VOV4.Sêdang - Hlo ôh tá tơniăn dêi pơreăng COVID-19 drêng sap ing hâi lơ 15/9 troh nôkố, pơlê kong krâm Ƀuôn Hồ, kong pơlê Dak Lak, pơtối ‘nâi mâu tíu ki ai hên ngế tâ pơreăng COVID-19 tung pơlê pơla tá ‘nâi nhên xiâm kối tâ tú, kơxê lơ 17/9, Khu ngăn pơkeăng ƀă khăm pơlât kong pơlê Dak Lak hiăng tơrŭm ƀă Tíu xiâm ngăn pơkeăng ƀă khăm pơlât pơlê kong krâm Ƀuôn Hồ, kong pơlê Dak Lak tơbleăng toê xo têa môh séa ngăn pơreăng tiô túa pơkâ test rĕng ƀă séa ngăn RT-PCR ƀă mâu kuăn pơlê a 4 to bêng dế cho kơpong ki ai hên ngế tâ a pơlê kong krâm Ƀuôn Hồ.

Khu ƀok thái pơkeăng tôe xo têa môh vâ séa ngăn, hbrâ mơdât pơreăng COVID-19 a pơlê kong krâm Ƀuôn Hồ

Tiah mê, sap ing hâi kố lơ 18/9, kơvâ ngăn pơkeăng ƀă khăm pơlât kô pêi pro toê xo têa môh séa ngăn pơreăng a 4 to bêng a pơlê kong krâm Ƀuôn Hồ mê cho: Bêng An Lạc, An Bình, Thiện An ƀă Đạt Hiếu. Tung pơla toê xo têa môh kô po tung 7 hâi sap ing hâi lơ 18/9 troh lơ 24/9. Tiô tối hdrối ai dâng 33.077 ngế/8.917 rơpŏng châ toê xo têa môh séa ngăn tung rôh kố.

Riân troh kơxê lơ 17/9, pơlê kong krâm Ƀuôn Hồ ‘nâi ai 180 ngế yương tĭnh ƀă SARS-CoV-2, 1 ngế hlâ. Ki rơhêng vâ tối, sap ing hâi lơ 15/9/2021 troh 17 chôu hâi lơ17/9/2021 pơlê kong krâm Ƀuôn Hồ pơtối ‘nâi ai 47 ngế tâ COVID-19 ƀă mâu tíu ki ai hên ngế tâ ai tơdjâk troh mâu tíu ki tê roê mâu kế tơmeăm pêi lo ing chiâk deăng, plâi kâ a pơlê kong krâm.

Katarina Nga tơplôu ƀă tơbleăng