VOV4.Sêdang - Hâi lơ 29/9, klêi tối ai 2 ngế a cheăm Ea Kao, pơlê kong kơdrâm Ƀuôn Ma Thuột test răng ăm ‘nâi hlo yương tĭnh ƀă SARS-CoV-2,  kơvâ ngăn pơkeăng Dak Lak hiăng rĕng hdró kơpong, tăng xiâm ngế ki achê,  ăm ‘nâi ai 17 ngế test rĕng hlo yương tĭnh ƀă SARS-CoV-2. Mê cho a kơxo lơ 29/9, pôa Q.V.T ƀă kơdrâi pôa cho jâ B.T.T rơtế ối a thôn Cao Thắng, cheăm Ea Kao, pơlê kong kơdrâm Ƀuôn Ma Thuột troh a Hngêi pơkeăng Đại học Tây Nguyên khăm ngăn. A kố, klêi test rĕng  ăm ‘nâi, tŭm péa ngế pôa prếi jâ mê xuân  yương tĭnh ƀă SARS-CoV-2.

Mâu ngế ngăn pơkeăng test rĕng ăm kuăn pơlê a thôn Cao Thắng

Tiô tối ăm ‘nâi hâi prếi prôk lăm, sap lơ 17/9 troh lơ 29/9, jâ B.T.T prế pôa Q.V.T pêi chiâk a buôn Tơng Jŭ, prôk hên tíu trâm hên ngế, tung mê, ai prôk a mâu hngêi pơkeăng cheăm, mot a kuăn kơphế.... Tơbleăng hbrâ mơdât pơreăng, khu râ kơvâ cheăng hiăng pơkâ kring gak hngêi ối ƀă chiâk dêi rơpŏng hngêi pôa Q.V.T rơtế ƀă mâu tíu ki prếi troh tung pơla hdrối mê.