Nâ Nguyễn Thị Khánh Phương, ối a bêng Tuy Hòa roh Têt hơnăm 2023, on veăng nâ trâm tơdroăng xía vâ ó xuăn biê̆n chứng kuăn ngá tung klêa, thế pâk ‘mot mơheăm hên mê nếo chiâng. Ki tô tuăn tâ ngế mê ai khu mơheăm ki iâ mơngế ai, cho khu mơheăm AB, tơdroăng tăng mơ-eăm drêng mê pá khât ‘nâng. Tơdroăng rêh ối kơtiê xơpá, mâu mơheăm kal vâ pâk ‘mot a hngêi pơkeăng kân Phú Yên xo ing môi ngế ki pleăng dêi ai mơheăm rơtế khu mơheăm tiah on veăng nâ mê hiăng teăm tŏng gum mơ’rêh on veăng nâ. Ing mê, drêng ai ivá mo lĕm, nâ tơmiât ai hlo ulâi ai ngế ki dế kal mơheăm mê nâ Phương chiâng veăng pleăng dêi mơheăm.

Pleăng mơheăm hdrối Têt Bính Ngọ kố rôh má 4 tung 3 hơnăm hdrối nâ veăng pleăng a bêng Tuy An. Nâ Nguyễn Thị Khánh Phương tối.

“Riân sap ing nhŏng peăng kơdrâi dêi nâ châi tamo klêi mê châ pleăng mơheăm pơlât tơdrêng hiăng prêi, 3 hơnăm hdrối drêng ivá mo lĕm a xuân veăng pleăng mơheăm. A tơngah tiah kố, mâu kơto mơheăm tŏng kum tơná kô châ tŏng gum mâu ngế châi tamo râ ki ê môi tiah rơpŏng hngêi a dế trâm pá kal vâ mơ-eăm môi tiah hdrối nah”.

Xuân veăng pleăng mơheăm a bêng Tuy An tung rôh kố, klêi pêi pro tiô tơdroăng mơhnhôk dêi Hngêi pơkeăng kân Phú Yên, nâ Đinh Thị Ngọc Ngàn, bêng Tuy Hòa, tối:

“Kố cho rôh má pŭn á veăng pleăng mơheăm, tung tuăn tơmiât púi vâ châ kum mơngế ki ê, kum mâu ngế dế trâm pá kal vâ mơ-eăm. Ing tơdroăng mơhnhôk mê, a tơngah kô ai tơ’nôm hên mâu hơnăm ối nếo, mâu ngoh nâ ki hiăng hên hơnăm tâ kơ á veăng pleăng dêi mơheăm tŏng kum hên ngế tá, veăng tơbleăng tuăn mơno lĕm kum kuăn pơlê”.

Sap ing apoăng khế 1 troh nôkố, Hngêi pơkeăng kân Phú Yên hiăng tơdah xo pơlât dâng 330cc mơheăm ing mâu tíu pleăng mơheăm a bêng Tuy An, pro kơxô̆ mơheăm ki pleăng chôu ‘măn tâk vâ chê 760 tơdrong mơheăm. Tiô Ƀok Thái pơkeăng Nguyễn Định Huy, Kăn pơkuâ khoa Huyết học – Truyền máu, Bệnh viện Đa khoa Phú Yên, rêm khế mâu hngêi pơkeăng tung kơpong peăng mâ hâi Lo kong pơlê Dak Lak kal dâng 600cc mơheăm mơheăm.

Tung rôh Tết, drêng kơxô̆ mơngế pơlât tơdrêng, tơklâ rơxế rế tâk hên, tơdroăng hbrâ xo mơheăm ‘măn ing hdrối cho troăng ki kal vâ ai mơheăm ki vâ kum pơlât ăm mơngế kal vâ tung rôh têt Bính Ngọ.

