Kông pro tơkâ luâ kroăng Vầu tơdjêp ƀă 2 to cheăm Ba - Tư dêi tơring Đông Giang, kong pơlê Quảng Nam hiăng vâ tơđôu thế rĕng pro; troăng prôk pơtân nếo klêi gô̆m pro kêi xuân hiăng tro têa mơhiu. Ôh tá ai troăng prôk, lối 1 khế kố, mâu ngế cheăng khăm pơlât, ƀok thái pơkeăng a Hngêi pơkeăng cheăm Ba thế lâ têa tơkâ vâ lăm pêi cheăng. Pá má môi cho tơdroăng chơ tơmeăm, ai ngế pơlât tơdrêng.

Y sĩ Nguyễn Thị  Thu Hà, cheăng a hngêi pơkeăng cheăm Ba tối:

“Kông tơđôu mê ngin thế lâ têa vâ tơkâ prôk lăm pêi cheăng, mâu hâi têa kân, têa ving têi, tơ’lêi tro têa mơhiu, ngin thế hếo, to mot tơkâ luâ kông. Troăng prôk pá păng ‘nâng, mâu kuăn pơlê ki châi tamo troh a cheăm vâ pơlât tơdrêng hrá, rơ-iô troh ivá kuăn pơlê tâ’’.

Ƀok thái pơkeăng Phạm Thị Kim Bằng, Ngế pơkuâ Hngêi pơkeăng cheăm Ba ăm ‘nâi, Hngêi pơkeăng xo pêi tơdroăng khăm, pơlât ăm lối 600 rơpŏng kuăn pơlê dêi 2 to cheăm Ba ƀă Tư dêi tơring Đông Giang, kong pơlê Quảng Nam la bú ai 6 ƀiên chê̆. A poăng hơnăm kố, 2 ngế pâ lăm cheăng a kơpong tơbăng mê Hngêi pơkeăng bú ối 4 ngế pêi tŭm tơdroăng cheăng ing khăm, pơlât troh pơlât tơdrêng, pân chêp mâu tíu tro rong, ngăn vâi kơdrâi mơhum ƀă hên tơdroăng cheăng ki ê.

Ƀok thái pơkeăng Phạm Thị Kim Bằng ăm ‘nâi, mâu  ngế cheăng khăm pơlât, ƀok thái pơkeăng  thế pêi cheăng plâ hâi măng.

“Mơngế ngăn pơkeăng ngin ối 4 ngế pêi cheăng pá, tơbrêi ‘nâng, gak a kơmăng há thế cheăng tơpéa ngế tâng ôh tá pêi tơpéa ngế kô ôh tá chiâng pêi mâu tơdroăng cheăng. Hngêi pơkeăng kong ngo troăng prôk pá puât mê tâi tâng tơdroăng cheăng pin thế pê tâi.  Hiăng tối tơbleăng kơ mâu kăn, la vâi tối hơnăm kố nah mơngế cheăng ngăn pơkeăng pơ’lêh cheăng hên.

Nôkố, Hngêi pơkeăng iâ mơngế  ‘nâng. A kong ngo tơdroăng rêh ối xơpá mê mâu ngoh o pêi cheăng chiâng ni há. Pêi cheăng hên la kâ iâ, ôh tá ai liăn tơ’nôm. Ngin pêi cheăng lối 10 hơnăm kố liăn khế bú 5 rơtuh troh 5 rơtuh 500 rơpâu liăn tê, to mê ôh bê rêh”.

Tâi tâng mâu ngế cheăng ngăn pơkeăng a kong ngo to mơngế Xuăn, hên tung kơxô̆ mâu ngế ki mê hiăng  hên hơnăm vâi thế rêh ối pá puât môi tiah péa pơtê. Môi tiah điều dưỡng Nguyễn Thị Hương Thảo, cheăng a Hngêi pơkeăng dêi Tơring Đông Giang cho môi tung kơxô̆ ki mê. Rơpŏng hngêi Thảo ối a Đại Lộc, xua tơdroăng prôk lăm pá puât ƀă hên tơdroăng cheăng pêi rêm hâi hiăng lối 10 hơnăm kố bú troh mơ’nui măng tĭng Thảo nếo châ vêh pôu dêi kơnốu, kuăn ‘nĕng ki ối kŭn 1 hdrôh.

Ai dêng 'nâ rôh hên ngế tâ pơreăng, drêng ‘nâ plâ khế, thăm nếo péa pái khế nâ nếo châ vêh dêi a hngêi:

“ Tơdroăng cheăng a hngêi pơkeăng tơring Đông Giang hên la liăn khế kâ iâ. Púi vâ râ kơpêng tơmâng tŏng kum ăm mâu kăn ƀô̆ ngăn pơlê, cheăm, tơring kơtiê xơpá môi tiah ngin kố vâ râng chêng mâu ngế pêi cheăng khăm pơlât’’.

