Nkuâl Krông Bông lah nkual tăm âk tơm prit nkŏ bah n’gor Dak  Lak đah rlău 1.500 ha, tâm nê 2/3 rnoh neh tăm dôl tâm rơh klêh play. Tă bah prit nkŏ gơnh dŭm, nău nkret njêng jru mô năn ngăch jêng tât ăp rnôk khay dŭm, prit nkŏ way âk bưm, jŭr thuk. Nuĭh tăm ntil tơm dja ta nkuâl dôl geh ăp nău blău mĭn mhe rnôk an prit nkŏ dŭm nchah nchrai.

Rnăk nô Trần Đức Ánh, xã Cư Drăm, nkuâl Krông Bông tăm 5 ha prit nkŏ ntil Cayen ntơm bah năm 2015. Tĭng nô Ánh, ăp năm bah năp nơh, rnăk way geh nău play prit nkŏ dŭm du rơh tâm khay 5 n’hanh khay 6, ƀư âk bưm, jêr tăch, jŭr thuk ƀư nsĭt geh wăng sa mô âk. Rhuăt luh nău tă ơm gĭt kan, 2 – 3 bar pe tơ̆ klêh mhe aơ, nô hŏ kơt nti kỹ thuật an play prit nkŏ dŭm nchah nchrai ntơm bah bôk khay 4 tât khay 8. Nô Trần Đức Ánh an gĭt:

         “Rnôk he  klêh du tơ̆ ri  jêr ma dơi tăch lĕ, jêng kônh wa mpôl hên hŏ sơch trong tăm nchah nchrai, đăp mpăn trong tăch luh wăr năm an ntil Cayen dôl tăm n’hanh tăch rgâl ta ntŭk.”

          Tâm  ban kơt nê đŏng, đah nău ơm gĭt kan 10 năm tăm prit nkŏ, yuh Nguyễn Thị Kim Yến, xã Cư Drăm, nkuâl Krông Bông hŏ geh nău bôk khay klêh n’hanh kêng dŭt khay klêh ri rnoh  khlay hao, rdôl khay dŭm ri rnoh hŭch tât du n’gul, hŭch tât 70%. Aƀaơ nơm geh nău ơm gĭt kan nkre kân bah dŭm ngăch play prit nkŏ, play bah rnăk klêh tăch geh rnoh khlay dơi đăp mpăn. Yuh Yến rhơn nđơr nkoch:

         “Mpôl hên an play prit nkŏ dŭm nchah nchrai, ăp rơh dŭm bar pe rbăn mblâm, yor play prit nkŏ ta Cư Drăm dja dŭt âk ngăn. Ăp tơ̆ kơt nê̆ ri wăng sa mbra dơi mât n’hanh đăp mpăn bah tơm play prit nkŏ. Nău dŭm nchah nchrai ntoch jong jêng dơi mât rnoh khlay, bu rvăt jêr ma dơi mpet rnoh  khlay bah kônh wa”.

Wa Trần Thị Lan, ta thôn 2, xã Cư Drăm, nkuâl Krông Bông, n’gor Dak Lak an gĭt, bơi 4 năm aơ, tơm prit nkŏ jêng tơm tăm khlay nsĭt tay tơm geh wăng sa đăp mpăn an rnăk yuh. Ntơm bah 12 ha neh tuch tăm ntơm nơh dơn tăm êng du ntil tơm cà phê, đah aƀaơ 5 năm, yuh Lan hŏ nănh manh 50 rkeh prăk bah ngân hàng chính sách xã hội nkuâl Krông Bông gay rgâl jêng tăm 7ha prit nkŏ njŭng ntil Cayenne. Lôch năm bôk năp yuh hŏ nsĭt geh bơi 300 rkeh prăk. Saơ tăm prit nkŏ geh nău dơi tam, yuh mbrơi trok lĕ rnoh n’hanh manh tay gay rgâl tăm tay 5ha neh hôm ƀa ƀă jêng tăm prit nkŏ. 