“Nôkố rêm măng tĭng a tơdah xo lối 150 tơdrong mơheăm ing mâu tơdroăng pleăng mơheăm xua Khu mơhnhôk pleăng mơheăm krếo thế. Klêi xo, kơxô̆ mơheăm mê châ rah nhên ƀă klâ ‘măn phá tiô 5 khu mơheăm pêi pro tiô Khu xiâm ngăn pơkeăng pơlât thế klâ mê cho: mơheăm mơngế ki ai pơreăng HIV, êi kliâm B, C mơheăm mơngế ai pơreăng giang mai pin tối hmâ lo thĕn, tơngê hmân, mơheăm mơngế ki lĕm vâ pâk ‘mot tơdrêng ăm mơngế mơngế kal pơlât tung rôh Tết”.

Tơdrêng ƀă kơpong peăng mâ hâi Lo, tơdroăng mơhnhôk pleăng mơheăm hdrối Tết Bình Ngọ xuân hlo hên ngế vâ a peăng mâ hâi lu kong pơlê Dak Lak. Ƀok thái pơkeăng chuyên khoa II Trịnh Hồng Nhựt, Pơkuâ hngêi pơkeăng kân kơpong Tây Nguyên tối, ai hên 1.200 to xoăng koi pơlât, rêm rôh Tết hngêi pơkeăng  tơdah xo pơlât hên ăm mơngế châi tamo. Vâ tơniăn tơdroăng khăm, pơlât teăm tơdrêng, hlối tơƀlê, hngêi pơkeăng hiăng hbrâ tŭm pơkeăng pơlât, tơmeăm pơlât, ăm tâi tâng mâu ngế cheăng pơlât, ƀok thái pơkeăng ƀă mơngế gak ngăn pêi cheăng tung pơla Têt.

Tiô ƀok thái pơkeăng Trịnh Hồng Nhựt, mơhé ai mơheăm ki hiăng ‘măn lôi tung pơla pơt Tết ton hâi la xuân ối xâu ôh tá bê, kơnôm rĕng  hbrâ  hdrối ing apoăng, troh nôkố hngêi pơkeăng xuân ối châ xo tơ’mot ƀă ‘măn kơdĭng hrĭng tơdrong mơheăm, hbrâ vâ kum ăm pơlât tơdrêng kơ mơngế kal vâ mơheăm:

“ ‘Na pơkeăng, hngêi pơkeăng hiăng thế Khoa Pơkeăng mơjiâng pơkâ hdrối, hbrâ tŭm mâu pơkeăng pơlât, tơmeăm xúa tung pơlât vâ khăm, pơlât mơngế châi tamo tung roh Têt. Ƀă xiâm mơheăm ki ‘măn, ngế ki tamo châi tơrŭm ƀă mâu tôh pêi cheăng ‘na tŏng gum mơhnhôk tăng dâng 1.000cc mơheăm ki ‘măn kơdĭng vâ pơlât tơdrêng ăm mơngế ki kal vâ mơheăm. Kơxô̆ ki mê hên tâ rêm hơnăm bú a kơlo 700-800cc mơheăm, hbrâ vâ pơlât tơdrêng. Krê ƀă mâu khu mơheăm ki iâ ngế ai, hngêi pơkeăng hiăng krếo mâu ngế ki hmâ pleăng vâ hbrâ pleăng drêng ai ngế kal vâ”.

Ƀă ‘nâi hbrâ hdrối dêi kơvâ ngăn pơkeăng rơtế ƀă tuăn vâ dêi mơngế ki pleăng mơheăm, mâu hngêi pơkeăng a Dak Lak dế hbrâ tơdah xo vâ ai mơheăm pơlât tơdrêng tiô mơngế kal vâ, pơlât teăm tơdrêng rôh Têt Bính Ngọ. Mâu mơheăm châ ‘măn kơdĭng teăm tơdrêng cho tíu tơngah ki kal vâ kum mơ’rêh mơngế ki châi tamo râ. Ing mê, veăng rak tơniăn ivá kuăn pơlê, vâ rêm ngế tơdah Têt ro, tơniăn.