Dak Lak: ‘Mâi rơnêu tíu ki tro xâu xía, tơring Krông Buk mơ-eăm mơdât pơreăng
Thứ tư, 09:43, 08/09/2021

VOV4.Sêdang - Ai lối 260 ngế ki tro tâ pơreăng COVID-19 dế châ mơnhên tối bu tâ rĕng tung to lâi hâi, tơring Krông Ƀuk cho tíu ki ai kơdrâm kuăn pơlê tro tâ pơreăng COVID-19 ó má môi dêi kong pơlê Dak Lak. Ki xiâm khoh chiâng ai tơdroăng kố, cho ai tơdjâk hên troh tíu ki tâ tú pơreăng a ƀuôn Drao, cheăm Čư̆ Nĕ. Xua vâi krâ-nhŏng o akố ôh tá vâ rak vế tro tiô tơdroăng pơkâ 5K tung hbrâ, tơplâ, mơdât pơreăng. Dế nôkố, Krông Ƀuk dế thăm rĕng séa ngăn têa môh, têa hế, vâ rĕng teăm châ ‘nâi mơngế ki ai pơreăng, thâ rĕng ăm klâ ối krê, hnối rak ngăn, hnê tối kuăn pơlê vâ kơ vâi tơniăn tung pơla ăm klâ ối krê, veăng kơdroh tơdroăng tro tamo châi.

 

Lăm troh a ƀuôn Drao, cheăm Čư Nĕ, tơring Krông Ƀuk rôh má 2 ngin hlo nhên tơdroăng ki kơchăng tung trâm mâ tơpui ƀă mơngế ki ôh chói hlo, mơngế ki tơviah ƀă hlo ki tô tuăn xâu rơ-iô ‘na pơreăng ngăn a mâ dêi rêm ngế a kuăn pơlê a tíu khăm ngăn vâ rĕng ‘nâi hôm tâ pơreăng COVID-19. Rơtâ tá tíu khăm xo ngăn túa mê, ai hên hngêi trá xón péa klĭng, rơhĭng rơhối ôh tá tâng ai mơngế, ngăn ing kĭng mum hngêi hlo trŏng xăng hiăng tum, tơdrá trá ăm tiăn hếo hlo to plâi rơmôe kơbâng la ôh tá ai ngế kêi, krí. Xúa ngế ki pêt mê cho mâu F0 hiăng djâ lăm pơlât COVID-19.

Pôa Y Krŭ Ayun, kăn phŏ hnê ngăn Chi ƀộ, ngế pơkuâ cheăng Măt trâ̆n ƀuôn Drao ăm ‘nâi, 155 ngế F0, ƀă lối 300 ngế F1, vâ tối châ 1/3 kơxô̆ mơngế tung pơlê thế lăm pơlât ƀă lăm klâ ối kơtăn tơchoâm cho tơdroăng ki hên ngế ôh tá vâ. Ki xiâm tơdroăng xo ngăn têa môh ing tơdroăng ai mâu ngế tơkŭm ôu kâ ƀă nhŏng o vâi, nhŏng o tung pơlê vâi ki rơtế veăng ôu. Mâu hâi hdrối, mâu khu tung pơlê tơrŭm ƀă mâu khu lăm pêi cheăng, tôh COVID-19  tung kuăn pơlê lăm pôu tơrêm hngêi hnê tối ăm kuăn pơlê pôi tá ối tơkŭm krâm mơngế, thế pro kơtăng tiô pơkâ 5k vâ hbrâ mơdât pơreăng. Ƀă troăng rơhlâ  ‘’hnê đi đo, hnê puk pak ah kuăn pơlê kô hlê kô tơmâng xo‘’, tâi tâng vâi krâ nhŏng o tung pơlê hiăng plĕng ƀă pêi pro tro tiô pơkâ.

‘’Nôkố tiô khôi túa tơlá dêi pin lâp pơlê, lâp tơring lâp cheăm tâng vâ pơchông ƀă hdrối nah cho ôh tá chiâng. Hdrối nah, cho tơ-ê, nôkố cho tơ ê xua dế tung pơla dế ai pơreăng tâ tú tiah kố. Kơdroh tâi, mơdât tâi, tâng lơ ai ngế hlâ lơ tơdroăng ki kố ki mê cho kơdroh pơtâi, oh tá xê môi tiah hdrối nah xếo. Sap ing châ ‘nâi ai pơreăng ki kố, vâi krâ nhŏng o tô tuăn ‘nâng, vâi krâ nhŏng o ối rak vế pêi pro kơtăn hơngế tâ nếo’’.

 

 

Pôa Y Krŭ Ayun dế hnê ăm kuăn pơlê pêi pro tro 5K vâ hbrâ mơdât pơreăng COVID-19

 

Pôa Trần Thuận, Ngế pơkuâ Hngêi pơkeăng tơring Krông Ƀuk ăm ‘nâi, tung 2 măng tĭng hdrối mâu ngế cheăng khăm pơlât hiăng mơ-eăm po rơdâ tăng khăm ngăn tung kuăn pơlê rôh má 1. Ing mê, hiăng khăm ngăn lối 6.000 ngế kuăn pơlê a mâu cheăm Čư Nĕ ƀă Čư Kpô. Tung pơla dế pơkâ klâ kơtăn mâu thôn pơlê  ƀă lâp tơring dế pêi pro tiô pơkâ 16 dêi ngế pro xiâm hnê ngăn Chin phuh, kơvâ ngăn pơkeăng tơrŭm ƀă mâu ngế cheăng séa ngăn mâu kơpong kuăn pơlê ối ‘’gak kơtăn tung pơlê ƀă pá gong’’, ƀă pơtối xo ngăn rôh má 2 a mâu pơlê cheăm tíu ki ai hên ngế tâ pơreăng. Tung pơla khăm ngăn krếo inâi tơrêm rơpŏng, ôh tá chiâng lôi ngế ki lâi vâ tăng F0 lo ing kuăn pơlê.

