VOV4.M’nông: Ndâk njêng nau nâp mpeh nau đăp mpăn tâm ƀon lan, ntrŭt jăng lơi ăp phung tih dôih, bonh đă nŭih ƀon lan jao ndơ̆ ma rhiăng ntil ndrak nsiu, ndơ rtoh, nê lah ăp nau ntoh lư ngăn ntơm rnôk rmôt kan công an chính quy sĭt pah kan tâm ăp xã nkuăl n’har bri bah Tuy Đức, n’gor Dak Nông.

Rklaih nau kan ân ngăch, nâp ngăn, nê lah nau ndơn saơ bah kônh wa ăp ƀon tâm Quảng Trực rnôk nkoch tât cán bộ công an chính quy sĭt pah kan tâm xã n’har bri aơ. Yuh Thị Bơi, tâm ƀon Bu Prăng 1, xã Quảng Trực, nkuăl Tuy Đức, ntoh nau rnơm ngăn đah rmôt công an xã jêh nau tât bah rnăk vâl nơm:

‘Rnăk hên bah năp nơh geh du hê nŭih nhul ndrăng păng ndjôh ngăn yeh ŭch sreh ngăn oh nur ngih hên. Ndri lah gâp kuăl điện ân công an xã ndrel rmôt ƀư nau kan bah tahen biên phòng. Bol ma ngih gâp ngai đŏng ma xã, ma ê tât 10 mnĭt hŏ saơ hôm ăp nô nê tât ta aơ. Geh ngăn cán bộ công an chính quy ri nau mât đăp mpăn ueh ngăn, lah moh nau geh tât ri ăp nŭih công an nê mra tât năn ngăn”.

Yuh Vũ Thị Mỹ Duyên, tâm ƀon Dak Huýt, xã Quảng Trực mbơh, kônh wa đăp mpăn ngăn rnôk geh công an xã chính quy:

‘Lah nsum lah mpeh nau mât đăp mpăn rnă njrăng ri ueh lăng âk ngăn. Ăp nŭih ƀư công an kŏ gơih kơl an ƀon lan, bol ma moh rnôk hên tât moh geh nau kan kuăl tât lah khân păng nê tât năn ngăn ndrel kơl rklaih nau kan ngăch ngăn”.

Wa Điểu Drây, kruanh ƀon Bu Prăng 1, mbơh, kônh wa rnoi mpôl đê̆ ta nkuăl aơ ri mô geh săm ƀŭt khai sinh ndrel mô tŏng âk ntil săm ƀŭt êng ngăn. Cán bộ công an xã hŏ tât ăp ngih, ntĭm ân kônh wa mbơh ân tâm di, ân tŏng gay ma ƀư thẻ căn cước công dân:

‘Rnôk kônh wa ƀư lah geh nau nkol ôp oh nô công an xã, ri oh nô tât nkoch mbơh, nkah đă ntĭm nti ân kônh wa moh ntil săm ƀŭt nơm ŭch, moh nau nơm ƀư. Oh nô công an xã sĭt tâm nkuăl ri gâp saơ ueh ngăn”.

Tĭng Đại uý Trần Văn Dũng, Kruanh công an xã Quảng Trực, 6 nŭih cán bộ công an chính quy ri ăp nŭih geh ntĭm nti nau blau kan êng êng, yơn rnôk sĭt tât xã ri ăp nô geh kơt nti, tâm kơl, gay ăp nŭih kŏ geh dơi ƀư ăp nau kan tâm mpeh ba dâng. Ndrel ma nau kơl nchră nau ân gưl uỷ n’gâng kan mât rnă njrăng đăp mpăn tâm nkuăl n’har bri, công an xã Quảng Trực hŏ geh ndâk nâp nau rnơm bah nau mât đăp mpăn tă bah ăp ƀon:

‘Phung hên tâm rgop nsum đah đoàn viên druh ndăm công an n’gor pă ân kônh wa 1000 móc khoá, tâm nê geh nchih mrô điện thoại bah kruanh công an xã, Groi kruanh công an xã ndrel oh nô ƀư nau kan hình sự công an nkuăl Tuy Đức gay kônh wa mbơh ân ngăch ăp nau kan geh tât phung tih dôih. Êp nê ri phung hên kŏ tâm rgop nsum đah tahen biên phòng ndâk ƀư ăp rmôt kan mât njrăng tâm nkuăl n’har bri gay ma nkre mât đăp mpăn ân nkuăl nkre ƀư ueh ăp ntŭk njrăng rdâng lah geh phung tih dôih tâm nkuăl. Ri bah ăp nau kan kơt nê ri mhe nơh hên geh âk nau gĭt saơ ngăch 2 tŏ phung ntŭng ndeh hon-đa”.

