VOV4.M’nông: Đah nau ƀư tơm bah Kruanh Quốc hội Vương Đình Huệ, Uỷ ban Rnâng kan Quốc hội mhe ƀư rƀŭn ndak gay ma râng nau rgop mpeh nau nchrăp nau ntrŭnh bah Chính phủ mpeh nau ƀư ăp nau kan ndal tâm nau njrăng, rdâng srê Covid-19 tĭng nau ntrŭnh 30 bah Quốc hội geh ntrŭnh tâm rơh rƀŭn tal bôk năp, Quốc hội gưl XV.

            Măng 5/8 mhe rlau, Thủ tướng Chính phủ hŏ ký nau ntrŭnh mbơh nau mrô 1067 dăn nau mbơh rgop bah Uỷ ban Rnâng kan Quốc hội mpeh ăp nau kan ndal tâm nau njrăng rdâng srê Covid-19 ndrel lơ 6/8, Chính phủ lŏ geh nau dăn mbơh bah Uỷ ban Rnâng kan Quốc hội ân Chính phủ ntrŭnh ăp nau kan ndal êng ntrŭnh bah Luật.

            Tâm nau uănh, ntrŭnh nau ntrŭnh đă bah Chính phủ, ăp nŭih kan bah Uỷ ban Rnâng kan Quốc hội tâm ban đah 4 nkô̆ nau mhe êng đah nau ntrŭnh bah pháp luật rnôk aơ mô lah tâm nau dơi bah Uỷ ban Rnâng kan Quốc hội, tĭng nau ntrŭnh bah nau mrô 30 bah Quốc hội.

            Ngăn lah, ân ăp N’gâng kan dak si, neh dak, Công an, UBND ăp n’gor ntrŭnh nau ndâk nau rgum, săm ân ăp nŭih geh ntưp srê Covid-19 nkre ma pă săm ƀŭt ƀư nau kan ndrel đă ntop nar ƀư nau kan bah nkô̆ nau aơ, tât lôch năm 2022 ndrel knŭng dŏng kơt tâm nau kan tât ndal, njrăng, rdâng srê Covid-19 tĭng nau rdâng ndrel nau dơi ngăn tâm ăp nkuăl.

            Uỷ ban Rnâng kan Quốc hội tâm ban nau đă đah nau nchrăp nau ntrŭnh aơ, nau kan trok prăk khám săm ji ân nŭih ji Covid-19, geh n’ăp ma tơm prăk dŏng săm ăp nau ji êng tâm rnôk săm Covid-19 yoor tơm prăk Ngih dak đăp mpăn. Yơn lah, Uỷ ban Rnâng kan Quốc hội đă đah ăp nŭih ji ntưp srê Covid-19 geh ăp nau ji êng kơt lah ( ji play nuih, chrach njŭng, play leh) ri ân geh trok prăk rnôk khám, săm jio đah ăp nau ji ăp ân geh bư tĭng nau ntrŭnh bah Luật Bảo hiểm y tế ndrel ăp nau ntrŭnh êng.

            Uỷ ban Rnâng kan Quốc hội tâm ban nau jao ân Rnâng kan Hội đồng nhân dân ntrŭnh ăp nau kan geh tât nau dơi bah Hội đồng nhân dân ndrel nau mbợh bah Hội đồng nhân dân ta rơh rƀŭn ueh ngăn gay tâm ban đah nau geh bah âk nkuăl dôl ƀư nau kan njrăng, ƀư rjăp nau tâm mâp rgum âk nŭih, ƀư nau tâm nkhah srang. Mpeh nau aơ, Uỷ ban Rnâng kan Quốc hội đă ân geh n’hao nau rđau, nau mêt uănh ân rjăp bah ăp gưl uỷ tâm ăp nkuăl tâm rnôk ƀư, der nau ƀư tuĭng nau ntrŭnh aơ gay ma ndăn ăp nkô̆ nau mô geh nau ndal, mô geh tât nau kan njrăng, rdâng srê Covid-19 bah nkuăl.

