VOV4.Sêdang - A kong pơlê Kon Tum troh a chôu phut kố hiăng mơnhên tối ai vâ chê 30 ngế ki tro tâ pơreăng COVID-19. Maluâ ti mê, tâi tâng mâu ngế ki troh, mot a kong pơlê Kon Tum pơrá athế ăm klâ ối krê, la kong pơlê kố cho tíu ki ôh tá ai tơdroăng tâ tú pơreăng tung pơlê pơla. Ki păng ‘nâng tơdroăng hbrâ, tơplâ mơdât pơreăng COVID-19 a Kon Tum ăm hlo, tơdrêng ƀă tơdroăng ki mơjiâng kơpong ki gak ngăn a drô troăng cho tơdroăng cheăng pêi ki tơƀrê, mơdât mâu ngế troh ing tíu ê, ing mê, tơdroăng ki mơdât pơreăng xuân hiăng châ kum mâu thôn pơlê châ mơdât pơreăng.

Mơ’nui khế 8 kố nah, cheăm Hơ Moong, tơring Sa Thầy ai 16 ngế pêi cheăng vêh ing kơpong tâ pơreăng kong pơlê Bình Dương. Klêi hiăng tâi 14 hâi ối klâ krê tơchoâm a kong pơlê tro tiô pơkâ, mơhé kâi kơ pâ dêi kuăn ‘nĕng, la hên mâu rơpŏng xuân rơtế pâ mâu kăn ăm nhŏng o tơná pơtối klâ kơtăn ối krê tơ’nôm 14 hâi nếo a cheăm, ‘nâ hía ‘’lơ ai tơdroăng klâi ‘lo‘’ kô ôh tá tơdjâk troh kuăn pơlê.

Pôa A Đứu, Kăn hnê ngăn Đảng pơlê Kà Bầy ăm ‘nâi, vâ kuăn pơlê hlê plĕng ‘nâi hbrâ mơdât pơreăng tơtro tiah mê, rêm hâi 4 ngế đảng viên dêi Chi ƀô̆  pơ’lêh dêi rơpó lăm gak ngăn a Tíu tơplâ mơdât pơreăng COVID-19 xua cheăm mơjiâng a troăng kân vâ tơkâ luâ pơlê. Akố rêm ngế kuăn pơlê vâ lăm chiâk lơ vâ lăm klâng lơ ing klâng châi ngi hngêi mâu đảng viên mơdoh tí tăng êng vâ ‘nâi tơdroăng pêi chiâk ƀă ‘na ivá kuăn pơlê.

Séa ngăn mơdât mơngế mot lo a Tíu gak ngăn mơdât pơreăng COVID-19 a pơlê Kà Bầy, cheăm Hơ Moong

Tơdrêng ƀă tơdroăng hlê plĕng hlối tơrŭm ƀă tơdroăng hnê hbrâ mơdât pơreăng COVID-19 vâ kuăn pơlê hlê nhên ki rơ-iô dêi pơreăng hlê tơdroăng hbrâ mơdât pơreăng ƀă ivá dêi tơná ƀă kuăn pơlê. Pakĭng mơdoh chôu a kơxo, kơmăng, mâu đảng viên lăm pôu tơrêm rơpŏng tung pơlê hnê kuăn pơlê rak vế pêi pro tơdroăng hbrâ mơdât pơreăng:

‘’Đảng viên tung chi ƀô̆ thôn xuân pêi pro tro tơdroăng hnê mơhno dêi râ kơpêng. Tơdroăng hbrâ mơdât pơreăng môi tiah kố vâi gak hlối amê, hnê tối kuăn pơlê thế truâ kên pâng môh rơkong drêng lo pa gong. Đảng viên tung Chi ƀô̆ đi đo djâ troăng ahdrối tung mâu tơdroăng cheăng ƀă hlối mơhnhôk kuăn pơlê veăng rak vế pêi pro’’.

Kuăn pơlê lăm pêi chiâk hdrối vâ vêh a pơlê châ khăm ngăn châ chăn a Tíu gak ngăn mơdât pơreăng COVID-19

Vâ hbrâ mơdât COVID-19, cheăm Hơ Moong, tơring Sa Thầy mơjiâng 2 tíu gak ngăn mơngế ki mot kô lo ing tơring Đăk Tô ƀă Đăk Hà. Mâu ngế ki tơdah xo hnoăng cheăng pêi a tíu gak ngăn rơtế ƀă kăn ƀô̆ khu râ pơkuâ cheăng dêi cheăm ối veăng ai mâu ngế tung Tôh pêi cheăng dêi kuăn pơlê, hbrâ mơdât COVID-19 péa pơlê a tíu mơjiâng gak ngăn. Kơxô̆ séa ngăn 2 Tíu gak ngăn mơdât pơreăng dêi cheăm ăm hlo, ing tơdế măng tĭng khế 5 apoăng khế 9 ai lối 4.600 ngế mot lo akố ki hên to mâu ngế lo ing cheăm Đăk Mar, tơring Đăk Tô ƀă cheăm Pô Kô, tơring Đăk Tô.

