VOV4.M’nông – Tâm rnôk ta rơh rƀŭn tal 2 bah Ủy ban Thường vụ Quốc hội, UBTVQH lĕ uănh mĭn tay nău dăn đă groi nđôi bah Hội đồng Dân tộc mpeh nău tâm pă n’har nkual yôk, nkual prêh tâm mât uănh nghih dak aƀaơ. Kruanh n’gâng kan, Chủ nhiệm Ủy ban Dân tộc Hầu A Lềnh an gĭt: Rnôk Quốc hội an Nghị quyết 88 uănh an bôk nău tâm rgop tâm nchră lĕ rngôch hun hao wăng sa rêh jêng nkual rnoi mpôl đêt n’hanh nkual yôk lvang 2021-2030, Thủ tướng Chính phủ lĕ an Nău ntrŭnh 33 mpeh rnoh ndơ ƀư tâm pă n’har nkual rnoi mpôl đêt n’hanh nkual yôk tĭng nău hun hao lvang 2021-2025, tâm nĕ ntrŭnh, ăp xă geh tâm nkual yôk n’hanh nkual prêh geh tâm sam ƀŭt săk Kôp rnoh ntil ndơ ƀư, yơn mpeh pháp lý mô hŏ geh Nghị quyết rgâl. Ủy ban Dân tộc dăn đă UBTVQH jao an Hội đồng Dân tộc, Ủy ban Dân tộc n’hanh ăp n’gâng kan, nău kan geh tât uănh tay mpeh nău pháp lý, uănh lah nău tâm pă nkual yôk, nkual prêh na nê̆ lơn gay ntop tay nău tâm pă ăp xă tĭng dơi hun hao.

Nŭih rblang: Y Sưng Phê Ja