VOV4.Sêdang - Hâi lơ 16/7, Vi ƀan hnê ngăn kong pơlê Lâm Đồng ai hlá mơ-éa pơtroh tơdrêng ‘na tơdroăng ki pơtối pêi pro rĕng, kơhnâ mâu troăng hơlâ hbrâ mơdât COVID-19 tâ tú tung kong pơlê. ‘Nâi 4 ngế tâ COVID-19 pơtối hlối cho mâu ngế ki vê rơxế, mâu ngế ki kum cheăng tung rơxế kơtâu pơkuâ, pôu râng dêi hnoăng cheăng ƀă hbrâ rơnáu tơrŭm ƀă Vi ƀan hnê ngăn mâu tơring, pơlê kong kơdrâm tung kong pơlê ai túa pơkâ vâ pêi pro nhên vâ mơdêk hnoăng cheăng rak ngăn mâu ngế ki vê rơxế, ngế kum cheăng tung rơxế chơ kế tơmeăm a troăng ki mot tung kong pơlê.

Khu cheăng ‘na kơvâ pơkeăng ƀă gak ngăn Lâm Đồng mơdêk séa ngăn pơreăng a mâu ngế ki vê rơxế, ngế ki kum cheăng ăm ngế ki vê rơxế a kong pơlê

Rơtế amê, Vi ƀan hnê ngăn kong pơlê pơkâ thế Khu ngăn troăng prôk ƀă rơxế kơtâu tơbleăng troh mâu tíu ki mơdró ‘no chơ kế tơmeăm pêi pro séa ngăn SARS-CoV-2 ăm ngế ki vê rơxế, ngế kum cheăng tung rơxế 3 hâi môi hdroh. Tâng ngế ki vê rơxế, ngế kum cheăng ăm ngế ki vế rơxế âm tĭnh ƀă SARS-CoV-2 kô chiâng tơkâ luâ mâu tíu gak hbrâ mơdât pơreăng COVID-19 sap ing 12 chôu măng dế kơxo ah lơ 18/7.

Vi ƀan hnê ngăn kong pơlê Lâm Đồng xuân pơkâ thế Khu ngăn troăng prôk ƀă rơxế kơtâu kong pơlê rĕng tơkŭm, chêh inâi mâu ngế ki vê rơxế, ngế ki kum cheăng ăm ngế ki vê rơxế chơ kế tơmeăm a kong pơlê vâ mơjiâng túa pơkâ rĕng pâk vaccine ăm mâu ngế ki kố.

Katarina Nga tơplôu ƀă tơbleăng