VOV4.Sêdang - Kơxo lơ 8/7, klêi khăm ngăn mâu ngế F1 ki tơdjâk 2 ngế tro tâ COVID-19 nếo châ ‘nâi a kơmăng lơ 7/7, Tíu xiâm séa ngăn mơdât pơreăng CDC kong pơlê Gia lai pơtối châ ‘nâi ai 1 ngế yương tĭnh ƀă SARS-CoV-2. Ngế ki mê nếo châ ‘nâi tâ COVID-19 cho ngế rơtăm kot mâ hơnăm 2006, ối a pơlê Kte, cheăm H’bông, tơring Čư Sê, kong pơlê Gia Lai. Ngế ki kố cho o kơnốu dêi ngế ki tâ COVID-19 châ ‘nâi a kơmăng lơ 7/7.

Tung kơmăng CDC Gia Lai hiăng pơtroh mâu ngế pêi cheăng mơdât ôh tá ăm kuăn pơlê lo pakong ƀă xo mơheăm khăm ngăn a pơlê Kte, cheăm Hbong.

Klêi kơ’nâi pơtối ‘nâi ai 3 ngế yương tĭnh ƀă SARS-CoV-2, kong pơlê Gia Lai hiăng hdró kơpong klâ pơtân pơlê Kte, xo 261 túa mơheăm, têa kơhêa, têa môh kuăn pơlê khăm ngăn. Tơdrêng amê, Khu hnê mơhno hbrâ mơdât pơreăng COVID-19 dêi kong pơlê ai hlá mơ-eá hnê mơhno ăm Kŏng an kong pơlê Gia Lai tơ’nôm mâu ngế  kring gak, mơdêk kơlo séa ngăn mơdât pơreăng hên má môi, séa ngăn ƀă camera a 4 tíu gak ngăn mơdât pơreăng a mâu hơlâ troăng vâ mot a pơlê.

Gương tơplôu ƀă tơbleăng