VOV4.M’nông: Pơh rlau aơ, ta Ngih kan Quốc hội, đah nau ƀư tơm bah Uỷ viên Bộ chính trị, Kruanh Quốc hội Vương Đình Huệ, Uỷ ban Rnâng kan Quốc hội hŏ ntơm ntrŭnh nar rƀŭn tal 56. Ngoai tâm ăp nkô̆ nau geh rgum tâm nchră, rgop nau, nê lah nau mbơh bah Chính phủ mpeh nau kan ƀư têm nkrem, rdâng, mpŭng lir năm 2020.

            Nau mbơh uănh mpeh nau kan têm nkrem, rdâng mpŭng lir năm 2020 ân saơ: Tâm rnôk sŏk tơm prăk soay n’huch yor nau khuch bah srê nuh, nau leo dŏng tơm prăk ăp gưl mâp jêr, N’gâng kan tơm prăk hŏ kơl nchră nau ân Chính phủ, Thủ tướng Chính phủ rđau ăp n’gâng kan, ntŭk kan, nkuăl n’hao nau ƀư ăp nau kan njrăng rdâng nau mpŭng lir, têm nkrem 10% bôk nau leo dŏng prăk ƀa ƀơ, koh n’huch tơm prăk dŏng rnôk rƀŭn rgum, hăn kan, têm nkrem nau leo dŏng rnôk mô lăng khlay, ndal. Tơm prăk Trung ương têm nkrem geh nklăp 55 rbăn rmen, tâm ban 5% nau nchrăp Quốc hội jao. Ƀư rjăp nau kan, nau mêt uănh, nkân uănh nau leo dŏng prăk bah ngih dak, ƀư ân rjăp nau kan đah ăp nŭih tih, ƀư mpŭng lir tơm prăk ngih dak ân geh saơ, mêt uănh, njrăng kơp.

            Yơn lah, bah nau kan mêt uănh, nkân njrăng ndrel ma kơp nau dŏng bah Kho bạc Ngih dak saơ hôm geh nau mat, dŏng tơm prăk ngih dak ê tâm di đah nau ntrŭnh, nau dơi, nau geh tâm du đê̆ ntŭk kan, rmôt kan. Ntoh nau ta nar rƀŭn, wa Lê Thị Nga, Kruanh Uỷ ban Tư pháp bah Quốc hội ân lah, ân geh rklaih nau mhal ân rjăp đah ăp ntŭk kan, n’gâng kan, nkuăl mbrơi leo ntrŭnh ƀư bôk nau kan têm nkrem, rdâng nau mpŭng lir. Ngăn lah, rklaih ân rjăp ăp nau ƀư mpŭng lir neh ntu, choih lŭ, tơm si, dak. Êng nê, hôm geh nau ê tâm ban tâm nau kan mbơh kloh rjăp nau rvăt dŏng drăp ndơ nsum:

             ‘Phung hên ân lah, nkô̆ nau bah ăp nau hôm geh nau ê tâm ban tâm nau leo rvăt ndơ, dŏng ndrăp ndơ nsum lah tâm nau mât, rđau kan e êgh nkân njrăng lĕ ăp nau tât mô ueh păng dôl tât. Tâm nau leo rlong pah kan, nchrăp pă nŭih ƀư kan, tăch nau leo kan gay ma rvbăy drăp ndơ nsum, du đê̆ cán bộ ê geh nau gĭt kloh ngăn mpeh nau kan ƀư ăp nau ntrŭnh mpeh nau mbơh, rah vah ndrel nau kan gay ma mbơh nkoch. Nau kan mêt uănh, trêng nau ƀư nau ntrŭnh mpeh nau mbơh ân kloh, ân n’hêl ê geh ƀư ƀa ƀơ, săk tam, ê prêh. Nau kơl an ndrel nau gĭt jru tâm nau kan kơl an nau rêh mpeh nau dơi geh dĭt tât nau mhe ê âk”.