Pôa Trần Thuận, ăm ‘nâi, nôkố tơring Krông Ƀuk dế mơjiâng  tơdroăng pơkâ test rĕng vâ ‘nâi SARS-CoV-2 ăm tâi tâng kuăn pơlê, tung mê rĕng khăm ngăn hdrối ƀă 4.000 ngế kuăn pơlê a kơpong peăng kơnhŏng dêi tơring, tíu ki dế ối tơdế ai péa pâ  cheăm ki dế ai pơreăng:

‘’Nôkố peăng pa kơnhŏng dêi tơring Krông Ƀuk dế ối tơdế pơla 2 kơpong ki ai pơreăng cho Ea Nam ƀă Čư Nĕ ƀă nôkố ai mâu kuăn pơlê ối kreăng tơdế kơpong ki mê la hâi ai ngế tâ pơreăng… Vâ tối ai môi hâi ki lâi ah ‘lo kô  trâm dêi rơpó xua tơdroăng cheăng pơla pơlê kố ƀă cheăm ki ê, mê chiâng ăm thế test rĕng tung kuăn pơlê vâ rĕng châ ’nâi rĕng klâ ăm lăm pơlât’’.

 

 

Ngế cheăng ngăn pơkeăng pơlât khăm xo ngăn rĕng 2 hdroh  ăm kuăn pơlê ƀuôn Drao

 

Riân troh nôkố, tơring Krông Ƀuk hiăng ai lối 260 ngế tâ yương tĭnh ƀă SARS-CoV-2. Tung mê, ki vâ tối cho 2 tíu ai hên ngế tâ tú a cheăm Čư Nĕ ƀă Čư Kpô. Krê to a cheăm Čư Nĕ hiăng ai 202 ngế F0, ki hên tơkŭm to a ƀuôn Drao ƀă ƀuôn Ktơng Drun. Tiô pôa Hoàng Kiên Cường, kăn hnê ngăn Vi ƀan tơring Krông Ƀuk, hlo mâu tơdroăng ‘na pơreăng COVID-19 tâ tú rơ-iô, tơring hiăng hnê mơhno ăm mâu khu tơrŭm cheăng, khu grup, mâu kăn cheăm tơring ƀă mâu pơkâ kơtăn séa ngăn, hdró kơpong tíu ki tâ pơreăng thế hơlêm, tí tăng ‘nâi plĕng tơdroăng púi vâ dêi kuăn pơlê  ƀă kum kuăn pơlê phái, kơchâi kâ teăm tơdrêng vâ kuăn pơlê hmiân tuăn pêi pro klâ ối kơtăn.

Tơdrêng amê, tơring mơjiâng tôh pêi cheăng veăng kum kuăn pơlê tê tơmeăm pêi lo ing chiâk deăng môi tiah plâi bơr, sầu riêng tung rơnó tâ pơreăng. Tơring xuân ăm phêp mâu rơpŏng tê mơdró rah mâu ngế lăm rôe tơmeăm pêi lo dêi kuăn pơlê, ƀă tơdroăng thế ai hlá mơ-éa hiăng klêi khăm ngăn hlo âm tĭnh ƀă SARS-CoV-2.

‘Na mâu troăng rơhlâ vâ kâi mơdât pơreăng COVID-19, pôa Hoàng Kiên Cường ăm ‘nâi:

‘’Tơring kô mơdêk tơdroăng cheăng tối tơbleăng, má péa cho mơdêk séa ngăn tí tăng ‘nâi, má má pái thế rah kăn ƀô̆ lăm séa ngăn a mâu thôn vâ pro ti lâi vâ rơtế ƀă mâu khu cheăng dêi cheăm ƀă tá khu cheăng kal kí vâ pêi tro tơdroăng rak ngăn kơtăng kuăn pơlê thế tơniăn mơngế, ki lâi ối ulâi thế ối amê vâ tơdroăng cheăng hbrâ mơdât pơreăng dêi  tơring châ tơ-ƀrê tâ’’.

Rơtế ƀă tơdroăng môi tuăn dêi kuăn pơlê, mâu tơdroăng mơ-eăm dêi kơvâ ngăn pơkeăng ƀă tơdroăng veăng tơmâng kơtăng khât dêi mâu kăn pơlê cheăm tơring, tơngah tơring Krông Ƀuk  kô rĕng kâi mơdât pơreăng COVID-19, pro ăm tơdroăng rêh ối kuăn pơlê châ hơniâp lĕm.

Nam Trang chêh

Gương tơplôu ƀă tơbleăng

Viết bình luận

TIN CÙNG CHUYÊN MỤC