VOV4.Sêdang - Tơdroăng ing Khu hnê mơhno hbrâ mơdât COVID 19 kong pơlê Dak Lak, hâi lơ 22/7, lâp kong pơlê châ hlo tơ’nôm 10 ngế yương tĭnh ƀă SARS-CoV2, mơdêk kơxô̆ mơngế tro tâ pơreăng tung kong pơlê tâk 47 ngế. Tung kơxô̆ 10 ngế yương tĭnh nếo ai 4 ngế a cheăm Ea Bung, tơring Ea Súp, cho F1 dêi khu pơreăng a cheăm kố; 1 ngế a pơlê kong kơdrâm Ƀuôn Ma Thuột, cho F1 inâi cho N.T.H a hngêi rơxế Tiến Oanh; 3 ngế a cheăm Ea Ktur, tơring Čư Kuin, cho F1 dêi khu pơreăng châ hlo hdrối mê.

Hên tíu kâng kơxái klâ kơtăn xua tơdjâk ngế ki tro tâ pơreăng F0

Pakĭng mê, a tơring Ƀuôn Đôn xuân châ hlo môi ngế tro tâ pơreăng cho T.N.B.T, kot mâ hơnăm: 2012, ối a thôn 2, cheăm Čuôr Knia, tơring Ƀuôn Đôn, cho tro pơreăng vêh ing kong pơlê Bình Dương. A tơring Krông Ƀuk xuân châ hlo ngế apoăng yương tĭnh ƀă SARS-CoV2. Ngế tro tâ pơreăng cho V.T.P.K, kot mâ hơnăm 1992, ƀuôn AĐrơng Điết, cheăm Čư Pơng, cho kuăn pơlê ai tro pơreăng vêh ing kong pơlê Bình Dương.

Tiah mê, troh kơxê lơ 22/7, lâp kong pơlê Dak Lak hiăng ai 11/15 tơring, pơlê krâm, pơlê kong kơdrâm châ hlo mâu ngế yương tĭnh ƀă SARS-CoV-2.

A Sa Ly tơplôu ƀă tơbleăng