VOV4. Sêdang - Hâi lơ 15/9, kong pơlê Gia Lai tơkŭm po tơdah vâ chê 250 ngế vâi kơdrâi mơ-êa ƀă vâi hdrêng dế rêh ối, pêi cheăng a kong pơlê Bình Dương, Đồng Nai ƀă pơlê kong kân Hồ Chí Minh vêh a pơlê. Kố cho roh tơdah kuăn pơlê vêh ing kơpong ai pơreăng roh má 3 châ kong pơlê Gia Lai tơkŭm po. Mâu kuăn pơlê châ kong pơlê Gia Lai tơdah vêh roh kố ai 209 ngế vâi kơdrâi mơ-êa, 37 ngế vâi hdrêng ƀă môi ngế nhŏng o tung hngêi.

Kố cho mâu kuăn pơlê ối tung khu ngế dế rêh ối, pêi cheăng a mâu tíu ai pơreăng xông tâ tú ó trâm pá, hía tơdroăng cheăng, ôh tá ai tíu ối ƀă cho ngế hdroâng kuăn ngo. Vâ tơdah mâu kuăn pơlê vêh a kong pơlê roh kố, tâi tâng mâu rơxế xua hngêi rơxế Phương Trang Pơlê kong kân Hồ Chí Minh ƀă hngêi rơxế Thuận Tiến Gia Lai tŏng kum; Kŏng ti tơlo liăn cheăng Hoàng Anh Gia Lai tŏng kum tâi tâng kơxô̆ liăn prôk troăng. Nôkố mâu kuăn pơlê hiăng châ xing xoăng klâ kơtăn tơniăn a kong pơlê Gia Lai.