VOV4.M'nông: Tâm khay 9/2021, Bộ trưởng, Chủ nhiệm Ủy ban Dân tộc hŏ geh 2 nău n'glêh an dŏng 1, 358 rmen prăk ntop kơl nuĭh ƀon lan rnoi mpôl đê̆ ach o n'hanh sinh viên Nhih nti Dự bị đại học Nkual ƀon têh Hồ Chí Minh ntưp COVID-19. Aƀaơ, Văn phòng Ntơh măt Ủy ban Dân tộc ta Nkual ƀon têh Hồ Chí Minh dôl nsrôih ntĭm nti ăp n'gor tâm nkual Đông Nam bộ ƀư ntop kơl di nuĭh, di rnoh, năn ngăch rgŏ jă ƀon lan tâm rnôk jêr jŏt bah nuh srê. Kơp tât khay 9, ăp n'gor miền Đông Nam bộ geh 10.864 nuĭh ƀon lan rnoi mpôl đê̆ ntưp Covid-19. Ban Dân tộc ăp n'gor tâm nkual hŏ nsrôih rgŏ jă kơl n'hanh ƀư âk nău kan mât chăm an nuĭh ƀon lan rnoi mpôl đê̆ ta ăp  nkual geh  nuh srê, rgop mât đăp mpăn lam rêh jêng kon nuĭh ta nkual. Êng ta n'gor Đồng Nai, Ban Dân tộc n'gor ƀư tơm, rgŏ jă geh 3 tấn phe rgop ndrel n'gâng kan ta ntŭk mât chăm nău rêh an nuĭh ƀon lan rnoi mpôl đê̆ ta nkual geh mpă wêl êng./.

Nuĭh rblang: Điểu Thân