VOV4.Sêdang - Tối tơbleăng a roh hôp tơbleăng ‘na tơdroăng thăm hbrâ mơdât pơreăng tung Pơlê kong kân Hồ Chí Minh kơxê lơ 16/9, ăm hlo kơxô̆ mơngế hlâ xua COVID-19 a Pơlê kong kân Hồ Chí Minh dế kơdroh đi đo tiô hâi, laga kơxô̆ ngế nếo tro tâ xuân hên. Ki nhên, tung hâi lơ 15/9, Pơlê kong kân Hồ Chí Minh châ hlo 160 ngế hlâ, iâ má môi tung lối môi khế hiăng hluâ ƀă tơdâng hneăng apoăng khế 8; ai lối 2.500 ngế lo hngêi pơkeăng, mơdêk kơxô̆ mơngế prêi lo hngêi pơkeăng sap ing khế 1/2021 troh nôkố tâk 161.000 ngế, nôkố dế pơlât ăm lối 41.000 ngế tro tâ pơreăng.

Laga môi tơdroăng ki rơhêng vâ tối cho kơxô̆ ngế tro tâ pơreăng COVID-19 xuân ối hên. Tối ‘na tơdroăng kố, pôa Nguyễn Hoài Nam, Kăn phŏ pơkuâ ngăn pơkeăng ƀă khăm pơlât Pơlê kong kân Hồ Chí Minh tối ăm ‘nâi: Pơlê kong kân xuân pêi pro mâu troăng khăm ngăn rĕng tung rơdâ ƀă hên xôh khăm ngăn a ‘’kơpong khêi’’, ‘’kơpong trĭng’’, ai tíu troh 7 – 8 xôh. Kơxô̆ mơngế tro tâ nếo hiăng kơdroh hên, bu a kơlo 4.000 – 6.000 ngế.

A Sa Ly tơplôu ƀă tơbleăng