Tơdroăng tối ăm ‘nâi tơrêm ngế châ chêh ‘măn tŭm tung hlá mơ-éa ‘na tíu ối, kơxô̆ phôn ƀă khăm ngăn tung châ tung pơla chôu ki vâi tơkâ luâ Tíu gak ngăn. Pôa Lê Khắc Tuấn, Kăn hnê ngăn Đảng ủy cheăm Hơ Moong ăm ‘nâi, vâ mơdêk ki tơ-ƀrê tơdroăng hbrâ mơdât pơreăng COVID-19, tơdrêng ƀă tơdroăng pơtối rak vế kơtăng tơdroăng cheăng pêi a 2 Tíu gak ngăn plâ hâi măng, mâu kăn cheăm pơkâ thế mơdêk hbrâ mơdât pơreăng dêi kuăn pơlê:

‘’Cheăm Hơ Moong ai mâu hdroâng kuăn ngo akố lối 90% tơdroăng hnê tối gá rơdâ. Tung 1 chôu troh 2 chôu tung loa tơbleăng hnê đi đo. A mâu thôn ai loa râng kŏng ki cheăm ăm, Khu ngăn kuăn pơlê dêi thôn râng loa mê lăm prôk tối tơbleăng. Troh nôkố, kuăn pơlê hiăng hlê tơdroăng hbrâ mơdât pơreăng’’.

Mâu rơpŏng kuăn pơlê a Plei Rơhai II, bêng Lê Lợi, pơlê kong kơdrâm Kon Tum pêi pro tơdroăng klâ krê a hngêi vâ hbrâ mơdât pơreăng COVID-19

Tơdrêng ƀă mâu ngế cheăng ngăn pơkeăng, mâu lêng, kŏng an ki ối a xiâm hbrâ mơdât pơreăng, troh nôkố a mâu thôn pơlê, tôh kơphô̆ dêi kong pơlê Kon Tum hiăng mơjiâng lối 2.800 Tôh pêi cheăng hbrâ mơdât pơreăng COVID-19. Rêm tôh pêi cheăng ai sap 2 troh 3 ngế cho kăn ƀô̆ thôn, pơlê,  tôh kơphô̆, mâu khu grup, mâu ngế pleăng hnoăng cheăng veăng pơkuâ ngăn sap 30 - 50 rơpŏng.  

Jâ Y Dim, Kăn phŏ pơkuâ hnê ngăn Đảng ủy, Kănn hnê ngăn Hô̆i đong cheăm Đăk Pxi, tơring Đăk Hà ăm ‘nâi, tơdroăng pơtối rak vế hnoăng cheăng mâu tôh ki pêi cheăng tung kuăn pơlê tung hbrâ mơdât pơreăng COVID-19 a mâu thôn pơlê cho tơdroăng kal khât păng ‘nâng:

‘’Mâu tôh hbrâ mơdât pơreăng mê rêm hâi ai hnoăng cheăng lăm séa ngăn tâi tâng mâu thôn tung cheăm. Mâu tôh hbrâ mơdât pơreăng mê rêm hâi ai hnoăng cheăng lăm séa ngăn a tâi tâng mâu thôn tung cheăm. Mâu tôh tơrŭm ƀă Kŏng an gak vâ séa ngăn kuăn pơlê prôk hôm truâ kên pâng môh rơkong. Ngăn kơtăng mâu kuăn pơlê ki lo ing kong pơlê ki ê vêh a hngêi.  

Rak ngăn nhên khât tro tiô pơkâ klâ krê. pá xôp thôn xuân séa ngăn ôh tá ăm tơkŭm krâm mơngế. Pakĭng mê, hnê mơhno ăm kuăn pơlê thế kơpuih văng krúa lĕm dêi hngêi trăng, trâ văng dêi kơdrum êa rơtoh. Ối a hngêi thế ai têa pơkeăng xếo kŏng kơdê pơreăng. Kuăn pơlê ôh tá ai liăn rôe têa pơkeăng vâ xếo kŏng mê ngin hnê ăm kuăn pơlê thế rôe kơƀŏng, đi đo xếo kŏng ƀă kơƀŏng, klêi mê kơhnâ truâ kên pâng môh rơkong truâ tro tiô tơdroăng hnê mơhno ‘’.

Troh nôkố a kong pơlê Kon Tum, tâi tâng mâu ngế tâ COVID-19 xuân châ klâ kơtăn tơdrêng drêng vêh troh a kong pơlê ƀă Kon Tum nôkố cho môi kong pơlê ki hâi hlo ai ngế tâ pơreăng a kơpong Tây Nguyên, hâi hlo ai ngế tâ tú tung kuăn pơlê. Vâ rak tơniăn tơdroăng séa ngăn mơdât pơreăng, hlối rơtế pơtối mơdêk hnoăng cheăng pêi ƀă mâu ngế vâ mâu tíu gak ngăn mơdât pơreăng a rêm hơlâ troăng vâ mot tung kong pơlê kâi mơdât xiâm ki pro tâ pơreăng tung kong pơlê, Kon Tum xuân dế pơtối rak vế pêi pro ƀă mơjiâng tơ’nôm hên thôn pơlê tơniăn vâ tơdroăng rêh ối rĕng vêh tơniăn môi tiah hdrối nah nếo.

Khoa Điềm chêh

Gương tơplôu ƀă tơbleăng