VOV4.Sêdang - Tơdroăng ăm ‘nâi sap ing Khu hnê mơhno hbrâ mơdât pơreăng a mơngế kong pơlê Dak Nông, 12 ngế ki ối achê ƀă ngế ki tâ pơreăng 28474 a tơring Krông Nô, hiăng ‘nâi âm tĭnh rôh má 1 ƀăng tơdroăng ki séa ngăn RT-PCR. Hdrối mê, kơxo hâi lơ 11/7, kong pơlê Dak Nông ‘nâi ai ngế ki tâ Covid-19 cho kơdrâi tâ pơreăng 28474, ối a tơring Krông Nô, vêh sap ing Pơlê kong kân Hồ Chí Minh. Klêi kơ’nâi châ ‘nâi ngế ki tâ pơreăng kố, kơvâ ngăn pơkeăng ƀă khăm pơlât Dak Nông hiăng tơbleăng tơdrêng tơdroăng ki séa ngăn, tí tăng klâ ăm ối krê, pâk xo mơheăm dêi mâu ngế ki ối achê ƀă ngế ki tâ pơreăng kố la hiăng ‘nâi âm tĭnh rôh má 1 ƀă virus SARS-CoV-2.

Nôkố, ivá dêi mâu ngế ki kố hlo tơniăn, ôh tá hlo tơngê, kơ-o, ôh ti ai tơdroăng ki ôh tá kâi hiâm ƀă tâi tâng mâu ngế ki kố dế châ klâ ăm ối krê a kơpong tơchoâm dêi tơring Krông Nô.

Katarina Nga tơplôu ƀă tơbleăng