VOV4.Sêdang - Klêi kơ’nâi ‘nâi ai ngế tâ COVID-19 nếo cho ngế cheăng ‘na văn thư dêi Ƀơrô cheăng, Vi ƀan hnê ngăn kong pơlê Gia Lai hiăng hơ’lêh cheăng ing troăng hyôh internet ƀă mơjiâng kơpong klâ ối krê tơkŭm vâ rế rak tơniăn hnoăng cheăng, rế hbrâ mơdât pơreăng. Ki nhên gá, ngế ki cheăng văn thư ối tung Ƀơrô cheăng Vi ƀan hnê ngăn kong pơlê Gia Lai klêi kơ’nâi séa ngăn RT-PCR ƀă yương tĭnh ƀă SARS-CoV-2 tung hâi lơ 26/10.

Gia Lai: Ngế cheăng ‘na văn thư tro COVID-19, Vi ƀan hnê ngăn kong pơlê Gia Lai hơ’lêh tơdroăng pêi cheăng ing troăng hyôh internet

Klêi kơ’nâi ‘nâi ngế ki kố tâ pơreăng, Khu hnê mơhno cheăng hbrâ mơdât pơreăng COVID-19 Gia Lai hiăng rĕng tăng F1, Vi ƀan hnê ngăn kong pơlê Gia Lai, klêi kơ’nâi séa ngăn 123 ngế kăn ƀô̆, kong chưk, viên chưk dêi Vi ƀan hnê ngăn kong pơlê Gia Lai, klêi mê pơrá âm tĭnh. Pakĭng mê, a tíu pêi cheăng, Vi ƀan hnê ngăn kong pơlê Gia Lai hiăng hơ’lêh cheăng tiô tơdroăng ki ‘no tơdrêng ing troăng hyôh internet, rak tơniăn 5K vâ hbrâ mơdât pơreăng.

Kơxo lơ 27/10, kong pơlê Gia Lai ‘nâi ai 52 ngế yương tĭnh nếo ƀă SARS-CoV-2 ƀă 26 túa ‘mot tơkŭm dêi 191 ngế yương tĭnh dế châ séa ngăn nếo. Nôkố, 900 ngế ki tro pơreăng dế châ pơlât.

Katarina Nga tơplôu ƀă tơbleăng