VOV4.M’nông: Ƀư tĭng bôk nau kan bah Chính phủ mpeh nau n’hao nau nkoch mbơh, ntĭm nti pháp luật ân cán bộ ƀon lan nkuăl n’har bri, gôl dak lvang năm 2017-2021, rơh rlau aơ, ăp rmôt tahen biên phòng, công an ndrel âk rmôt kan chính trị rêh jêng hŏ n’hao nau nkoch trêng, gay n’hao lơn tay nau gĭt ndrel nau kơt tĭng luật ân cán bộ ƀon lan tâm nkuăl n’har bri. Ngăn lah tâm rnôk aơ, bôk nau kan dôl ma ƀư ntĭm nti nau kơt tĭng nau luh, lăp, njrăng rdâng đah srê Covid-19

          Ia H’Drai lah du xã nkuăl bri ngăn bah n’gor Kon Tum, geh bơi tât 80km trong n’har đah dak Campuchia. Kơp ntơm geh srê Covid-19 geh tâm âk ntŭk, n’gor Ratanakiri bah dak tâm dăch ma n’gor Kon Tum kŏ kơt nê đŏng. Ndri ma, nau kan n’hao nau mêt uănh, nkân njrăng ndrel nkoch trêng bonh đă ƀon lan ƀư ueh nau njrăng rdâng srê Covid-19 mro geh lam ntrong kan chính trị bah nkuăl Ia H’Drai ndrel rmôt teh Biên phòng tâm rgop ƀư ueh. Aơ lah nau tă geh bah nau dơi uănh khlay nau nkoch trêng, mbơh pháp luật ân nŭih rnoi mpôl đê̆ tâm nkuăl n’har bri.

          Tâm nkuăl n’har bri Ia H’Drai, rơh rlau aơ, rmôt kan kơt tahen Biên phòng, công an, Rnâng kan rđau tahen nkuăl ndrel ăp rmôt kan hŏ n’hao nau nkoch trêng, mbơh, ntĭm pháp luật gay rgop nau mĭn, nau kơt tĭng luật ân cán bộ ƀon lan tâm nkuăl n’har bri. Srê Covid-19 tât, ƀư nau ntrŭnh mô ân rgum âk nŭih, rmôt tahen Biên phòng Hồ Le ndrel Công an xã Ia Đan tâm rgop nkoch mbơh ngăn tâm thôn 6 tâm măng. Tâm thôn 6, âk ngăn nŭih ƀư công nhân cao su, nau kan ntơm rnôk du mông tât 2 mông ôi ri ma ăp nŭih bu bĭch ơm. Gĭt nau nê, ăp rmôt nchrăp hăn nkoch mbơh rnôk 6h30 tât 8h măng. Thiếu tá Võ Anh Hoàng, kruanh công an xã Ia Đan, mbơh:

          ‘Công an xã hŏ nchrăp tâm rgop nsum đah rmôt ƀư nau nkoch trêng pháp luật kơt Luật gŭ âm, Luật rnă njrăng mạng, luật mpeh nau tih tâm nau rêh, ăp nau kan geh tat nau lơh rdâng ăp phung tih dôih, ngăn lah tih dôih ma tuý ri bah nau nkoch trêng, ƀon lan gĭt lơn, ngăn lah nau tih ma tuý ri bah nau nkoch mbơh, ƀon lan gĭt ndrel geh nau ƀư ueh tâm nau njrăng, rdâng, mbơh phung tih dôih đah ăp n’gâng kan”.

          Gay ƀư ân ueh bôk nau kan, ntŭk kan Rnâng kan rđau tahen Biên phòng n’gor Kon Tum hŏ ƀư ăp n’ha săm ƀŭt mpeh nkoch trêng pháp luật ân tâm di ma nau geh bah nkuăl. Tâm năm 2021, ăp rmôt kan rgum nkoch trêng mpeh nkô̆ mpeh ăp nau tih mô dơi tâm nau mât, dŏng ndrak nsiu, ndơ rtoh, nsiu rtoh ndrel ndơ êng, ntrŭnh mpeh nau tih bah mạng, tih tât ngih dak, mpôn mbơh nau kan, nau tăch rgâl, nŭih êng, rnăk vâl ndrel nau rêh tâm ntŭk mạng, ăp nau tih mpeh nau mô dơi tâm nau mât rnă njrăng mạng. Ngăn lah rnôk aơ, Bôk nau kan rgum tâm nau rklaih nau tih luh lăp tih dôih, ntrŭnh pháp luật geh tât nau njrăng, rdâng srê Covid-19 ndrel rnoh mhal. Tĭng Trung uý Vũ Văn Phúc, cán bộ bonh đă ƀon lan tahen Biên phòng Hồ Le, ngơi:

