VOV4.Sêdang -  Kơxo lơ 11/7, kong pơlê Dak Nông châ hlo ngế tro tâ COVID 19 má 2, cho kuăn pơlê vêh ing Pơlê kong kân Hồ Chí Minh. Ngế tro tâ pơreăng 28474 cho nâ T.T.M.H 22 hơnăm, ối a cheăm Dak Sôr, tơring Krông Nô, kong pơlê Dak Nông, ngế pêi cheăng ăm kŏng ti mơdró ‘na ôm hyô a Pơlê kong kân Hồ Chí Minh. Klêi kơ’nâi khăm ngăn, ngế ki kố hiăng châ djâ klâ kơtăn ƀă pơlât a kơpong klâ kơtăn pơlât COVID 19 dêi tơring Krông Nô.

Nôkố ngế ki tro tâ pơreăng kố tâ tơbrêi, pôu prĭng ko, ôh tá kơ-o, ôh tá tơngê. Apoăng hiăng châ mơnhên 12 ngế ối achê F1; 4 ngế F2; nôkố xuân dế pơtối po rơdâ séa ngăn ti tăng mâu ngế ki tơdjâk. Nôkố kơvâ khăm pơlât kong pơlê Dak Nông hiăng tơkŭm xôh pơkeăng mâu tíu ngế ki kố troh, hnhâng kơxái ôh tá ăm lo pa kong hngêi kơxô̆ 75, thôn Quảng Đà, cheăm Dak Sôr, tơring Krông Nô, kong pơlê Dak Nông tơdjâk troh ngế tro tâ pơreăng.

A Sa Ly tơplôu ƀă tơbleăng