VOV4.Sêdang - Mâu hâi khế achê pơla kố ai lối chât  rơpâu ngế ing mâu kong pơlê kơpong Peăng Hdroh prếo vêh a Dak Lak. Mâu khu ki hbrâ tơplâ mơdât COVID tung pơlê pơla hiăng mơnhông tơdroăng ki pêi pro châ tơbrê, hnê mơhno ƀă seá ngăn kuăn pơlê tung rak vế hnoăng ki hbrâ, tơplâ, mơdât pơreăng tung rơpŏng hngêi.

Ƀuôn Hluk, cheăm Ea Tiêu, tơring Čư Kuin, kong pơlê Dak Lak nếo ai vâ chê péa chât ngế kuăn pơlê ing mâu kong pơlê peăng Hdroh tơnêi têa prếo vêh, thế klâ kơtăn a hngêi. Pôa Y Nguă Ƀuôn Yă, tôh trương tôh mơdât pơreăng COVID-19 pơlê pơla ƀuôn Hluk tối ăm ‘nâi: tôh ôh tá xê to séa ngăn mơngế klâ kơtăn a hngêi krê lơ a rơkôp chiâk deăng, mê đi đo pơchân tối rêm ngế tung pơlê kơdroh prôk lăm, trâm mâ, pêi pro kơtăng pơkâ 5K.

Pôa Y Nguă ai kuăn kơdrâi ƀă dôh nếo ing kơpong ai pơreăng vêh a pơlê  xuân pêi pro môi tiah mê:

“Kuăn kơdrâi ƀă dôh lăm pêi cheăng a Bình Dương vêh cho ai pơkâ dêi Vi-ƀan cheăm klâ kơtăn 14 hâi a hngêi, cho yôh ôh tá chiâng lo pa gong, ôh tá chiâng trâm mâ nhŏng o tung pơlê. On veăng má thế ối hngêi krê, klâ kơtăn bu ai 2 on veăng kuăn á tê. Ƀă phái, têa ô, tơmeăm kâ kal ki klâi mê krếo phôn, klêi mê á djâ ăm troh ăm kuăn, xuân ôh tá trâm mâ ối achê’’.

Tôh COVID-19 pơlê pơla ƀuôn Hluk

Ƀuôn Hluk ai dâng 150 rơpŏng kuăn pơlê laga ai troh 5 tôh COVID-19 pơlê pơla. Mâu tơdroăng ‘na pơreăng đi đo rĕng châ ‘nâi, ƀă tơdroăng pơtâng tối đi đo dêi mâu khu cheăng, vâi krâ tung pơlê hiăng plĕng pêi pro tiô pơkâ 5K (5 thế) hbrâ mơdât pơreăng. Môi tiah tơdroăng mơdâm kiâ, vâi krâ pêi pro tơ’lêi, kơdroh kơxô̆ mơngế troh ngăn.

Pôa Y Sách Ƀkrông, Kăn pơkuâ ƀuôn Hluk tối ăm ‘nâi:

‘’Hlâ hâi kố mê kơxo ah vâi ‘mé tê. Vâi krâ troh lăm ngăn mê vêh, ôh tá ối ngăn ton. Pơ’lêh hên ‘nâng, rĕng ‘nâng, ôh tá tâi liăn, hên hâi, hên chôu xếo. Xua hbrâ mơdât pơreăng ƀă ki lâi pá puât mê tah lôi tê. Nôkố tâng mơdon tung 3 – 4 hâi, rế hên hâi kơxô̆ liăn rế hên. Má  péa nếo vâi xuân hlê plĕng, ki kố rơpŏng ai to lâi mê pêi to mê, nhŏng o achê nếo ối ngăn tê, ôh tá tơkŭm kơdrâm mơngế xếo’’.

Mơjiâng khu hbrâ mơdât pơreăng ing tung rêm pơlê

Tơring Čư Kuin cho tíu apoăng a kong pơlê Dak Lak ai pơreăng COVID-19 tung mâu pơlê mơngế hdroâng kuăn ngo. Tơring hiăng châ tơ-ƀrê mơdât pơreăng, pro ăm ‘’tơniăn tiah hmâ nếo’’ sap mơ’nui khế 8. Vâ kuăn pơlê đi đo hlê plĕng pêi pro kơtăng hbrâ mơdât pơreăng, mâu tôh COVID-19 pơlê pơla cho mâu ngế ki troh achê séa ngăn, tơdrêng rêm hâi pơtâng tối, séa ngăn, pơchân tối.

Rêm tôh môi tiah mê sap ing 4-5 ngế, cho mâu ngế ki kuăn pơlê loi tơngah tung pơlê pơla, đảng viên, kăn ƀô̆ mâu khu râ, khu râ kăn pơkuâ cheăm: Pôa Y Min ÊÑuôl, Kăn pơkuâ hnê ngăn cheăng Đảng ủy cheăm Ea Tiêu, tơring Čư Kuin tối:

‘’Xing xoăng rêm ngế pơkuâ môi kơpong, môi thôn pơlê. Tơdroăng séa ngăn tôh pơlê pơla thế tơbleăng ƀă Vi-ƀan cheăm, khu hnê mơhno má môi Đảng ủy, tôh, thôn, pơlê ki lâi ôh tá pêi pro kơtăng mê thế tơbleăng teăm tơdrêng vâ ai troăng pơxâu phâk, tơpui hnê tối. Tôh pơlê pơla mê nhŏng o lăm pêi cheăng tá kong tô, kong mêi, kơmăng, xua mê pơla kố nah tôh COVID-19 pơlê pơla pêi tơtro ‘nâng’’.

Pôa Lê Thái Dũng, Kăn pơkuâ hnê ngăn cheăng Đảng tơring Čư Kuin tối ăm ‘nâi: Bu tung 1 măng tĭng, tơring ai lối 1.000 ngế kuăn pơlê vêh ing mâu kong pơlê peăng Hdroh tơnêi têa. Tung pơla pơreăng xông tâ tú ó, kal pêi kơtăng tâ mê, tơring hiăng mơjiâng troh 547 tôh COVID-19 pơlê pơla. Nôkố mâu tôh COVID-19 pơlê pơla dế pêi châ tơ-ƀrê tơdroăng séa ngăn, klâ kơtăn mơngế vêh a pơlê.

‘’Mơjiâng 547 tôh COVID-19 pơlê pơla tâi tâng tơring vâ klâ kŭn, rêm tôh COVID-19 mê cho bu pơkuâ 20 – 30 rơpŏng tê mê tơdroăng séa ngăn, châ ‘nâi, ki má lối cho mơngế pêi cheăng ing mâu kong pơlê peăng Hdroh tơnêi têa, a kơpong pơreăng vêh a pơlê xiâm mê thế mơnhông tôh pêi cheăng kố, ki rơhêng vâ tối cho a tung mâu pơlê. Čư Kuin tơmiât nhên ‘’Plâ mơdât pơreăng tiô túa utâi u tá’’, mê cho thế klâ ku kŭn, ing thôn, pơlê klêi mê nếo troh cheăm, klêi mê tâng pá ‘nâng nếo djâ a tơring’’.

Tơdroăng mơjiâng khu ki mơdât pơreăng sap ing tung rêm pơlê, rơtế ƀă mâu troăng pêi kơtăng, hiăng kum tơring Čư Kuin môi khế tơdế hiăng hluâ ôh tá ai ngế tro tâ COVID-19 tâ tú tung pơlê pơla.

VOV Tây Nguyên rah chêh

A Sa Ly tơplôu ƀă tơbleăng