Tơdroăng cheăng dêi mâu ngế ngăn pơkeăng pơlât hiăng pá, ‘na cheăng khăm pơlât a kơpong kong ngo, kơpong hdroâng kuăn ngo thăm rế xơpá luâ hên tâ nếo. Malối, klêi kơ’nâi ai pơreăng ân COVID-19 thăm rế hên ngế pơ’lêh lăm pêi cheăng tíu ê, lăm cheăng a kơpong tơbăng, mâu ki ‘nâ lo pơtê cheăng pro pá ăm mơngế ki cheăng khăm pơlât a kơpong kong ngo kơtiê xơpá, xua thăm rế pá ai xếo mơngế vâ cheăng khăm pơlât.

Ƀok thái pơkeăng Lê Thị Quyết, Ngế pơkuâ hngêi pơkeăng tơring Đông Giang ăm ‘nâi, tíu pêi cheăng nếo tơ’nôm mâu tơdroăng pơkâ ƀiên chê̆ la tâng vâ pơchông ƀă tơdroăng ai khât xuân hâi ai tiô tơdroăng púi vâ:

“Pơchông ƀă ƀiên chê̆ pơcháu gá tŭm la tâng vâ pơchông ƀă tơdroăng cheăng pêi mê ƀiên chê̆ ối iâ ‘nâng mê mâu ngế pêi cheăng ôh tá ai. Ai môi luât pơkâ ki lâi ‘ló tŏng kum ăm kơvâ ngăn pơkeăng pơlât vâ mâu kăn ƀô̆ cheăng ngăn pơkeăng hmiân tuăn, malối ƀă mâu hngêi pơkeăng kong ngo môi tiah kố''.

Tơdroăng cheăng pêi hên, pá, la liăn kâ ôh tơxâng cho xiâm ki pro mâu ngế cheăng ngăn pơkeăng khăm pơlât pơtê cheăng ‘nâ hía pơ’lêh cheăng tíu ê hlo hên a kong pơlê. Krê to a kong pơlê Quảng Nam, bú 6 khế apoăng hơnăm kố hiăng ai vâ chê 50 ngế cheăng ngăn pơkeăng pâ pơtê cheăng.

A kơpong kong ngo, kơpong kuăn ngo, kơxô̆ thái pơkeăng, ƀok thái pơkeăng pâ pơ’lêh lăm cheăng a kơpong tơbăng rế hên pro ăm tơdroăng cheăng khăm pơlât kuăn pơlê hdroâng kuăn ngo trâm hên xơpá.

Pôa Mai Văn Mười, Ngế pơkuâ ngăn ‘na pơkeăng pơlât kong pơlê Quảng Nam ăm ‘nâi, kơvâ ngăn pơkeăng tơkŭm po tơ’noăng viên chưk ăm kơvâ ngăn pơkeăng, vâ kơdroh tơdroăng ki ôh tá tŭm mơngế cheăng khăm pơlât, ƀok thái pơkeăng nôkố:

“Pơla hdrối kố nah, kơvâ cheăng hiăng tơkŭm po tơ’noăng rah vâ chê 100 ngế ƀok thái pơkeăng ƀă to lâi hrĭng ngế cheăng điều dưỡng, dược sĩ Đại học. Kong pơlê Quảng Nam xuân hiăng trâm mâ mơhnhôk mâu nhŏng o ƀă ngăn tiô kơ tơdroăng dêi kong pơlê tơring cheăm vâ xoăng mơngế lăm cheăng ăm tơtro''.

Kăn hnê ngăn mâu tơring kong ngo xuân tơmâng khât troh tơdroăng ‘na tíu kâ ối ăm mơngế ki ối a hơngế. Kơvâ ngăn pơkeăng xuân dế pơtroh hlá mơ-éa ăm Hô̆i đong hnê ngăn kong pơlê ‘na tơdroăng ki xo lŭp kơxô̆ liăn ăm mâu hngêi pơkeăng râ tơring... Malối a kong ngo liăn ngân Tơnêi têa hiăng kơjo kum mơhá liăn khế ăm viên chứk, mơngế pêi cheăng’’.

Mâu kăn ƀă khu râ kơvâ cheăng kong pơlê Quảng Nam púi vâ tơnêi têa rĕng pơkâ luât, luât rah xo mơngế pêi cheăng, thế ăm kâ liăn khế tơxâng vâ râng mơngế cheăng khăm pơlât mơ-eăm pêi cheăng, malối cho mâu ngế cheăng khăm pơlât, ƀok thái pơkeăng ki lăm cheăng a pơlê cheăm, tơring hơngế hơngo kơtiê xơpá.