VOV4.Sêdang - Klêi kơ’nâi 9 hâi pêi thâ rĕng, Hà Nội hiăng pêi kêi đeăng tơdroăng pâk vaccine hbrâ mơdât COVID-19 ăm kuăn pơlê sap ing 18 hơnăm tơngi klêng. Tâng môi tiah hdrối mê, Hà Nội thế mơdoh hên khế vâ châ kơxô̆ 2,2 rơtuh ngế kuăn pơlê châ pâk vaccine hbrâ mơdât COVID-19, mê tung roh kố, Hà Nội hiăng pâk châ vâ chê 3 rơtuh trum. Ƀă pơ’leăng mâ kuăn pơlê 5,75 rơtuh ngế sap ing 18 hơnăm tơngi klêng, Hà Nội hiăng châ lối 96% kơxô̆ kuăn pơlê pâk ki vâ iâ 1 trum vaccine hbrâ mơdât COVID-19.

A tâi tâng mâu tíu pâk pơrá châ tơkŭm po tơ’lêi hlâu ăm kuăn pơlê troh pâk, tơniăn mâu pơkâ hbrâ mơdât pơreăng môi tiah: xếo kŏng ƀă pơkeăng, khăm ki tô tung châ. Vâ rak tơniăn tơdroăng pâk, pơkâ mơ’no tung tơdroăng pâk, pơlê kong kân Hà Nội pơkâ mâu bêng, pơlê kân, tơring, tíu pâk tơkŭm pâk 3 hdroh/môi hâi.

A Sa Ly tơplôu ƀă tơbleăng