Nau kan nâp bah rmôt công an chính quy sĭt xã hŏ rgop nau ƀư ueh nuih n’hâm đăp mpăn tâm ƀon lan tâm nkuăl n’har bri Quảng Trực, ntŭk geh tât 17 rnoi rêh nsum tâm rnoh rlau 60 rbăn ha neh. Wa Điểu Plơu, Groi Kruanh UBND xã Quảng Trực, mbơh:

‘QuảngTrực lah xã n’har bri jêr ngăn, ngăn lah trong hăn ri jêr tâm yan mih, ƀon lan rêh tâm ƀah ngai, nkuăl hvi, ri ma nau kan mât kŏ jêr đŏng. Nkoch tât mrôt công an chính quy sĭt xã ri ueh ngăn tâm ban ma nau ŭch tâm nau ƀư pah kan kŏ kơt lah kơl mbơh nau ân gưl uỷ n’gâng kan bah nkuăl. Rơh rlau aơ gâp saơ lah rđil ntơm nơh ri nau đăp mpăn chính trị tâm xã Quảng Trực ueh, nkuăl lơn ma hun hao”.

Thượng tá Nguyễn Sử, Kruanh công an nkuăl Tuy Đức mbơh, ƀư tĭng bôk nau kan bah N’gâng kan Công an, ăp lĕ 6 xã tâm nkuăl hŏ geh pă 41 công an chính quy tât pah kan. Nau tă geh ntoh ngăn lah rnoh phung tih dôih hình sự hŏ n’huch ngăn. Nkre rmôt kan công an hŏ bonh đă nŭih ƀon lan jao 130 n’gâr phao ndrel bơi tât 700 grăp ndrak ăp ntil. Thượng tá Nguyễn Sử, nkoch tât nau blau nau mât nau kan tâm nkuăl n’har bri:

‘Nau blau tă geh gĭt nê lah mhâm ƀư dơi rgum ăp nŭih ƀon lan gay ma ndâk du nuih n’hâm đăp mpăn ân ƀon lan nâp nâl tâm nkuăl n’har bri. Ta aơ ri phung hên hŏ nkoch trêng ân ƀon lan gĭt ăp nau kan nau tih bah phung tih dôih kŏ kơt lah rgum nŭih ƀon lan ndâk ăp rmôt kan rnă njrăng gay ma ndrel đah rmôt công an đăp mpăn rnă njrăng. Ngăn lah tâm trong n’har bri ri rơh rlau aơ nau kan công an chính quy sĭt kan tât ăp xã aơ kŏ ƀư ueh nau kan kơl mbơh nchră nau ân n’gâng kan tâm nkuăl rgum lam ntrong kan chính trị đăp mpăn rnă njrăng ntơm tâm dâng, tâm nê ăp nŭih công an ân geh ntrŭnh hăn pah kan tâm dâng, hŏ ƀư nau tâm rgop kan nsum đah đồn biên phòng ƀư ueh nau mêt uănh, đăp mpăn rnă njrăng tâm nkuăl n’har bri”.

Kan leo công an chính quy sĭt pah kan tâm ăp xã tâm nkuăl n’har bri Tuy Đức, n’gor Dak Nông hŏ ƀư rjăp lơn tay nau săk tam tâm nau mât đăp mpăn chính trị, đăp mpăn nau rêh jêng ƀon lan, Rmôt kan công an chính quy pah kan blau tă bah tâm dâng hŏ ndơn geh nau rnơm ŭch rŏng bah ƀon lan, rgop nau ndâk nâp lơn tay nuih n’hâm rnă njrăng đăp mpăn tâm nkuăl n’har bri./.

Nŭih rblang: H’Thi