VOV4.Sêdang - Troh kơxo lơ 8/7, kong pơlê Lâm Đồng mơnhên tơ’nôm 3 ngế yương tĭnh nếo, mơdêk kơxô̆ mơngế tro tâ COVID 19 dêi kong pơlê tâk 9 ngế. Pakĭng 6 ngế yương tĭnh COVID 19 châ hlo hdrối mê a tơring Dà Tẻh, kơxô̆ ngế nếo tro tâ kố ai 3 ngế ối ƀă pêi cheăng tơring Đơn Dương, châ mơnhên yương tĭnh SARS-CoV-2 drêng rơtế troh Hngêi pơkeăng kân Lâm Đồng khăm ngăn. Ki nhên, a kơxo lơ 7/7, tŭm 3 ngế to ô tô krê ing tơring Đơn Dương troh a hngêi pơkeăng kân kong pơlê Lâm Đồng, a pơlê kong kơdrâm Đà Lạt vâ khăm ngăn rĕng COVID 19 ƀă ăm hlo yương tĭnh.

Hngêi pơkeăng kân Lâm Đồng, tíu ai 3 ngế nếo tro tâ troh khăm ngăn ƀă ăm hlo yương tĭnh ƀă COVID 19

Kơ’nâi mê, Tíu xiâm mơdât pơreăng kong pơlê Lâm Đồng xo mơheăm khăm ngăn ƀă kih thuât RT - PCR ƀă xuân ăm hlo yương tĭnh SARS-CoV2 a kơmăng lơ 7/7. Klêi kơ’nâi châ hlo mâu ngế tro tâ COVID 19 kố, tung kơmăng lơ 7/7, Khu pơkuâ ngăn pơkeăng ƀă khăm pơlât Lâm Đồng hiăng tơbleăng rĕng ti tăng ngế ki tơdjâk, tơdrêng amê pêi pro tơdroăng ti tăng mâu ngế ki ối achê mơngế tro tâ pơreăng. Troh kơxo lơ 8/7, khu cheăng hiăng ti tăng, klâ kơtăn châ 85 ngế F1 ƀă 265 ngế F2.

A Sa Ly tơplôu ƀă tơbleăng