VOV4.M’nông: Rgop nau mpeh nau nchrăp rơh rƀŭn ndal bah Quốc hội gưl 15, Uỷ ban Rnâng kan Quốc hội lah rjăp nau geh đăp mpăn tâm di, đăp mpăn nau nchrăp luh ri mơ dơi ƀư rơh rƀŭn. Puăn nkô̆ nau nchrăp mbơh Quốc hội tâm rơh rƀŭn ndal geh: Nau nchrăp Luật ntop tay, rgâl nkra du đê̆ điều bah du đê̆ luật, Nau nchrăp ndâk trong hăn cao tốc Bắc-Nam mpeh ba dâng lvang năm 2021-2025, Nau mbơh bah Chính phủ mpeh nau kan, tơm prăk kan, prăk gay ƀư nau kơl an năn ntrŭnh Bôk nau kan ndâk ndrel hun hao văng sa, rêh jêng; Nau nchrăp nau ntrŭnh rlong leo du đê̆ nau kan, nau ƀư gay hun hao nkuăl ƀon têh Cần Thơ. Kruanh n’gâng kan, tơm văn phòng Chính phủ Trần Văn Sơn mbơh: 4 nkô̆ nau rnôk aơ hŏ tŏng mpeh nau dơi gay ma mbơh tât Quốc hội. Ta rơh tâm nchră, Kruanh Quốc hội Vương Đình Hụê tâm ban nau đă Chín phủ ndrel ăp ntŭk kan bah Quốc hội tâm rgop ân nâp gay ma tâm ban nau kan. Rnôk Uỷ ban Rnâng kan Quốc hội ndrel Chính phủ tâm ban nau prêh, mbơh Quốc hội mra geh nau tâm di nuih. Ntoh nau tâm rơh lôch rƀŭn rơh 1 tal 6, Kruanh Quốc hội mbơh: Uỷ ban Rnâng kan Quốc hội tâm ban nau ntrŭnh ƀư rơh rƀŭn ndal bah Quốc hội gưl 15, yơn lah ân geh mât đăp mpăn ăp nkô̆ nau mbơh ta Quốc hội./.

Nŭih rblang: H’Thi