VOV4.Sêdang - Kơxê măng lơ 16/7, Gia Lai châ hlo tơ’nôm 1 ngế yương tĭnh SARS-CoV-2. Tâng tơdroăng ai ngế test rĕng yương tĭnh a Hngêi pơkeăng kân Đăi hok Y dươk Hoàng Anh Gia Lai cho kŏng nhân N.T.T.N, kot mâ hơnăm 1978, ối a Kơphô̆ 8, pơlê kân Phú Túc, tơring Krông Pa, kong pơlê Gia Lai. Tíu xiâm mơdât pơreăng kong pơlê Gia Lai hiăng pơtroh kăn ƀô̆ séa ngăn mơnhên pơreăng ƀă tơkŭm xo mơheăm  khăm ngăn.

Troh 16h rơtế hâi mê, klêi kơ’nâi séa ngăn yương tĭnh ƀă SARS-CoV-2. Ngế tro tâ pơreăng hiăng châ klâ kơtăn, pơlât a kơpong pơlât ngế tro tâ pơreăng COVID 19, Hngêi pơkeăng kân kong pơlê Gia Lai. Klêi kơ’nâi tơdah tơdroăng ‘na ngế yương tĭnh dêi ngế inâi N.T.T.N, Khu hnê mơhno hbrâ mơdât pơreăng COVID 19 kong pơlê Gia Lai hiăng thâ tơkŭm ti tăng mâu ngế ki ối achê ƀă ngế tro tâ pơreăng; pêi pro mâu troăng hbrâ mơdât pơreăng COVID 19 tiô pơkâ.

A Sa Ly tơplôu ƀă tơbleăng