Rnăk vâl wa Thái Thị Hường, ta thôn 8, xã Ea Kpam, nkuăl Cư M’gar, n’gor Dak Lak geh 8 sào tiêu tăm tâm breh đah cà phê. Ta yan pĕ lêh, wa an gĭt, nău geh tiu năm aơ klâp ma 40% đah năm e. Rnoh tăch tiu ntơm geh hao bâh bôk yan, aƀaơ geh klâp ma 67 rbăn tât 70 rbăn prăk/kg lĕ kơl an rnăk vâl mô ir geh nău mĭn rvê prăk ntuh chăm ta năp nĕ dŭt khlay. wa Thái Thị Hường an gĭt.

“Trôk nar năm e tiu mô geh play, hôm năm aơ trôk nar ueh lăng prăng sơh, tiu geh âk lơn yơn rnoh khlăy hên ŭch hao oi du đê̆ gay ma n’hâp trok lĕ prăk kan hôm nha geh rmeh oi du đê̆”.

Tĭng nău mbơh bâh wa Ngô Thị Mỹ Hạnh, thôn 3, xã Ea Bhôk, nkuăl Cư Kuin, yan tiu năm aơ geh âk play n’hanh tăch khlăy jêng ƀon lan dŭt rhơn ngăn. Aƀaơ rnăk vâl geh 6 sào tiu, rnoh geh klâp ma 3 tấn, âk lơn đah năm e bơi tât 1 tấn, rnăk vâl dôl rgum nuĭh kan lêh an lôch gay ma ndăn tăch đah rnoh khlăy gay ma trok prăk ntuh mât chăm.

“ Tâm rnôk tiu jur thuk, rnoh nkhôm nuĭh kan khlăy, rnoh phân poh, pring xăng gay ma nchoăt máy tŏ dak, nchoăn rdemng lah nsum ăp ntil ndơ hao khlăy da dê. Tiu geh nău bu tuh đŏng, hên ŭch tâm let năp tay rnoh khlăy hao oi, hao khlăy lơ ma ueh đŏng. Nĕ lah nău ŭch rŏng bâh nuĭh ƀon kan kan lŏ mir hên”.

Lam n’gor Dak Lak geh bơi tât 32 rbăn tiu, rnoh geh klâp ma 80 rbăn tấn. Nău tiu hao khlay jur thuk ndal tâm ăp năm ba năp, tâm rnôk trôk nar nuh srê geh tât mô ueh dŭt âk, rnoh phân poh ndơ dŏng hao khlăy khuch âk tât nău geh tâm ban nău mĭn nuĭh tăm ndơ. Rnoh tăch tiu khlăy bâh ntơm bôk yan lêh play năm 2023 lah nău ueh gay ma ƀon lan đăp mpăn ntuh kơl hun hao nâp nâl tơm tiu.