Dôl ta yan lêh 1,5ha rpŭng kai ma rnăk vâl manh neh gay ma tăm ta nkuăl têh Phú Túc, nkuăl Krông Pa, wa Nguyễn Văn Kính (tât bâh n’gor Phú Yên) dŭr rngot yor năm aơ rpŭng mô plăy. Wa an gĭt, ta nkual neh aơ đŏng, yan ba năp, trôk nar dơh nơih, ăp play rpŭng rnôk lêh geh play jâk tât 8kg yơn năm aơ rpŭng dŭt n’gơch ngăn:.

“Gâp tăm rpŭng rbơi tât bar jât năm ăo hôm, geh năm âk play geh năm roh dơm, êng năm aơ mô geh play. Ƀon lan ƀư rpŭng ta aơ rĭ dŭt âk lah manh prăk ăp ntŭk n’hanh ngân hàng đŏng, ƀon lan nsrôih tât năm ba tay mbra ƀư tay, lah geh âk play geh rnoh khlăy mbra trok lĕ rnon”.

Bâh nkuăl têh An Nhơn, n’gor Bình Định hăn manh 3 ha neh ta xã Ia Mlăh, nkuăl Krông Pa, n’gor Gia Lai gay ma tăm rpŭng kai, nô Nguyễn Nhật Tân dŭt rngot nkoch, ntuh kơl 1ha rpŭng kao bâh bok năp tât rnôk lêh play klâp ma 150 rkeh prăk. Yan rpŭng aơ mih âk, rpŭng hao jêng mô ueh jêng nău geh râng geh kanŭng geh bâh 30 tât 34 tấn/1ha, rnoh nău geh rvăt bâh 3 tât 3,5 rbăn prăk/1kg. Uănh kơp,yan rpŭng aơ nô tân roh dơm klâp ma 60 rkeh prăk.

“ Năm aơ trôk nar mô ueh lăng jêng nău geh mô âk kơt ăp năm ba năp, ntơm nơh 1 ha geh bơi tât 40 tấn rpŭng, năm aơ nar mô duh jêng rpŭng mô jêng mô play, 1 ha roh dơm klâp ma bơi tât bar jât rkeh prăk đŏng”.

Aƀaơ, lam nkuăl Krông Pa geh rlău 1 rbăn ha rpŭng kai đah rnoh geh bơi tât 40 rbăn tấn. Wa Võ Ngọc Châu- kruanh ntŭk kan tuch tăm n’hanh hun hao ƀon lan nkuăl Krông Pa an gĭt, kơt lah lĕ rngôch rnoh neh rpŭng lah bâh nuĭh ƀon lan ntŭk êng tât manh neh gay ma tăm êng, mô geh tâm nău nchrăp bâh nkuăl. Ta meng nĕ, nuĭh tăch rvăt tât rvăt tĭng trong rvăt êng, mô geh tâm ton kan ndrel jêng n’gâng kan n’hanh ntŭk kan geh nău dơi mô dơi ndơ̆ mbơh ăp nău mpŏng kan, nău kơl an ƀon lan kan lŏ mir.

“Ta năp nĕ mih mbro ngăn jêng rpŭng kai kroănh n’ha jêng rnoh geh kơn play mô âk yor nĕ ƀon lan mât tăm roh dơm. Dŭt âk rnoh nuĭh ƀon lan ta Bình Định n’hanh Phú Yên manh neh ta nkuăl Krông Pa, mô di lah yor nuĭh ƀon lan ta ntŭk nkra njêng jêng jêr tâm nău rgŏ jă ăp rnăk êng yor bu kanŭng manh neh tăm jêng mât uănh dŭt jêr”.