VOV4.M’nông: Ta rơh rƀŭn tal 6 rơh 1 dŭt pơh rlau aơ, Uỷ ban Rnâng kan Quốc hội rgop nau mpeh nau ân ƀư du đê̆ nau kan, nau kơl an tâm nau kan dak si gay ma kơl an nau kan njrăng, rdâng srê Covid-19. Ntơm 4 rmôt nau kan têh mpeh nau njrăng, rdâng srê Covid-19 yor N’gâng kan dak si đă, Uỷ ban Rnâng kan Quốc hội đă uănh ân tiŏng nau tât,k đăp mpăn nau dơi, ngăn lah nau kan ân ăp nŭih râng tâm nau njrăng, rdâng  srê ndrel tơm prăk ngih dak mô lah tơm prăk bảo hiểm y tế trok ân rnôk khám, săm ji.

            Kruanh n’gâng kan dak si Nguyễn Thanh Long đă, Uỷ ban Rnâng kan Quốc hội ân N’gâng kan dak si, ăp N’gâng kan, ntŭk kan ndrel ăp nkuăl geh nau rgum, dŏng nŭih ƀư nau kan njrăng, rdâng srê Covid-19 ma mô nding tâm ăp nau ƀư nau kan geh nchih tâm săm ƀŭt mât nau kan mô lah nau ƀư đŏng lah mô geh nau dơi ƀư nau kan. Đă ân ƀư nau khám, săm ji tă bah ngai ân nŭih ƀon lan ntưp srê Covid-19. Đă ân ƀư nau khám, săm ji yor srê Covid-19. Nkre, đă ân Kruanh n’gâng kan dak si uănh, ntrŭnh nau ƀư nau dŏng dak si hŏ geh pă ân nau rvăt lăo ân nkô̆ nau êng gay ma njrăng, rdâng, săm Covid-19.

            Uỷ ban Rnâng kan đă, ăp nau kan mhe gay ma kơp, nchră ân tŏng nau tât khuch, đăp mpăn nau dơi, ngăn lah nau kan ân ăp nŭih râng nau njrăng rdâng rnôk rsê nuh nkri ngăn tât nau khuch bah nau rêh, n’hâm soan kon nŭih. Groi Thủ tướng Kruanh Quốc hội Trần Quang Phương, đă:

            ‘Nkri khuch ngăn, mhâm lah nau kan khlay? Mhâm nau dĭng ân lah khlay? Ân geh kơp uănh ân nâp. Tal bar, nŭih dơi ƀư nau râng chuh n’gang, uănh xét ngjiệm, mât chăm ndrel ma săm. Êng ngăn đah nau ƀư nau nau kan ri kloh hôm, yơn ân geh nchrăp uănh gay geh nau dơi gay ma mât, njrăng ân nâp an ăp nŭih aơ. Der ăp nau ndăn ngăn rnôk nau ê geh tât rnoh mô lah geh nau nkri khuch ngăn hôm geh ƀư”.

            N’gâng kan dak si kŏ đă ƀư nau trok prăk rĭng nau ntrŭnh mrô 268 bah Uỷ ban Rnâng kan Quốc hội, yơn ân geh ntop tay nau ntrŭnh nŭih geh nkhah êng rnôk geh trok tâm ri tơm prăk ma geh trok tâm ân lĕ, nkre ƀư nau ân Chính phủ ntrŭnh nau dŏng tơm prăk tă bah tơm prăk geh têm bah Bảo hiểm y tế gay ndrel ma tơm prăk ngih dak trok ân nau ƀư khám, săm ji Covid-19. Nkoch kloh mpeh nau trok prăk ƀư kan, prăk khay đah rmôt kơl njrăng srê. Kruanh n’gâng kan tơm prăk Võ Thành Hưng mbơh tay:

            ‘Tâm nau ntrŭnh bah Chính phủ rnôk aơ, ăp nŭih geh râng nau njrăng rdâng srê kŏ geh nau kơl an. Êng nau kan dak si geh tât ntŭk trok tâm bah rmôt ƀư nau kan. Kơt lah, rmôt ƀư nau kan ân geh đăp mpăn 100% nau dŏng ƀa ƀơ ri ăp mrôt aơ ân geh đăp mpăn prăk khay ân nŭih pah kan. Yơn lah, rnôk râng nau njrăng rdâng srê ri tơm prăk ngih dak đăp mpăn prăk khay ân ăp nŭih aơ. Tâm ban nau ntop tay ndơ dŏng mpeh dak si ân ueh nâm ơm rnoh tăch”.

            Tâm ban đah N’gâng kan dak si mpeh nau trok tâm tĭng nau ntrŭnh 268, yơn geh rnoh Chính phủ ntrŭnh gay ma Tơm prăk bảo hiểm y tế trok. Groi Tổng Giám đốc Bảo hiểm y tế Phạm Lương Sơn, đă:

            ‘Ăp rnoh prăk bah ăp nau kan dak si bah dih nau trok tâm bah tơm prăk bảo hiểm y tế lah nau bôk năp. Tal bar, ăp ntil dak si săm knŭng gay ma dŏng ân săm Covid-19. Tal 3, ăp tơm prăk mpeh nsưng bĭch. Yor lah nŭih ji ntơm rnôk kăp ân tât rnôk geh mbơh bah nau ji uănh kơt lah du hê nŭih săm srê Covid-19 lah ân geh săm tâm ngih dak si ri ân geh dŏng prăk nsưng săm lah săm tâm ngih dak si. Du đê̆ xét nghiệm ân geh nau dŏng tam êng kơt lah máy sŏ n’hâm, ép mô...Nkah dơi nar ŭch dŏng. Phung hên tâm ban nau đă trok tâm tĭng nau ntrŭnh mrô 268”.

            Ta rơh rƀŭn, Kruanh Quốc hội Vương Đình Huệ đă ân geh uănh nkah ngăn tơm prăk ngih dak ndrel tơm prăk Bảo hiểm y tế trok ân nau khám, săm ji:

            ‘Bảo hiểm rgop geh dŏng, hôm tơm prăk trok ân ntă ntŭk nê lah nau ntrŭnh bah Ngih dak, gâp mô geh tâm ban nau mô jao ân Chính phủ rđau nau dơi ân geh tâm ban tâm nau kan đah tơm prăk ndrel tơm prăk bảo hiểm. Nau ntrŭnh aơ ntrŭnh ân kloh moh nau nơm dŏng đah tơm prăk, moh nau nơm dĭng đah tơm prăk bảo hiểm y tế. Ntă nŭih mô geh nkhah ri geh dŏng đah tơm prăk ân geh kloh”.

            Uỷ ban Rnâng kan Quốc hội đă N’gâng kan dak si lŏ ƀư ân jêh nau mbơh ân Bộ chính trị rgop nau. Nkre lah, lŏ geh nau kơp uănh gay nau nchrăp nau ntrŭnh ntoh ân gleh lơn, nơih gĭt lơn, ngăn lah ăp nau kan mpeh nau kan dak si, gay ngăch ƀư dơi ăp ntrong kan, nau kơl an tâm nau kan dak si gay ma kơl an nau kan njrăng, rdâng srê Covid-19 rnôk aơ./.

                        Nŭih rblang: H’Thi