VOV4.M’nông - Rơh bầu cử đại biểu Quốc hội khóa XV n’hanh đại biểu HĐND ăp gưl năm kan 2021-2026 mbra dơi ƀư tâm nar 23/5 lah nar kan chính trị khlay bah neh dak, dơi ƀư lôch jêh Đại hội Đại biểu lam dak tâl XIII bah Đảng. Nău sơch nuĭh ntơh măt lah nuĭh rnoi mpôl đê̆ râng Quốc hội n’hanh HĐND ăp gưl geh nkô̆ hôr dŭt khlay tâm lam trong kan chính trị ăp gưl lah nsum n’hanh nhih pah kan sơch an ƀư lah êng. Tâm ăp tơ̆ ƀư tâm rkhăch bah Mặt trận Tổ quốc ăp gưl sơch nuĭh dâk tâm rlong lah nuĭh rnoi mpôl đê̆ gay sơch lăp tâm đại biểu Quốc hội n’hanh đại biểu HĐND ăp gưl âk geh tŏng rnoh mha êng, yơn mô dơi mbăk anh jâk ir rnoh ăp tŏng an du hê nuĭh ntơh măt.

Tĭng wa Nguyễn Lâm Thành, Groi Kruanh Hội đồng Dân tộc bah Quốc hội, nău uănh khlay nău dơi săch, nuĭh dơi bah bah nuĭh rnoi mpôl đêt tâm rơh săch Quốc hội n’hanh ngih pah kan ƀon lan đă ta ăp ntŭk dơi ăp gưl uănh tât, ntĭm. Gay m’hâm ƀư, mât uĕh nău dơi bah ăp nuĭh dơi săch lah nuĭh rnoi mpôl đêt ta ntŭk khân pơng dôl gŭ. Yor mô geh nuĭh wât nkual prêh, n’har bri rlău ăp nuĭh dôl ăp nar ăp mông ndrel gŭ, ndrel sa, ndrel pah kan đah ƀon lan.

“Ăp nuĭh dơi săch aơ dŭt wât mpeh ăp nău geh ơm, ăp nu nău ma khân pơng rêh n’hanh lah nkual neh bah nuĭh ƀon lan rnoi mpôl đêt. Tal 2 lah wât nău way ơm ăp nău ŭch rŏng, nĕ lah ăp nău ma nuĭh ƀon lan dôl uănh tât. Du nău tay lah ndrel nău ngơi, rplay sam ƀŭt jêh nĕ nău tâm boh rêh jêng, tâm bên mpôl băl rnoi mpôl. Nĕ lah nău dơh bah nuĭh dơi săch rnoi mpôl đêt”.

Aƀaơ, trong kan nchrăp săch nuĭh ntoh măt Quốc hội khóa 15 n’hanh nuĭh ntoh măt HĐND ăp gưl năm kan 2021-2026 ta nkual rnoi mpôl đêt, tĭng Hội đồng dân tộc bah Quốc hội uănh lah lĕ ƀư tĭng rjăp, di nău ntrŭnh bah pháp luật. Yơn lah.  Yor âk nkô̆ nău êng êng di n’hanh mô di, uĕh blău nuĭh kan nkual rnoi mpôl đêt hôm đê̆. Rnoh nti đại học, cao đẳng n’hanh rlău đại học geh đêt tâm dăp n’hao rnoh nuĭh. Trong kan nkoch trêng ta nkual rnoi mpôl đêt n’hanh nkual yôk yang geh jêr jŏt êng, nău wât bah ƀon lan hôm e đêt, nău way ơm hôm e âk. Yor nê, ăp ntŭk an n’hao nkoch trêng, mbơh rblang, ntĭm an ƀon lan wât na nê̆ mpeh nău dơi săch n’hanh nuĭh dơi săch bah nơm. Uănh khlay trong kan tiăr nti, nău blău tâm rlong an ăp nuĭh dơi săch kơt n’hao trong kan mbơh trêng, nkoch trêng ta nkual rnoi mpôl đêt. Lơn lah, ăp gưl ủy Đảng, n’gâng kan ƀon lan, Hội đồng săch ăp gưl ƀư nkoch trêng, mbơh rblang nău dơi n’hanh nău kan bah nuĭh ƀon lan tâm rơh săch. Uănh khlay nkoch trêng đah nău ngơi rnoi mpôl đêt, ƀư rgum tâm nchră mpeh đă rgâl rgâl, pă nuĭh, đah nkoch nău rêh bah nuĭh dơi săch ntoh măt Quốc hội n’hanh ntoh măt HĐND ăp gưl gay m’hâm ƀư ƀon lan saơ nău uĕh râng tâm trong kan săch lah nău dơi bah nuĭh rnoi mpôl đêt. Nĕ lag săch luh ăp nuĭh ntoh măt an ƀon lan gay râng ndâk njêng, dăn đă, groi nđôi nău ƀư tĭng nău kơl, ngăn lah nău kơl geh tât nkual rnoi mpôl đêt, nkual yôk.

