh ƀon lan ta ntŭk:

“Đah nău kơl an ntuh kơl, ngih dak mô hŏ tŏng ăp tĭng nău đă bah nuĭh ƀon lan. Du rơh tăm bri, mât chăm way 4 năm, Du tơ̆ ntuh kơl đah 1 ha tâm 1 rơh lah rlău 35 rkeh. Tâm rnôk nĕ ngih dak knŭng ntop kơl 2,5 rkeh prăk. Kônh wa ta aơ dŭt âk lah nuĭh ƀon lan rnoi mpôl đêt, wăng sa jêr jŏt. Ƀon lan mô geh prăk ntuh kơl, mât chăm. Bah nĕ jêng tât tơm khĭt mbrơi, mbrơi”.

Rnoh bri tăm lvang 2017-2021 ta âk ntŭk ta Gia Lai hôm e rêh, hun hao đêt.

Tĭng HĐND n’gor Gia Lai, ndrel đah nkuăl Krông Pa, jêh uănh nđôi ta ăp nkuăl Phú Thiên, Chư Pưh... an saơ tâm ban đŏng. HĐND n’gor Gia Lai dăn Trung ương uănh mĭn tay, dôh rklaih ăp nău jêr prăk kaih ntop kơl đah nuĭh ƀon lan n’hanh ăp ntŭk kan tăm bri, gay kơl nău tăm bri geh săk rnglăy âk, gay kơl nău nkŭm jêng bri nsĭt tay săk rnglăy ngăn ngên an nuĭh ƀon lan.../.

Nuĭh rblang: Y Sưng Phê Ja