VOV4.Sêdang - Kơxo lơ 9/7, kong pơlê Lâm Đồng mơnhên tơ’nôm 1 ngế yương tĭnh COVID 19. Kố cho ngế F1 dêi ing tíu pơreăng ai 3 ngế tro tâ lo ing Pơlê kong kân Hồ Chí Minh. Ngế tro tâ COVID 19 nếo châ hlo a kong pơlê Lâm Đồng cho pôa N.H.D.K, ối a thôn Phú Thạnh, cheăm Hiệp Thạnh, tơring Đức Trọng (pêi cheăng a Hngêi arak liăn Agribank Lâm Đồng). Tung mâu hâi hiăng hluâ, pôa K trâm vâ chê 3 ngế cho khu tro tâ pơreăng châ mơnhên yương tĭnh ƀă COVID 19 a hâi lơ 7/7.

Lâm Đồng khăm ngăn mâu ngế ối achê ƀă khu ngế tro tâ pơreăng

Vâ tơniăn tơdroăng hbrâ mơdât pơreăng, kơxo lơ 9/7, Khu pơkuâ ngăn pơkeăng ƀă khăm pơlât kong pơlê Lâm Đồng hiăng tơbleăng thâ ti tăng ngế ki tơdjâk a 8 tíu tung pơlê kong kơdrâm Đà Lạt ƀă 2 tơring Đơn Dương, Đức Trọng. Tơdrêng amê, pêi pro thâ tơdroăng ti tăng mâu ngế ối achê vâ klâ kơtăn, khăm ngăn ƀă mơdât pơreăng.

Troh nôkố, khu cheăng kong pơlê Lâm Đồng hiăng mơnhên châ 83 ngế F1 ƀă 571 ngế F2 ai tơdjâk tíu pơreăng cho 3 ngế lo ing Pơlê kong kân Hồ Chí Minh.

A Sa Ly tơplôu ƀă tơbleăng