            Ntoh nau ta nar rƀŭn, Kruanh Quốc hội Vương Đình Huệ lah rjăp, nau kan ntrŭnh nau aơ lah nau khlay, ndal ngăn tâm rnôk geh srê lơn ma jêr, ngăch ntưp rêng bah âk n’gor, nkuăl ƀon têh, ngăn lah ăp n’gor mpeh ba dâng:

            ‘Tâm nau ntrŭnh mô dơi dŏng ăp nau nkoch mbơh mô kloh mpeh nau kan kơ lah ơm lơn, prêh lơn, der nau mô tâm ban ƀư jêng nau vĭ vĕ ân nkuăl tâm nau kơt tĭng, mô lah geh njêng nau mô ueh êng. Nau ngăn ân saơ, nau kan kơl an ri tâm bam, yơn tâm nkuăl lŏ ƀư mô geh tâm kơt ngăn, nkuăl aơ geh du ding, ma nkuăl êng ƀư du ding. Ri dăcgh duưt nau kan mpeh nau ân geh n’ho ro bah ăp ntil dnơ ndrle nau kan hăn ro bah ƀon lan, ngăn lah trong dơi, trong mô dơi. Rơh tât, đă Chính phỷ ân geh lŏ rđau nau ntrŭnh ăp nau kan geh tât nau pă ân kloh nkô̆ nau geh tât nau dơi bah ntrŭnh bah Chính phủ, Thủ tướng Chính phủ. Uănh nau pă dăng jăp lơn ân nkuăl, ngăn lah tâm ntŭk ƀư. Ăp nau kan geh tât nau bư, ƀư ân rjăp tâm ban. Tâm rnôk nau kan ndal, ri rđau kan ân geh du trong dơi lah nau khlay. Ngăn lah tâm nau ƀư, mô lah ăp nau kan ma Chính phủ, Thủ tướng Chính phủ hŏ ntrŭnh, der nau kan “ntŭk hăn du ding, ntŭk ƀư du ding”.

            Jêh nê, Kruanh Quốc hội Vương Đình Huệ hŏ kí nau ntrŭnh mrô 268 mpeh nau ân Chính phủ ntrŭnh ăp nau kan geh nkô̆ nau êng kơt nau ntrŭnh bah luật gay ma tŏng dơi nau đă njrăng, rdâng srê Covid-19. Tĭng nê,  Quốc hội tâm ban ăp nau đă bah Chính phủ mpeh nau ntrŭnh ăp nkô̆ nau bah Chính phủ gay ma ƀư ăp nau kan ndal, njrăng rdâng srê Covid-19 tĭng nau ntrŭnh mrô 30/2021.QH15 lơ 28/7/2021 bah Quốc hội gưl 15, tâm nê geh nkô̆ nau ba kơi: Ntrŭnh nau ndâk ntŭk rgum, săm ân nŭih ji ntưp Covid-19 nkre lah pă nau dơi ân nau kan, Jao ân ntŭk kan dak si ntrŭnh ăp nau kan ƀư tâm nau ntrŭnh mbơh ân kloh gay ma tŏng dơi nau ŭch bah ăp nau kan njrăng, dâng srê Jao ân Rnâng kan Hội đồng nhân dân ntrŭnh ăp nau kan tâm nau dơi bah Hội đồng nhân dân ntŭnh ăp nau dơi mpeh hội đồng nhân dân mbơh nau ntrŭnh ăp nau kan geh nau dơi bah Hội đồng nhân dân ndrel ăp nau bơh bah Hội đồng nhân dân tâm rơh rƀŭn êp ngăn.

            Đah nau đă ntrŭnh nau trok tâm nau rnôk ƀư khám săm ji ân nŭih ji ntưp srê Covid-19 tâm ăp ntŭk rgum, săm srê Covid-19 (geh prăk săm ăp nau ji êng tâm rnôk săm Covid-19) yor tơm prăk Ngih dak đăp mpăn tŏng nau dơi ngăn, Chính phủ lŏ rđau ƀư tĭng nau geh bah tơm prăk ngih dak geh nau dơi trok dĭng lĕ tơm prăk khám, săm ji đah ăp nau ji geh tât nau săm srê Covid-19, đah nŭih ntưp srê Covid-19 geh ăp nau ji êng ri tât săm ân geh trok prăk khám, săm đah ăp nau ji aơ ân geh ƀư trok tâm tĭng nau ntrŭnh bah Luật, njrăg, rdâng srê tâm ntưp, Luật bảo hiểm y tế ndrel ăp nau ntrŭnh êng bah luật geh tât. Nau ntrŭnh geh nau tam ntơm lơ 6/6/2021./.

                        Nŭih rblang: H’Thi