VOV4.Sêdang - Kơxo lơ 13/10, kong pơlê Lâm Đồng ‘nâi tơ’nôm ai 19 ngế tâ COVID-19 nếo, tung mê ai 10 ngế châ ‘nâi a môi tíu ki ai hên ngế tâ tung pơlê pơla. Klêi kơ’nâi séa ngăn hdrối vâ pâk vaccine COVID-19 a môi tíu pâk a pơlê kân Liên Nghĩa, tơring Đức Trọng, khu ki ai tơdjâk troh kong pơlê Lâm Đồng hiăng châ ‘nâi 3 ngế yương tĭnh ƀă với SARS-CoV-2. Rĕng séa ngăn, tí tăng, vê hdró kơpong, toê xo têa môh, klâ ăm ối krê mâu ngế ki ai tơdjâk a tíu rêh ối dêi 3 ngế kố cho thôn Pré, cheăm Phú Hội, tơring Đức Trọng, troh kơxo lơ 13/10, khu ki ai tơdjâk mơnhên tâi tâng ai 10 ngế tâ COVID-19 a tíu ki kố.

Pakĭng mê, tung 24 chôu kố nah, kong pơlê Lâm Đồng ối ‘nâi tơ’nôm 9 ngế tâ COVID-19 ki ê.

Khu ki ai tơdjâk dế toê xo têa môh séa ngăn pơreăng

Tung mê, ai 3 ngế cho F1 tơdjâk troh tíu ki ai hên ngế tâ a pơlê Mơhno túa lĕm tro Vạn Thành, bêng 5, pơlê kong kơdrâm Đà Lạt. Mâu ngế ki u ối châ ‘nâi a pơlê kân Liên Nghĩa, tơring Đức Trọng ƀă mâu ngế ki vêh sap ing kơpong ki ai pơreăng cho Đồng Nai ƀă Pơlê kong kân Hồ Chí Minh.

Katarina Nga tơplôu ƀă tơbleăng