VOV4.Sêdang - Tiô pôa Nguyễn Trường Sơn, Ngế xiâm phŏ pơkuâ ngăn pơkeăng ƀă khăm pơlât, hneăng châ tối cho hơkăng má môi dêi roh tơplâ mơdât pơreăng COVID-19 má pŭn cho sap hâi lơ 23/8 troh lơ 30/9. Hneăng kố, kơvâ ngăn pơkeăng ƀă khăm pơlât hiăng pêi pro troăng khăm ngăn cho ki xiâm, ƀă pêi pro rĕng tâ tơdroăng ki tâ tú dêi virus SARS-CoV-2. Kơnôm mê, kơxô̆ ngế nếo tro rĕng châ hlo, vâ mơ’no troăng pơkuâ, pơlât tơtro. Kơvâ ngăn pơkeăng ƀă khăm pơlât ai mâu tơdroăng pơ’lêh tung troăng tơkŭm po pơlât ăm mơngế tro tâ COVID-19; djâ xúa pơkeăng ki nếo ƀă hía hé.

Xua mê, kơxô̆ mơngế nếo tro tâ, kơxô̆ ngế hlâ kơdroh ƀă kơxô̆ ngế châ tơbleăng prêi lĕm hên rêm hâi. Xêo ngăn dêi Khu xiâm ngăn pơkeăng ƀă khăm pơlât troh nôkố ăm hlo, kơxô̆ mơngế tro tâ tung pơlê pơla hiăng kơdroh 44,7% tâng pơchông péa măng tĭng hdrối. Ki tơtrŏng má môi, hiăng ai 91% kơxô̆ mơngế tro tâ COVID-19 châ tơbleăng prêi lĕm. Hiăng ai 7 tung kơxô̆ 62 kong pơlê, pơlê kong kơdrâm tơkâ hluâ 14 hâi ôh tá ai ngế tro tâ nếo, 12 kong pơlê, pơlê kong kơdrâm ôh tá ai ngế tro tâ nếo tung 14 hâi hiăng hluâ.

A Sa Ly tơplôu ƀă tơbleăng