Bộ Nông nghiệp n'hanh Phát triển nông thôn mhe geh ntrŭnh đă ƀư “Tết tăm si mbro mbrăng nkah gĭt wa Hồ” nkhêp geh năm mhe Quý Mão n'hanh n'hao dăng pah kan mât uănh, mât njrăng hun hao bri năm 2023.

Tĭng nê, Bộ Nông nghiệp n'hanh Phát triển nông thôn dăn đă Ủy ban nhân dân ăp n'gor, nkual ƀon têh mpeh Trung ương n'hao dăng nkoch trêng, ntĭm nti, n'hao nău gĭt êng mpeh nău khlay kan, nkô̆ hôr tam bah năm tăm  si, njêng bri; rgŏ jă ăp  gưl, ăp n'gâng kan n'hanh ƀon lan nsrôih râng tăm si, tăm bri, tĭng ƀư ăp nău way an bah pháp luật mpeh bri, rgop mât njrăng neh ntu ndơ gŭ rêh tâm bri, bah ir tât khuch trôk nar lơh, bên di đah rgâl trôk nar.

Ăp n'gor, nkual ƀon têh an ƀư ăp kôp, nsĭt geh nău tam ăp trong kơl tâm trong tăm bri; nkô̆, nău dơn kan n'hanh trong tĭng ƀư hun hao bri Việt Nam jŏ jong lvang năm 2021 - 2030, uănh ngai tât 2050. Lôch ƀư "Tết tăm si", ăp n'gor hăn uănh năl, rhuăt luh nău tă ơm gĭt kan, nkhôm rnê ngăch ăp mpôl kan, ăp nuĭh ntoh lư geh trong ƀư uĕh, ntĭt leo mhe.

VOV/Nuĭh rblang: Điểu Thân