“Ntơm bah aơ tât kêng dŭt năm, lam n’gâng kan tuch tăm mât rong n’hanh hun hao ƀon lan rgum an tăch n’gluh ăp ntil ndơ săk geh gay dơi tât rnoh hun hao n’hanh tăch n’gluh” lah nău lah rjăp bah Thứ trưởng Bộ Nông nghiệp n’hanh Phát triển nông thôn Phùng Đức Tiến ta rơh hop báo way ăp khay khay 9 mhe dơi ƀư ta Hà Nội.

Wa Nguyễn Văn Việt, Vụ trưởng Vụ Kế hoạch, Bộ Nông nghiệp n’hanh Phát triển nông thôn mbơh gĭt, rlău 9 khay n’gâng kan tuch tăm mât rong geh hun hao âk ta ăp ntil trong kan kơt: tuch tăm; mât rong;  si gle n’hanh tui ka. Ndrel đah nê, rnoh khlay ƀư njêng lam n’gâng kan tuch tăm mât rong tâm 9 khay aơ tât geh âk đŏng, nklăp 1,1 rkeh rmen prăk, N’gâng kan đăp mpăn rnă ntêm ndơ sa, ntŭk tăch n’gluh geh nău mpơl uĕh, lơn lah tâm khay 9, tăch n’gluh si hŏ plơ̆ hao âk tay, n’gâng kan tui ka hŭch đêt dơm:

Mpeh hun hao ntŭk tăch rgâl geh nău mpơl dŭt uĕh. Khay 9, tăch n’gluh hao 22% ta lĕ rngôch 3 trong kan ndơ tuch tăm tơm. Tât rnôk dja nsĭt geh tăch n’gluh ndơ n’gâng kan tuch tăm mât rong, si gle, tui ka hŏ geh tât 38,48 rmen đolar. Tâm 3 khay hôm ƀa ƀă nchroh ăp khay mbra tăch n’gluh geh nklăp 5 rmen đolar, he mbra dơi geh tât nklăp 54 rmen đôlar.

Geh tât rơh hăn ôp uănh tâl 4 bah Ủy ban Châu Âu (EC) tâm khay 10 năm aơ mpeh njrăng n’gang lơh joi mô geh nău way, mô mbơh n’hanh mô tĭng di quy định (IUU), wa Trần Đình Luân, Cục trưởng Cục Thủy sản an gĭt, tâm bah ri aơ, pah kan hăn ôp uănh, groi nđôi dơi ntrôl dăng, ndrel đah nê lah nău tĭng ƀư ăp quy định mpeh pháp luật dơi an ƀư lĕ n’hâm suan. Yơn lah, nău dŭt kŏ kol aƀaơ bah IUU nê lah duk lơh joi ka ta nkual dak lêng dak bah dih, aơ lah ndơ n’glêh an tât nău droh rih dơi thẻ êr bah EC đah tui ka Việt Nam lah mô:

Dŭt kŏ kol lah nău nkra rmal mô hŏ ăp kôp đah ăp n’gor. Ngăn geh ăp n’gor rmal geh nău tam, ƀư ăp rêng ntĭm nti dŭt jăp uĕh yơn ta nê nha hôm geh ăp n’gor mô lơh lhăt ngăn. Bah meng nê, nău nchih nkah mât uănh duk mpan luh lăp geh hao âk yơn mô hŏ dơi tât 100%. Mpeh nău dja mbra tĭng ƀư tay di nău way bah pháp luật: ntơm bah kơp uănh duk mpan luh lăp bah ntơm ntrŭp ndơ groi nđôi trong hăn mât mbro ndơ groi nđôi njăr trong hăn n’hanh mbơh rnoh âk geh tui ka ta ndrâm.

Tĭng Thứ trưởng Bộ Nông nghiệp n’hanh Phát triển nông thôn Phùng Đức Tiến, ta năp ăp jêr  jŏt ntul rlong, Bộ Nông nghiệp n’hanh Phát triển nông thôn ntik uĕh tay nău dơi tam dăp rgum si tăm ndơ mât, mbluh soih ăp tơm ndơ hun hao an ƀư njêng n’hanh tăch ndơ geh ƀư n’gâng kan tuch tăm mât rong. Năm 2023, n’gâng kan tuch tăm mât rong mbra sĭt tât ntŭk, lah jâng “ndăl” tay bah jâng wăng sa. Gay tât rnoh ndơ̆ luh, Bộ ntrŏng 10 trong nkra rgum tơm, tâm nê ntrŭt ntrôl pah kan tăch rgâl ngăch ta ăp ntŭk tăch gay sĭt tât ntŭk lĕ mpeh rnoh hun hao âk n’hanh tăch n’gluh:

He rgum tâm nău dơh uĕh bah ntŭk tăch rgâl n’hanh n’gâng kan ndơ tăch, 2 ntil nău dja ân hăn ndrel nsing ta ntŭk leo ƀư tuch tăm mât rong n’hanh geh tơm ndơ nkret njêng ơm geh. Kơt nê lah ăp ntŭk tăch rgâl hŏ geh ăp rnoh di n’hanh he hŏ tĭng kơn lăp ri he mbra ntrôl dăng n’hanh nsing nơm ngăn lah rnoh tât geh 54 tât 55 rmen đôlar bah năm aơ ma Chính phủ, Thủ tướng jao lah n’gâng kan tuch tăm mât rong mbra geh lĕ n’hanh sĭt tât ntŭk.

Ta rơh hop báo, wa Nguyễn Thị Thu Hương, Groi Cục trưởng Cục Mât njrăng si tăm an gĭt, đah 74 mã mbrô nkual tăm n’hanh 40 ntŭk nklâm tâl geh sŏk mplơ̆ lah mpeh Việt Nam lor nchrăp tĭng ƀư. Lah geh ăp dak rvăt n’glăp sŏk mplơ̆ ri mbra dŭt jêr jŏt tâm nău droh rklaih, khuch dŭt têh tât tăch n’gluh ndơ tuch tăm mât rong./.