VOV4.Sdang - Hâi lơ 12/10 a cheăm Dur Kmăn, tơring Krông Ana, kong pơlê Dak Lak hiăng châ hlo 1 khu ngế tro tâ COVID-19 tung pơlê pơla tá hâi ‘nâi xiâm kối tâ tú. Hdrối mê, 11/10 jâ N.T.A troh hngêi pơkeăng cheăm Dur Kmăn khăm pơlât ƀă châ khăm test rĕng COVID-19, mê yương tĭnh ƀă SARS-CoV-2. Klêi kơ’nâi châ hlo yương tĭnh test rĕng dêi jâ N.T.A, Tíu xiâm ngăn pơkeăng tơring Krông Ana hiăng ti tăng, tôe xo têa môh mâu ngế ki tơdjâk ƀă mơnhên tơ’nôm 14 ngế  khăm ngăn rĕng châ hlo yương tĭnh ƀă SARS-CoV-2.

Mâu ƀok thái pơkeăng tôe xo têa môh test rĕng ăm kuăn pơlê ƀuôn Dur 1

Kơhâi dế lơ 12/10, 15 ngế ki test rĕng pơrá ăm hlo tiô Realtime RT-PCR yương tĭnh ƀă SARS-CoV-2. Kơvâ ngăn pơkeăng ƀă khăm pơlât tơring Krông Ana hiăng tơkŭm test rĕng ăm dâng 1.000 ngế kuăn pơlê dêi ƀuôn Dur 1, cheăm Dur Kmăn, khu râ kăn pơkuâ xuân hiăng pơtân kâng kơxái mơdât ôh tá ăm kuăn pơlê lo pa gong a đô̆i 3, ƀuôn Dur 1, cheăm Dur Kmăn ƀă mơjiâng 4 tíu gak vâ séa ngăn kuăn pơlê ƀă rơxế mot lo a kơpong ai pơreăng.

A Sa Ly tơplôu ƀă tơbleăng