VOV4.Sêdang - Pôa Trần Hồng Tiến, kăn pơkuâ hnê ngăn Đảng tơring Krông Pač, kong pơlê Dak Lak ăm ‘nâi: tơring nếo ‘nâi môi ngế kăn pơkuâ dêi pơlê kân Phước An tro tâ pơreăng COVID-19. Mê cho pôa N.V.H, kăn pơkuâ Đảng ủy pơlê kân Phước An. Klêi kơ’nâi séa ngăn pơreăng, tung pơla sap ing hâi lơ 6 troh lơ 12/10, pôa H. troh a hên tíu ƀă trâm hên ngế. Klêi kơ’nâi pôa H. test rĕng yương tĭnh ƀă SARS-CoV-2, kơ koan ki ai tơdjâk hiăng tí tăng ƀă hiăng mơnhên ai lối 50 ngế F1.

Test rĕng ăm mâu ngế ki tơdjâk troh ngế ki tâ pơreăng

Tung mê, ki hên cho kăn ƀô̆, kong chưk dêi pơlê kân Phước An ƀă kăn ƀô̆ tơring Krông Pač. Klêi kơ’nâi test rĕng ƀă séa ngăn ƀăng túa Realtime RT-PCR ƀă lối 50 ngế F1 ki tơdjâk troh pôa H. pơrá âm tĭnh ƀă SARS-CoV-2. Mâu ngế ki kố nôkố dế châ klâ ối krê a tíu pêi cheăng vâ rak tơniăn tung pơla pêi cheăng dêi pơlê kân.