Dak Lak dôl dâk bôk năp lam dak mpeh âk tơm sầu riêng, đah rlău 33.000 hec-ta, rnoh âk geh play rlău 300.000 tấn năm 2024. Yơn lah, bah ăp ăp quy định mpeh uănh năl kah uĕh, uănh năl bu chuh sa, srăch uĕh ndơ sa nar lơn ma khăch khoch bah ăp dak rvăt n’glăp, lơn lah Trung Quốc, ndơ tăch dja bah n’gor dôl ât rdâng đah âk ntul rlong têh. Gay kloh lơn mpeh ăp ntul rlong dja n’hanh rƀŏng trong nkra đah ndơ tăch, phóng viên geh rơh tâm ôp đah wa Vũ Đức Côn  – Kruanh Hiệp hội Sầu riêng Dak Lak.

- Hơi wa, kêng dŭt năm 2024, Trung Quốc hŏ mplơ̆ du đêt ndơ sầu riêng bah Việt Nam tă bah ntưp Auramine O (dak êr O). Mhâm may uănh năl mpeh nău dja n’hanh Hiệp hội Sầu riêng Dak Lak hŏ mhâm ƀư gay mât njrăng nău nsing nơm bah ndơ tăch mêh?

Wa Vũ Đức Côn: Bah năp Tết mpôl hên hŏ ƀư hop pơk sŏng dăng ban chấp hành n’hanh na nê̆ lah ăp nuĭh n’gâng tơm ta Dak Lak. Mpôl hên hŏ dăn đă ăp nhih pah kan way kan  n’hanh Chi cục Tuch tăm n’hanh Mât njrăng si tăm hop nsum. Lôch nê tâm ban ŭch du  đêt nkô̆ gay dăn đă. Ngoăy lah, nô nău rlăm mã mbrô nkual tăm n’hanh ntŭk nklâm tâl. Tâl bar lah cadimin n’hanh êr O, krêp dak loih jâk dôl lah nkô̆ nău, ân dơi nkra rmal. Tâl pe, n’hao dăng mât uănh săk kah. Mpeh Việt Nam he kơp dơn, nkre mpeh dak rvăt n’glăp bu kơp dơn n’hanh ăp nău nê lah nhih pah kanh way kan n’hanh trung ương ân geh nău ton đăp mpăn:

-Bah năp nău đă uănh năl kah uĕh nar lơn khăch khoch bah dak rvăt n’glăp, tĭng may, ntŭk lah trong nkra khlay gay sầu riêng Dak Lak lah êng n’hanh sầu riêng Việt Nam lah nsum mât nâp nău dơi tăch n’gluh mêh?

Wa Vũ Đức Côn: Trong nkra dŭt tâm di nha hôm lah ân ntrôl ngăch pă mã mbrô nkual tăm n’hanh mã mbrô ntŭk nklâm tâl đŏng. Kô̆ tơm aƀaơ lah mbrô dơi pă an dŭt đêt rđĭl đah rnoh âk tăch luh, jêng jêr der bah nău tâm rgâl năp rgâl kơi. Du gâl đŏng lah ân mât njrăng săk kah gay tât rnôk săk kah ndơ tăch n’hanh ăp nău đă mpeh uănh năl bu chuh sa play đah krêp khan đêt ri nău mplư rlăm mbra mô hôm lăng klach. Tâl 2 lah cadimin n’hanh dak êr O, krêp dak loih âk ân nkra rmal đŏng. Nhih  pah kan ngih dak ân ƀư kloh păng ntơm bah bôk năp, tât rnôk, moh ntil dak dơi an dŏng n’hanh dŏng dah âk gay njrăng đă ri păng mbra hŭch mbrơi. Tâm rnôk he mô hŏ dơi nkra ngăch nău pă mã mbrô ri ân ƀư lor bar ntil nău nê ƀât. Tâl 3, nău tăch luh dơi dah âk lah bah ăp n’gâng kan, trung ương yor păng geh tât dak rvăt n’glăp. Yơn n’gor ân nsrôih lơn gay mpơl an saơ ntŭk gŭ khlay bah du n’gor geh rnoh âk play, kơt nê n’hanh mô dơi kâp tât nău nsum dơi.

-Ngăn geh aƀaơ, rnoh tĭng di quy định mpeh uănh năl kah uĕh bah ăp doanh nghiệp tăch n’gluh sầu riêng mhâm ƀư mêh wa?

Wa Vũ Đức Côn: Gâp rƀah gĭt nău lư bah ăp doanh nghiệp râng tâm hiệp hội dơm. Ăp doanh nghiệp râng tâm hiệp hội bu hŏ gĭt dơi nău nê bah ơm hôm n’hanh du bông nău kan bu hŏ lor rƀah gĭt nău lư tĭng ƀư ăp nău kan khlay n’hanh mô di ân tât aƀaơ, ma bu hŏ lor nchrăp âk hôm gay bên di đah nô nău n’hao mpet hô bah ăp dak rvăt n’glăp.

- Nău njêng ăp ntŭk rgum weh rnoh kah uĕh ta Dak Lak dơi uănh lah trong nkra kơl doanh nghiệp lor nchrăp lơn tâm nău tŏng rnoh kah uĕh tăch n’gluh. Geh du đêt doanh nghiệp dăn rgop ƀư nsum nău kan dja đŏng. May moh geh nău lah tât nkô̆ dja n’hanh Hiệp hội moh geh nău dăn đă nhih pah kan dơi kan mêh?

Wa Vũ Đức Côn: Nê lah ăp nău ŭch bah ơm hôm, hŏ geh ăp nău dăn đă ngăn bah nhih pah kan way kan n’hanh n’gâng kan ta ntŭk. Yơn gay dơi an ƀư du trong năn ngăch, lam hvi lơn ri ân geh trong kơl bah nhih pah kan trung ương, bah Bộ đŏng, ăp nuĭh rgop ƀư nsum nău nê. Tâm ban kơt công chứng ntơm nơh ngih dak ƀư dơm, aƀaơ hŏ âk nuĭh rgop kan nsum ƀư, ntrŭt nsôr. Lah ntŭk nklâm tâl, ngih máy nkret njêng hŏ geh trong nchrăp kơl. Yơn nău dja ân geh nău ntrŭt nsôr, geh rnôk ân ntop kơl bu âk ntil gay ntrôl ngăch. Mhâm ƀư an lĕ ma ndơ tăch, lĕ ma rgum mpôl uănh khlay n’hanh nkra nău nê da dê ri ndơ sầu riêng bah he mơ hun hao dơi jŏ jong nâp dăng.

- Ơ, dăn lah uĕh wa!