Tĭng wa Ma Công Khâm, Bí thư đảng ủy, Kruanh UBND xă Thượng Lâm, nkuăl Lâm Bình (n’gor Tuyên Quang), ta xă Thượng Lâm, đah rlău 90% rnoh nuĭh lah rnoi mpôl đêt, trong kan săch, nuĭh dơi săch bah ƀon lan ta ntŭk dơi kônh wa uănh tât na nê̆. Bah meng nĕ, ƀon lan uănh khlay đŏng tât nău dơi săch, nuĭh dơi săch bah ăp nuĭh dơi săch lah nuĭh rnoi mpôl đêt gay pah kan săch dơi ƀư dơh, lôch uĕh:

Đah nău nkoch an nuĭh dơi săch ntoh măt HĐND dơi ăp rmôt kan chính trị rêh jêng ta ntŭk xă dơi ăp nuĭh uănh tât. Đah ƀon lan ri nchih săk nuĭh ăp nuĭh săch, nuĭh dơi săch tât ntŭk aơ lĕ mbơh. Tĭng tâm nău di ri dơi ƀư kơp uănh n’hanh hiệp thương ăp gưl 1,2,3 n’hanh uănh khlay ăp nuĭh dơi nsing nơm, geh nti nsơm gay tâm di nău kan rnôk lĕ dơi săch ntoh măt HĐND”.

Bah meng nĕ, nău uănh khlay nău dơi săch, nuĭh dơi săch bah nuĭh rnoi mpôl đêt tâm rơh săch Quốc hội n’hanh HĐND ăp gưl an dơi ƀư tâm ban bah nău saơ, săch, dăp rgum, ntĭm nti, uănh na nê̆, dŏng gay tâm di nău ŭch đah tâm di cán bộ tĭng nău ntrŭnh nsum bah Đảng n’hanh Ngih dak. Mpeh jŏ jong, an uănh mĭn lơn đah rmôt cán bộ, công chức lah nuĭh rnoi mpôl đêt.

Đah cán bộ geh nsing nơm yơn mô hŏ tâm di an ndơ̆ tâm bôk nău kan, trong nchrăp ntĭm nti gay tŏng ăp nău ŭch cán bộ, công chức, tâm nĕ geh ăp ngih pah kan ƀon lan đă. Dăp rgum cán bộ rnoi mpôl đêt nsrôih tâm di đah nău dăp rgâl rnoh nuĭh tĭng nkual, tĭng ntŭk. Rlău ma nĕ, an uănh khlay lơn tât ăp nău mbơh pháp luật geh tât kơt: Luật săch nuĭh ntoh măt Quốc hội n’hanh săch nuĭh ntoh măt HĐND; ăp sam ƀŭt ntĭm mpeh rơh săch bah Ngih dak, bah Ủy ban thường vụ Quốc hội n’hanh Hội đồng săch ngih dak.

Nuĭh răk rblang: Y Sưng Phê Ja