            Wa Bùi Văn Cường, Kruanh văn phòng Quốc hội ân lah, gay lŏ n’hao lơn tay nau kan n’hao nau gĭt brăng ân đảng viên mpeh nau ƀư têm nkrem, rdâng nau mpŭng lir, ăp nkuăl, ăp ntŭk kan, lŏ ƀư nau rđau nau kơp nchrăp nau kơt tĭng, nchŏng luh ăp trong, ăp nau kan n’hêl:

             ‘Gay ân geh n’hao nau kan mêt n’ôi, uănh kloh nau ƀư têm nkrem, rdâng nau mpŭng lir bah ăp ntŭk kan, nkuăl, nchŏng luh ăp nau ê dơi, tă bah nê geh ntrong kan gay ma rklaih. Ân geh ntrŭnh ân n’hêl nau leo kan n’hâl mpeh nau rklaih mhal ăp nau tih mpeh nau kan aơ, ngăn lah nau kan bah nŭih dâk bôk kŏ kơt lah nau rne enkhôm ndrel n’ăp ma nau kan cán bộ geh tât nau ƀư têm nkrem, rdâng nau mpŭng lir ri mơ dơi ƀư geh nau ueh bah nau kan”.

            Lah rjăp nau ntrŭnh leo têm nkrem, rdâng mpŭng lir lah nau kan têh tâm rnôk neh dak hôm ach o, Kruanh Quốc hội Vương Đình Huệ lah kloh, nau khuch yoor mpŭng lir ri tâm ban ma sa khâm, mô lah hôm jâk lơn đŏng. Tâm nau mbơh bah chính phủ ndrel nau mbơh mêt uănh bah Uỷ ban Rnâng kan Quốc hội, âk nkô̆ nau hôm nsum nsum, geh tât nau kan knŭng ƀư ma mô tam, ê geh hăn lăp ngăn tâm nau rêh, hôm geh nau goam, der. Kruanh Quốc hội Vương Đình Huệ đă, mbơh nau Chính phủ ndrel mbơh nau mêt uănh mpeh nau ƀư têm nkrem ndrel rdâng nau mpŭng lir ân geh tâm dăch ma nau kan ƀư têm nkrem ndrel rdâng nau mpŭng lir bah năm 2020, ngăn lah tâm ăp nau kan: tơm prăk, ngân sách, tín dụng, drăp ndơ, neh ntu, lŭ choih, ntŭk ntu ndrel nau kan têm mông nar, n’hao nau dăng pah kan…Rklaih ngăn ntŭk kan mô blau kan, ngân hàng mô blau kan. Tâm nau kan nsum ri ân geh uănh kloh mpeh nau kol tâm nau rgum, ntuh kơl bah ntŭk kan tăch rgâl, ƀư nau têm nkrem tâm ƀon kan:

             ‘Lơh rdâng đah nau sa khâm ri ngăn lah ƀư hôm, yơn ân geh nsum ma nau kan ân geh têm nkrem ndrel rdâng nau mpŭng lir. Ăp nau khuch aơ ê geh nkoch tât nau geh tât mông pah kan. Ăp nŭih ân geh ntoh ngăn ăp nau dơi bah nơm tă dơi geh ƀư tâm nau kan dăp rgum, ƀư tay nau n’huch biên chế, ngăn lah ăp nkuăl ƀư ueh ngăn.  Âk nkuăl rnôk aơ rnoh geh dŏng ri vay geh n’gul, nau ntuh kơl ri kŏ tât n’gul. Du đê̆ ntŭk kan, nau kan ƀư ueh mô lah nau kan geh tât nau koh n’huch ăp nau kan geh mêt uănh nau kan, phung he ân geh leo tâm nau mbơh aơ, mât tâm dăch tâm Luật ƀư nau kan têm nkrem, rdâng sa khâm, mât tâm dăch nau ntrŭnh mrô 166 lơ 23 khay 1 năm 2020”./.

                                    Nŭih rblang: H’Thi