VOV4.Sêdang - Kơxê lơ 4/7, Khu pơkuâ ngăn pơkeăng ƀă khăm pơlât kong pơlê Lâm Đồng tối ăm ‘nâi: ngế ki nhôm tro tâ COVID 19 cho ngế vê rơxế pơto tơmeăm troăng Đà Lạt – Pơlê kong kân Hồ Chí Minh hiăng âm tĭnh roh 1 ƀă SARS-CoV2. Ngế vê rơxế kố klêi kơ’nâi pơto tơmeăm ing Pơlê kong kân Hồ Chí Minh troh a Đà Lạt, troh kơbong pơlât kân – Tíu xiâm mơdât pơreăng kong pơlê Lâm Đồng vâ khăm ngăn rĕng pơreăng SARS-CoV2 mê ăm hlo dương tĭnh. Kơ’nâi mê, Tíu xiâm mơdât pơreăng kong pơlê Lâm Đồng hiăng tơkŭm xo mơheăm khăm ngăn RT-PCR mê ăm hlo âm tĭnh roh má 1 ƀă SARS-CoV2.

Tiah mê troh kơhâi dế lơ 4/7, Lâm Đồng ai tâi tâng 5 ngế tro tâ COVID 19, ôh tá ai ngế nếo tro. Nôkố lâp kong pơlê dế klâ krê 4.331 ngế, tung mê ai 12 ngế klâ krê a hngêi pơkeăng, 287 ngế klâ krê ƀă lối 4.000 ngế klâ krê a hngêi.

A Sa Ly tơplôu ƀă tơbleăng