Ntơm nơh gâp tăm tơm cà phê, lôch nê ri tơm cà phê mât chăm roh âk mông nar kan ngăn jêng gâp rgâl jêng tăm tơm prit nkŏ. Rđĭl đah tơm êng ƀa ƀă ri gâp saơ tơm prit nkŏ đêt roh mông nar mât chăm, đêt tơm prăk lơn, phân poh đêt lơn, nsĭt geh wăng sa âk rlău tơm cà phê. Gâp manh Ngân hàng chính sách ri gâp saơ deh prăk kon đêt, rnôk gâp manh sĭt gâp tăm tơm prit nkŏ ri trok deh prăk  kon đêt lơn rđĭl đah gâp manh bah dih.

       Tĭng Jrô kan tuch tăm n’hanh hun hao ƀon lan nkuâl Krông Bông, lam nkuâl aƀaơ geh nklăp 1.500 ha tơm prit nkŏ, dơi tăm lơn âk ta ăp xã Cư Drăm, Cư Pui n’hanh Yang Mao. Nklăp 1.000 ha prit nkŏ an klêh play, rnoh âk geh play nchroh 40.000 – 42.000 tấn play rêh. Tơm prit nkŏ dơi ŭanh lah dŭt tâm di đah neh ntu ta ăp bri neh sop mpli choih ta nkuâl Krông Bông. Nău mât chăm an luh dŭm play prit nkŏ nchah nchrai, rlău ma tăch geh rnoh khlay lơn đah khay rdôl dŭm klêh, ri hôm kơl  nuĭh tăm lor nchrăp mpeh mông nar klêh đŏng, tŏng đah nău ŭch geh ndơ tuch tăm tăch luh mbro n’hanh mô geh ât rdâng đah ăp nău kơl rvăt ndơ tuch tăm tă bah  âk bưm ndal. Wa Võ Tấn Trực – Kruanh Jrô kan tuch tăm n’hanh hun hao ƀon lan nkuâl Krông Bông an gĭt, nkuâl dôl ôp kuăl ăp doanh nghiệp tât ntuh kơl ƀư nhih máy nkret njêng ăp ndơ geh ƀư bah play prit nkŏ gay nkra lĕ trong tăch luh

“Mpôl hên dôl rƀŏng trong an kônh wa ƀon lan mbrơi rgâl tăm tơm prit nkŏ mhâm ƀư  an tâm di đah trong tăch luh n’hanh ăp nău đă bah nuĭh rvăt gay tâm di an tăch n’gluh. Aƀaơ kônh wa dơi nkoch trêng, ntĭm nti ri khân păng dôl mbrơi rgâl tăm tơm prit nkŏ dja đŏng. Mpeh ăp rnoh neh hôm ƀa ƀă ri n’gâng kan hŏ njêng ntop kơl kônh wa Hợp tác xã, ntĭm nti khoa học kỹ thuật ntop kơl kônh wa mât chăm prit nkŏ kah uĕh gay rhŏ dŏng tăch tâm dak.”

        Ăp năm aơ, tơm prit nkŏ geh âk năm play jŭr geh rnoh khlay hao, nsĭt tơm geh wăng sa têh an nuĭh ƀon lan ta ăp xã ach o nkual jru nkual ngai kơt: Cư Drăm, Cư Pui n’hanh Yang Mao bah nkuâl Krông Bông, n’gor Dak Lak. Lah dơi rƀŏng trong tăm n’hanh yơng ntil prit nkŏ đah ăp tŏng rnoh kah uĕh tăch n’gluh mô lah geh nhih máy nkret njêng jru nta geh trong tăch luh đăp mpăn, tơm prit nkŏ mbra jêng ngoăy tâm ăp tơm wăng sa khlay, tâm di đah ăp ntŭk neh ntu yôk nor, wăng sa hôm jêr jŏt bah nkuâl Krông Bông./.