          ‘Mpeh nau kan lah ăp kônh wa gĭt kloh, n’hêl ngăn mpeh ăp nkô̆ nau bah đồn hŏ ndâk nau nchrăp ndrel nkoch trêng tât kônh wa ƀon lan. Yơn lah, tâm rnôk nkoch trêng ma kônh wa ƀon lan ri hôm geh du đê̆ nau nkol tâm rơh kônh wa râng pah kan jan sa hôm jong, nơm ân gĭt nar, mông, ntŭk ân tâm di. Âk rnôk nơm nkoch trêng ân du rnăk, rnơm rnăk nê nê lŏ nkoch tât rnăk êng”.

          Êp ăp nau kan nkoch mbơh tâm măng, ăp rmôt hôm tâm rgop leo loa mbơh tât ăp thôn, ƀon. Nar ƀư lah mông ôi, dĭng nar ndrel kêng măng. Nkoch tât nau aơ Nô Nguyễn Văn Hiền, nŭih ƀon lan thôn 6 xã Ia Đan, ngơi:

          ‘Mât n’gâng n’har bri ntơm nơh gâm ƀư nau kan nê, tahen biên phòng rnê ngăn, geh nŭih mô năl tât ri nơm ân mbơh ma rmôt công an, tahen”.

          Nô Lê Văn Thắng, nŭih tâm thôn 6 xã Ia Đan nkoch tay:

          ‘Rnôk lih bah ngih nơm put bok put mbung, mô rgum âk nŭih, nkuăl n’har bri ri ăp nŭih tahen công an jêh ri biên phòng kŏ nkoch mbơh mro, ăp nar kŏ saơ ăp nŭih nê hăn da dê”.

          Rơh rlau aơ, ƀư Bôk nau kan n’hao nau nkoch mbơh pháp luật ân cán bộ ƀon lan nkuăl n’har bri, gôl dak lvang năm 2017-2021, nau noch mbơh mpeh pháp luật geh nau tam ngăn. Kan ntrŭnh, nkoch mbơh, ntĭm mpeh luật geh ƀư tâm ban, bah nê n’hao nau gĭt bah ăp gưl kan, rmôt kan ndrel ƀon lan mpeh nau kan, nau dơi bah nau nkoch mbơh, ntĭm nti pháp luật ndrel nau kơt tĭng luật tâm nkuăl n’har bri. Đại uý Nguyễn Hữu Cường, chính trị viên Groi kruanh Đồn biên phòng Hồ Le mbơh:

          ‘Gâp vay n’hao nau nâp mpeh nau kan nkoch trêng pháp luật lah ntĭm ân rmôt kan ƀư nau kan aơ, tal 2 lah ƀư ueh nau kan bah nŭih geh bu rnơm, bu ranh ƀon, kruanh ƀon ndrel mô rlu rgâl mhe nau nkoch mbơh...Bah nau ntrŭnh mbơh ăp nau kan, nau gĭt bah kônh wa lơn ma ueh, nau tâm rgop kơt tĭng ma đồn biên phòng tâm nau hăn mêt uănh, nkân njrăng, saơ, mbơh năn ân đồn biên phòng ndrel ân n’gâng kan gay ma rklaih nau geh tât nau tih nau kan trong n’har bri, bah nê rgop nau ƀư ueh ƀon lan”.

          Bah nau ƀư ntrŭnh bôk nau kan N’hao nau nkoch trêng, mbơh pháp luật ân cán bộ ƀon lan nkuăl n’har bri, gôl dak lvang năm 2017-2021 tâm nkuăl n’har bri Ia H’Drai, mra dơi lah bôk nau kan hŏ rgop nau ƀư rgâl nau mĭn, nau blau ndrel nau kơt tĭng luật bah ƀon lan, ƀư n’huch nau tih pháp luật, kơl ƀon lan nâp nuih n’hâm tâm rgop kơl ma nkuăl n’har bri bah neh dak./.

Nuĭh rblang:H'Thi