VOV4.Sêdang - Kơxê lơ 14/7, kong pơlê Dak Nông châ hlo tơ’nôm ngế má 4 yương tĭnh ƀă virus SARS-CoV-2. Ngế tro tâ pơreăng cho ngế kơdrâi N.T.L, kot mâ hơnăm 1972, cho ngế F1 dêi ngế tro tâ pơreăng má 28.474, dế châ klâ kơtăn a tíu klâ kơtăn tơkŭm dêi Tíu xiâm khăm pơlât tơring Krông Nô sap ing hâi lơ 11/7. Klêi kơ’nâi châ hlo ngế tro tâ pơreăng, kơvâ khăm pơlât rơtế khu cheăng hiăng klâ kơtăn ƀă pơtroh ngế tro tâ pơreăng ƀă rơxế ki pơto mơngế châi tamo ing kơpong klâ kơtăn dêi Tíu xiâm khăm pơlât tơring Krông Nô to a kơpong klâ kơtăn pơlât COVID 19 dêi kong pơlê Dak Nông.

Dak Nông châ hlo ngế tro tâ COVID 19 má 4 cho F1 cho ngế tro tâ má 28474

Tơdrêng amê tơkŭm xôh pơkeăng kơdê pơreăng, xôh pơkeăng a tâi tâng kơpong ai tơdjâk troh ngế ki kố hdrối mê. Mâu khu cheăng hiăng thâ séa ngăn, ti tăng ngế ki tơdjâk ƀă apoăng mơnhên châ hlo 3 ngế ối achê mê cho: kơnốu ối rơtế kơbong klâ kơtăn, kăn ƀô̆ khăm ngăn ki tô tung châ ƀă kăn ƀô̆ xo mơheăm khăm ngăn. Nôkố kơvâ khăm pơlât dế pơtối séa ngăn tơ’nôm mâu ngế ki tơdjâk tung tơdroăng klâ kơtăn.

A Sa Ly tơplôu ƀă tơbleăng